Shiyanso 39

UYusufu kukhaaya ya Potifa

1 AVaishimayeli vala vamutwalaga uYusufu ku Misili, vamugusaaga ukho kwa Mumisili yumonga yuna itambulwagwa Potifa. UPotifa uyo, akhandi mukhome wa vasulukhali va wuyangalilaaji wa Falawo. 2 UMutwa uNguluvi wáava nu Yusufu. Woope uYusufu wásingamala na kikhala wunofu mandu nu Mumisili, umunya lijumbi waakwe. 3 UPotifa wáawona kiija uMutwa uNguluvi ali lumo nu Yusufu, khanji uNguluvi yumwene yuna akhandi iigaha goona gina uYusufu wágahaga gave manofu. 4 UYusufu wámushendefyaga uPotifa umukhome waakwe, woope wámugaha uYusufu ave muyimililaaji wa nanda nu wusi waakwe woona. 5 Kihuma uYusufu ave muyimililaaji wa nanda yaakwe na muyangalilaaji wa wusi waakwe, uMutwa uNguluvi wáyiyimiilila inanda ya Mumisili uyo, kwa kiiva ya Yusufu. Imota ya Mutwa uNguluvi yaava mu shila shiinu shina anasho isha mu magunda ni sha mu nanda. 6 Ndeeno, uPotifa wámuleshela uYusufu ayimiilile shila shiinu, uPotifa wáava iyangalila shi shakiilya shaakwe hela.

UYusufu nu mudala wa Potifa

UYusufu akhandi mudiimi munofu mandu. 7 Insiku saganile kishila, umudala wa Potifa wámugana mandu uYusufu, baheene wámujovela, “Gona noone!” 8 Leelo, uYusufu wákhaana, kuno ikimujovela, “Puliisa, umutwa wangu asihiiva shiinu shoshoona isha pakhaaya apa, shila shiinu shina anasho, anilesheele niyangalilaje. 9 Pakhaaya panu, kusiina uyunji umukhome kinishila one. Khanji asinikhaanile kigaha shiinu shoshoona panyaakwe panu, leelo owe hela, kwa kiiva owe uli mudala waakwe. Nikwiliile wuli kigaha uwuvi uwo, nimunanjile uNguluvi?” 10 Umudala uyo wáyitenekhaga kimubembelesa uYusufu wiila, ayiitishe agone nawo. Leelo uYusufu asikhamuyitiishe, akhandi ikhaana hata kiiva nkholeela nu mwene.

11 Lino ilijuva limonga, uYusufu wáhuluta mukhati kisenga insengo yaakwe, apo pakhaaya pasikhandi na vavanda avanji. 12 Baheene umudala wa Potifa wámukhata uYusufu inkhansu yaakwe, wámujovela, “Gona noone!” Leelo uYusufu wámupulumukha, wáyilekha inkhansu mu mawokho gaakwe, wásijila kunja.

13 Umudala wa Potifa wáganile kiwona uYusufu wámuleshela umwenda gwakwe na wásijila kunja, 14 wávashemeela avavanda vaakwe wávajovela wáaja, “Loleeli! UMuhebulaniya uyu yuna taletelwagwa, wátuyegula! Wáyinsa kunyangu isakula kinikhata, kiija agone noone kwa ngufu. Leelo nalyova. 15 Wáagana kiwona nalyova, wáasiga, wápoola kunja, wáyilekha inkhansu yaakwe.”

16 Baheene umudala uyo wáyiviikha wunofu inkhansu iyo, mbakha pina wáawuya umugoosi waakwe. 17 Wáganaga kifikha, wámujovela umugoosi waakwe amaswi gala wáajova, “Umuvanda uMuhebulaniya uyo yuna watuletelaga, wániyalushila isakula kiniyegula. 18 Leelo, naagana kilyova na kikhoola kwa shawuti, wáyilekha inkhansu yaakwe, wásijila kunja.”

19 UPotifa wáganaga kipulikha amaswi gina umudala waakwe wágahilwa nu muvanda waakwe, wákhalala mandu. 20 Ndeeno wámukhata uYusufu, wámudindila mu shifungo, muna vakhandi vadindiilwe avadindilwa avanji woona ava mutwa.

UYusufu mu shifungo

21 Leelo uMutwa uNguluvi wáava lumo nu Yusufu, wámusungupila mbakha wáhonsa umukhome wa shifungo, wámugahila amanofu. 22 Ndeeno, umukhome wa shifungo wámuviikha uYusufu ave mukhome wa vadindilwa woona na kiyimiilila goona gina gakhandi giigahwa mu shifungo umo. 23 Umukhome wa shifungo asikhaliyinatiile lyolyona lina likhandi liyimiililwa nu Yusufu, kwa kiiva uNguluvi akhandi lumo nu mwene ikimutanga mu lyolyona lina akhandi ikiligaha.