Shiyanso 40

UYusufu iganula amalooto

1 Insiku saashila, avavanda vavili ava mutwa uwa ku Misili, vamunanjila umutwa waanave. Yumonga akhandi mungʼwesaaji mukhome wa fingʼwelwa, uyunji akhandi mutelekhaaji mukhome wa makhaate. 2 UFalawo wávakhalalila avakhome vaakwe awo, umungʼwesaaji umukhome nu mutelekhaaji umukhome. 3 Baheene, uFalawo wávadindila mu nanda ya mukhome wa vasulukhali, mu shifungo shishila shina adindiilwe uYusufu. 4 Umukhome wa vasulukhali wámubaagula uYusufu avayangalilaje, woope vasigala mu shifungo mula kwa nsiku nyasilinga ndeeni.

5 Ilijuva limonga, umungʼwesaaji umukhome nu mutelekhaaji umukhome wa mutwa, valoota amalooto mu shifungo, shila muunu nu lulooto lwakwe. 6 Ulwamilaawu njine uYusufu wáaluta kivaloleela, wávaaga vasugumiilwe mandu. 7 Baheene wávaposa waaja, “Kwashi musugumiilwe ndeeni iminsiyaano?” 8 Vamujovela vaajova, “Taloota amalooto, leelo kusiina uwa kiganula.” UYusufu wávaposa wáajova, “Kiganula amalooto yisili nsengo ya Nguluvi? Nijoveli shina mwaloota.”

9 Apo, umungʼwesaaji uyo wámujovela uYusufu amalooto gaakwe wáajova, “Mu malooto gangu, nagwaga umusabiibu pamwandi yangu, 10 goope gukhandi na mansambala gatatu. Baaho gwayansa kilembula, uwuluva wapongola na kikhoma isabiibu sina siyeelile. 11 Mu liwokho lyangu, nikhandi ni khoomasi ya Falawo, apo nasiyava isabiibu iso nasihuujila mu khoomasi, baheene namupeela uFalawo.”

12 UYusufu wámujovela wáajova, “Uluganulo lwa malooto gaakho lulwene ulu, amansambala gatatu ago, nsiku sitatu. 13 Insiku sitatu pina saashila, uFalawo asikudindulile mu shifungo na kikutinia khanji mu nsengo yaakho. Usiive ukimupeela uFalawo ifingʼwelwa fyakwe, ngaja shina ukhandi wiigaha pina ukhandi mungʼwesaaji waakwe. 14 Leelo nilomba unikumbukhaje pina amaswi gaakho gakhava gagolokha. Nilomba unigahilaje amanofu, unilogolaje wunofu kwa Falawo, kiija nihume mu shifungo muno. 15 Shiyooli, one natolwagwa kwa ngufu kihuma ku nyi ya Vahebulaniya, na hata apa pa Misili, kusiina uwunansi wuna nagahaga uwa kinigaha nidindilwe mu shifungo.”

16 Umukhome wa vatelekhaaji, wáganile kipulikha uluganulo lwa malooto ga muyine kiija manofu, baheene wámujovela uYusufu, “Na yuune naloota nisumwile amatunduti gatatu ga makhaate, ku mutwe gwangu. 17 Mu litunduti lya pashaanya, mukhandi muna fyakiilya ifya Falawo fina fili paayo paayo. Leelo inyuni sikhandi siilya ifyakiilya fina nikhandi niyitwishile.”

18 UYusufu wámujovela wáaja, “Uluganulo lwa malooto gaakho ulu, amatunduti gala gatatu nsiku sitatu. 19 Insiku sitatu sina siyinsa, uFalawo asikuhumye muno mu shifungo, akhakudumula umutwe gwakho na kigutumbikha pashaanya ya mupishi, inyuni sikhalya umuvili gwakho.”

20 Yaava ilijuva lya wutatu, likhandi lijuva lya kisawa umutwa uFalawo. Ilijuva ilyo lyaganile kifikha, uFalawo wávagahila ishiwungo avavanda vaakwe woona. Apo pa shiwungo, uFalawo wávahumya umungʼwesaaji umukhome nu mutelekhaaji umukhome, wávatwala pamwandi ya vakhome va vasulukhali vaakwe. 21 Pala wámuwuyiisa umungʼwesaaji umukhome pa nsengo yaakwe, na uyo umukhome wámupeela uFalawo ikhoomasi mu liwokho lyakwe. 22 Leelo, uFalawo wámutumbikha pa mupishi umutelekhaaji umukhome, ngaja shina uYusufu akhandi aganwile amalooto gaakwe. 23 Hata ndeeno, uyo umungʼwesaaji umukhome asikhamukumbwishe uYusufu, wámusamwagwa.