Abhugulwe hwi‑ibooma ɨlyɨ Baabeli
18
Lwa gaashila ɨgo,
nahanʼnola ʉnʼtumi ʉwɨnjɨ ahwiha afume hu mwanya,
ahali ni‑ikhone igoosi,
yope ɨnsi yahakhozewa nʉ lukhozyo lwakwe.
2 Wope ahayanga hwi‑izwi igoosi tee ahaga,
“Ʉgwiye!
Ʉgwiye Baabeli,
we libooma ligoosi!
Ɨshi wabha khalo wɨ mapepo.
Shila lipepo likhala mwaliiwe,
wabha pantu pa‑akhale ɨnyonyi ɨmbiibhi nɨ zya‑aviisye.
3 Enya,
abhantu abhɨ nsi zyonti
bhakholiilwe ɨdivaayi afume hwaliiwe.
Ɨdivaayi ɨyo weegu wa saga wuli nʉ malishilo.
Bhope abhamwɨnɨ abhɨ nsi bhabhembuushe naawe.
Nantele bhope abhachuluuzi abha mu nsi
bhatabhɨɨye afumilane nʉ winji wɨ nsʉngwo zyaho ɨmbiibhi.”
4 Ɨpo nahʉmvwa izwi ɨlyɨnjɨ afume hu mwanya liyiga,
“Epi mwi‑ibooma ɨlyo amwɨ mubhantu bhaanɨ,
huje musahabhe peeka mu mbiibhi zya bhantu bhaakwe,
lusahabhaaje ʉlufundo lwabho.
5 Enya ɨmbiibhi zyakwe ngoosi tee,
nantele zifishile hu mwanya.
Wope ʉNgʉlʉbhɨ ahwizuha ʉbhiibhi waakwe.
6 Munʼnyɨmvye nanshi ɨsho ahabhayɨmvyɨzye abhanjɨ,
nantele munʼnyɨmvye habhɨɨlɨ ashile ʉmwene sha‑ahabhayɨmvyɨzye.
Mweje ʉlupɨndɨ lwakwe,
mumʼpeele habhɨɨlɨ ɨdivaayi ɨhali ashile ɨyo ahabhapiiye amwɨ.
7 Munʼnyɨmvye na hunʼzugumizye afumilane na hwibaade hwakwe,
alɨngaane na‑abhombe ʉlogozi,
pɨpo ahwibaada mu mwoyo gwakwe ayiga,
‘Anɨ ɨhɨɨye pi‑itengo ɨlyɨ shimwɨnɨ na‑alongozye nanshi ʉmwɨnɨ ʉwɨ shishɨ.
Anɨ saga ɨndi mʼfwɨle,
nantele saga nahayibha nʉ zugumizu nka hashe!’
8 Ɨshi hu nongwa ɨyo amayɨmba gahayihumʼmwaga pi‑isiku lyeka,
ʉfwe,
ʉzugumizu nɨ nzala.
Ahayipembwa nʉ mwoto,
pɨpo ʉMwɨnɨ ʉNgʉlʉbhɨ wa‑ahunʼnonga,
ali ni‑ikhone.”
9 Abhamwɨnɨ abha mu nsi ɨbho bhahabhembuushe nawo na‑abhe peeka mu tabhazi waakwe,
bhahayilila na‑azugumile lwa bhahayilola ilyosi ɨlyɨ mwoto ʉgwo gulʉngʉlɨzya ibooma ɨlyo.
10 Abhamwɨnɨ ɨbho bhahayɨmɨɨlɨla hutali ni‑ibooma ɨlyo hu nongwa ya hwogope amayɨmba gaakwe.
Bhahayilila bhahayiga,
“Lwaho,
lwaho we libooma lyɨ Baabeli,
aawe ʉli libooma ligoosi!
Nantele li‑ikhone!
Hu habhaazyo hi‑isaala lyeka ʉyambɨlɨɨye ʉlufundo lwaho.”
11 Abhachuluuzi abhɨ nsi zyonti bhahayihulililila na‑azonde,
pɨpo nʉʉmo ʉmuntu ʉyo ahayikala ɨvintu vyabho.
12 Nʉʉmo ʉmuntu nantele ʉwa‑akale ɨvintu vyabho ɨvyɨ zahaabu,
awe ɨvyɨ mpɨɨya,
awe ɨvyɨ mawe agɨ mpɨɨya ɨngoosi,
awe ɨvyɨ nyambo ɨzyɨ mpɨɨya ɨngoosi.
Nʉʉmo ʉmuntu ʉwa‑akale amenda aminza,
awe amenda amavuutu awe amashamamu.
Nantele nʉʉmo ʉmuntu ʉwa‑akale ɨvyɨlɨɨlo ɨvyɨ makwi agɨ masotolooni,
awe ɨvyo vigombwilwe nɨ mpeeta ɨzyɨ nzovu,
awe ɨvyɨ makwi agɨ nshɨnshɨ ɨngoosi,
awe ɨvyɨ shaaba,
awe ɨvyɨ majela,
awe ɨvyɨ malumaalu.
13 Nʉʉmo ʉmuntu ʉwa‑akale ʉmudalasiini,
ɨvilʉnjɨlo ɨvyɨnjɨ vya vinunshila,
ɨnyemba zya zinunshila shinza,
ɨvintu ɨvya‑asushizye,
ɨdivaayi,
ɨnyemba ɨzya‑ateleshele,
ʉbhusu ʉwinza,
awe ɨngano.
Nantele nʉʉmo ʉmuntu ʉwa‑akale ɨngʼombe,
awe ɨngoole,
awe ɨfalaasi,
awe amagaali aga‑akwesangwe nɨ falaasi,
awe abhakalwe.
14 Abhachuluuzi bhahayihubhabhʉʉzya abhantu abha hwi‑ibooma ɨlyo huje,
“Ɨvintu ɨvyo mwahasʉbhɨɨye mu mooyo geenyu viteejile,
ʉtabhazi weenyu nɨ nshɨnshɨ yeenyu viteejile,
saga mwahayihuvilola nantele.”
15 Abhachuluuzi ɨbho bhatabhɨɨye afumilane ni‑ibooma ɨlyo,
bhahayɨmɨɨlɨla hutali hu nongwa ya hwogope amayɨmba gaakwe,
bhahayilila na‑azonde.
16 Bhahayiga,
“Lwaho,
lwaho we libooma ligoosi.
Abhantu bhaaho bhahalʉbhɨɨye akwate amenda aminza amazelu,
amavuutu na mashamamu,
na hwidone hu zahaabu
na mawe agɨ mpɨɨya ɨngoosi nɨ nyambo ɨzyɨ mpɨɨya ɨngoosi.
17 Leelo ʉtabhazi ʉwo wonti wuyaziiwe hwi‑isaala lyeka lwene.”
Abhagoosi abhɨ meeli,
bha bhashʉʉla bhonti,
abhabhomba mbombo abha mu meeli,
na bhonti bha bhabhomba ɨmbombo ɨyɨ chuluuzi ʉhwo hu nsʉmbi,
bhahayɨmɨɨlɨla hutali.
18 Lwa bhahayilola ilyosi ɨlyɨ mwoto ʉgwo gulʉngʉlɨzya ibooma ɨlyo,
bhahayilila hwi‑izwi igoosi bhahayiga,
“Libooma wɨlɨ lya lili nanshi ibooma ɨli igoosi sha lyahali?”
19 Bhahayihwiponya amankondi mu matwe gaabho ʉhwu bhalila na‑azonde,
“Lwaho,
lwaho we libooma ligoosi!
Aawe libooma wahatibhɨɨshɨle tenti tibhɨ meeli,
tibhe bhatabhazi hu nongwa yɨ tabhazi waaho.
Leelo aawe libooma ʉlʉngʉlɨɨye lwonti hwi‑isaala lyeka lwene.
20 Seshelaji amwɨ mwa mukhala hu mwanya,
hu nongwa ɨya‑ayaziwe hwakwe.
Seshelaji mubhooziwa,
mubhasontwa na mubhakuwi,
pɨpo ʉNgʉlʉbhɨ abhalonjile abhantu abha mwi‑ibooma ɨlyo,
hu gaala ɨgo abheene bhahabhabhombɨɨye amwɨ.”
21 Ɨpo ʉnʼtumi ʉmo ʉyo ali ni‑ikhone,
ahabhʉʉsya iwe ɨlyo lilɨngaana nanshi ʉlwala ʉlugoosi,
ahalitaaga mu nsʉmbi,
ahaga,
“Hwi‑ikhone igoosi nanshi ɨshi,
ibooma igoosi ɨlyɨ Baabeli lyahayitaagwa na‑ateeje lwonti.
22 Izwi ɨlyɨ ntonga,
ɨlyɨ nteelo,
ɨli‑ilonji nɨ lyɨ ndudwe
saga lyahayʉmvwɨha dumu mwi‑ibooma ɨlyo.
Saga pahayibha ʉmanyiihanyi wowonti ʉwa‑alɨngaanye hohonti,
awe saga hwahayʉmvwɨha izwi ɨlyɨ lwala dumu!
23 Ɨpo saga pahayibha nʉ lukhozyo nantele.
Awe saga hwahayibha ɨshikulukulu ɨsha mweji awe ʉmwegwa,
hwa huje saga hwahayibha ʉweeji dumu nantele.
Ibooma ɨlyɨ Baabeli lyahayibhombwa ɨshi,
pɨpo abhachuluuzi bhaakwe
bhahali bhantu bhagoosi bha mu nsi.
Ɨnjanjile ɨsho,
pɨpo abhantu abha mu nsi zyonti
bhagobeliilwe nʉ lozi ʉwi‑ibooma ɨlyo.
24 Mwi‑ibooma ɨlyo lilolɨɨshe idanda lya bhakuwi
ni‑idanda lya bhooziwa,
peeka nɨ lya bhantu bhonti
ɨbho bhahabudiilwe mu nsi.”