Shiyanso 41

UYusufu iganula amalooto ga Falawo

1 Gaganile kishila maakha gavili, uFalawo wáloota ayiimile mu mbalamo ya mukhoga gwa Nayili. 2 Wásaaga ingʼombe fungati inofu sina sineneepe mandu, sitanamukha kihuma mu mukhoga, baheene sayansa kiilya amasole. 3 Baheene sayinsa ingʼombe isinji fungati, sina sigandile mandu, sayiima palubali ya mukhoga, nkholeela ni ngʼombe sila sina sineneepe. 4 Baheene ingʼombe fungati imbi sila sina sigandile, sasilya ingʼombe fungati sila sina sineneepe. Baaho uFalawo wálamukha mu tulo.

5 Lwaganile kishila uluhaavi ludoodo, uFalawo wáagona khanji. Wáganile kigona, wáloota ulwa wuvili. Wágaaga amahoojo fungati makhome manofu, gapongwele mu liseeguve limo. 6 Baheene wágaaga khanji amahoojo aganji amanyeehe fungati, gina gayumisiiwe ni lipepo ilikhali kihuma ku lunyikha. 7 Baheene amahoojo gala fungati gina manofu, gaamilwa na mahoojo gala fungati amanyeehe. UFalawo wáganile kilamukha, wáamanya kiija wáava iloota hela.

8 Ulwamilaawu njine, uFalawo wáava atungumeele. Baheene wávashemeela avalagulaaji woona na vaanu woona avanya luhala ava ku Misili. UFalawo wávajovela amalooto gaakwe, leelo, kusiina umuunu hata yumo, yuna wáganulaga amalooto gaakwe. 9 Apo, umungʼwesaaji umukhome wa fingʼwelwa, wámujovela uFalawo, “Wee mutwa, iminsiyaano nakumbukha uwunansi wangu! 10 Uluhaavi lula luna ukhandi utukhalaliile one nu mutelekhaaji umukhome wa makhaate gaakho, watudindilaga kwa mukhome wa vasulukhali va wuyangalilaaji waakho. 11 Ishilo shimonga, one nu muyangu talootaga, shila muunu amalooto gaakwe, kukhandi kuna wuganulaaji wuna wuli paayo. 12 Mukhati mula, mukhandi muna mudiimi yumonga wa Vahebulaniya, muvanda wa mukhome wa vayangalilaaji vaakho. Taganile kimujovela amalooto geesu, wátuganulilaga shila muunu shina akhandi alootile. 13 Uwuganulaaji waakwe, waava ngaja shishila shina akhandi aganwile. One natinisiwaagwa ku nsengo yangu nu mutelekhaaji wa makhaate wátumbikhwagwa pa mupishi.”

14 Baheene uFalawo wálajisa kiija uYusufu aleetwe, vamuhumya nyangu mu shifungo. Wásheeta inyele, wáfwala amenda aganji, baheene wáaluta pa Falawo. 15 Wáganile kifikha kwa Falawo, uFalawo wámujovela uYusufu wáajova, “Naloota, leelo kusiina umuunu yuna akwiliile kiganula amalooto gangu. Lino napulikha kiija, owe ukwiliile kiganula amalooto.” 16 UYusufu wámujovela uFalawo, “One nigaya wutawulilwa uwa kiganula, leelo uNguluvi asikupeele uwuganulaaji wa kiyivatamya inumbula yaakho.”

17 Baheene uFalawo wámujovela uYusufu, “Nalootaga niyiimile mu mbalamo ya mukhoga gwa Nayili. 18 Nasaaga ingʼombe fungati inofu sina sineneepe mandu, sitanamukha kihuma mu mukhoga, sayansa kiilya amasole. 19 Naganile kisaaga iso, sayinsa ingʼombe isinji sina sigandile mandu, khanji sina mavili mavi mandu. Ingʼombe shina sila, one nisinasaagaje hata gwalimo pa Misili apa. 20 Baheene ingʼombe fungati sila isa wutasi sina sineneepe mandu, saliiwa ni ngʼombe fungati sina sigandile mandu. 21 Leelo ingʼombe iso sina sigandile, saganile kisilya ingʼombe sila sina sineneepe, sasigala shishila kusiina umuunu yuna akwiliile kimanya kiija, sasilya ingʼombe sila sina sineneepe mandu. Baheene natindimukha. 22 Naganaga kigona khanji, naloota ulwa wuvili, nagaaga amahoojo fungati amanofu aga mbumbulu, goona galembwile mu liseeguve limo. 23 Apo, baheene galembula amahoojo aganji fungati amanyeehe mandu, gina ganyaalile kwa kiiva gapujiilwe ni lifushe lina liihuma ku lunyikha. 24 Amahoojo fungati amanofu gala, gaamilwa na mahoojo fungati amanyeehe. Amalooto ago navajovelaga avalagulaaji woona, leelo kusiina hata yumo yuna wániganulilaga amalooto gangu.”

25 Apo, baheene uYusufu wámujovela uFalawo wáajova, “Amalooto gaakho goona uwuganulaaji waakwe wuwuumo. UNguluvi wávawonensa injowo sina hambi ikisisenga uluhaavi luulu ulwa nkholeela. 26 Ingʼombe fungati sina sineneepe mandu, uluganulo lwakwe maakha fungati, na mahoojo amakhome mandu, uluganulo lwakwe, maakha fungati. Amalooto ago, uwuganulaaji waakwe wuwuumo. 27 Ingʼombe fungati sila sina mbi sigandile mandu, sina sifwata sila sina sineneepe mandu, na mahoojo gala fungati amanyeehe mandu na gina ganyaalile kwa lifushe, uluganulo lwakwe, maakha fungati aga njala. 28 Ngaja shina nakujovela Falawo kiija, uNguluvi wakuwonensa injowo sina asisisenje lilino. 29 Puliisa, kukhava na maakha fungati aga mota nkhome, mu nyi yoona iya Misili. 30 Leelo, kumwandi gakhayinsa amaakha aganji fungati aga njala inkhome na maakha gala aga mota, gasikhakumbukhwa. Injala iyo, yikhayinanga inyi yoona iya Misili. 31 Imota yina yili mu nyi yisikhakumbukhwa, kwa kiiva injala yina yikhagwa, yikhava nkhome mandu. 32 Kiiva amalooto gaakho gayiwuyiilila ulwa wuvili, iliswi ilyo uNguluvi wáliwonensa, asiligahe nyangu.

33 “Lino wee Falawo, mubaagula umuunu umunya lugoto nu luhala, umuviishe ave muyimililaaji wa nyi ya Misili. 34 Khanji ugahe ndeeni, ubaagule avayimililaaji vina vasiyimiilile inyi ya Misili. Insengo yaanave yive kikungaania ishipuga shimo mu fipuga fisaanu ifya nkungulo yoona iya Misili mu luhaavi ulu ulwa maakha fungati aga mota. 35 Uvalajise avaanu awo vakungaanie ishakiilya shoona isha nkungulo, uluhaavi lwa maakha fungati gina giyinsa aga mota. Imbumbulu iso, sive mu wutawulilwa waakho, siviikhwe mu fihenje mu majumbi. 36 Ishakiilya isho shiviikhwe, kwa kiiva ya maakha fungati aga njala, yina yikhagwa mu Misili, kiija inyi yisilaave yinangwe.”

UYusufu iviikhwa ave muyimililaaji

37 Iliswi ilyo lyava linofu kwa Falawo na kwa vavanda vaakwe woona. 38 Baheene uFalawo wávaposa avavanda vaakwe, “Tisimwaje kwi umuunu uyunji ngaja uyu, umunya numbula ya Nguluvi?” 39 Baheene wámujovela uYusufu, “Kwa kiiva uNguluvi wákuwonensa aga goona, kusiina umuunu uyunji umunya luhala nu wumanyi ngaja owe. 40 Lino owe usiive muyangalilaaji wa livansa lyangu, na vaanu vangu woona vakhava vifwata amalajiso gaakho. Pa shitengo sha wutwa hela, one nikhava mukhome kikushila owe.” 41 Baheene uFalawo wáyitenekha wáajova, “Lino nakubaagula uve muyimililaaji wa nyi yoona ya Misili.” 42 Apo uFalawo wáyaawula ipete yaakwe inya shimanyilo sha shitwa mu ludole lwakwe, baheene wámufwasa uYusufu mu ludole. Khanji, wámufwasa amenda amanofu mandu nu lunyolo lwa sahaabu mu nsingo. 43 Wámuyangasa uYusufu mu mutukha yaakwe iya wuvili, yina yikwehwa ni falaasi. Avaanu valongola pamwandi ya Yusufu kuno vilyova viija, “Fugamaji!”

Ndeeno uFalawo wámuviikha uYusufu ave muyimililaaji wa nyi yoona iya Misili.

44 Apo, uFalawo wámujovela uYusufu, “One yuune Falawo, mutwa! Leelo mu nyi yoona iyi iya Misili, umuunu yoyoona asikhagahaga shiinu shoshoona bila wutawulilwa waakho.” 45 Baheene uFalawo wámutambulila uYusufu ilitaawa lya Shimisili ilya Safenati-Paneya. Wámutwasa uAsenati, umwali wa Potifeela, umutambule wa ku lijumbi lya Oni, ave mudala waakwe. Apo, uYusufu wáyansa kipilima inyi yoona iya Misili.

46 Uluhaavi luna akhandi iyansa kimusenjela insengo uFalawo umutwa wa ku Misili, uYusufu akhandi ana maakha mashumi gatatu. UYusufu wáahuma kukhaaya kwa Falawo, wáaluta kiseesa inyi yoona iya Misili. 47 Amaakha ago fungati ga shakiilya shinshi mandu, ishakiilya shamotekha mandu mu magunda goona aga ku Misili. 48 UYusufu wákungaania ishakiilya shoona isha maakha ago fungati aga shakiilya shinshi mandu. Shila lijumbi lya Misili, saviikhwa imbumbulu sina sakungulwagwa kihuma mu magunda ga mulubali lwa lijumbi ilyo. 49 Wákungaania imbumbulu nyinshi mandu, ngaja luhankha lwa mu mbalamo ya bahali. Wáalekha hata kivasa, kwa kiiva akhandi akungeenie mbumbulu nyinshi.

50 Pina gasinayanse amaakha ga njala, uAsenati umwali wa Potifeela umutambule wa ku lijumbi lya Oni, akhandi amusaviile uYusufu avaana vavili ava shidiimi. 51 UYusufu wámutambulila umwanaakwe uwa wutasi ilitaawa ilya Manaase,^a kwa kiiva wájovile, “UNguluvi wánigaha nisaamwe amalava gangu goona khabisa, hata avalukholo lwangu ava nanda ya daada.” 52 Umwana wa wuvili wámutambulila ilitaawa lya Efulahimu,^b kwa kiiva wájovile, “UNguluvi anipeelile ulusawo mu nyi ya malava gangu.”

53 Amaakha fungati aga shakiilya shinshi mandu gaganile kisila ku Misili, 54 baheene amaakha aganji fungati aga njala gayansa, ngaja shina uYusufu akhandi alogwele. Injala yaagwa inyi isinji soona, leelo inyi iya Misili yikhandi yina shakiilya. 55 Avaanu ava ku Misili vaganile kimala ifyakiilya fyanave, vaaluta kimulomba uFalawo avapeele ishakiilya. Woope uFalawo wávajovela aVamisili, “Lutaji kwa Yusufu, shina hambi ikivajovela, gahaji.”

56 Injala yaganile kiyalaalila nyi yoona, baheene uYusufu wádindula ifihenje fyona, wáyansa kivagusisa aVamisili ishakiilya. 57 Avaanu kihuma nyi soona, vayinsa ku Misili kwa Yusufu kigula ishakiilya, kwa kiiva injala yikhandi nkhome mandu, yiyalaliile nyi soona.