ɄNgʉlʉbhɨ asayiwa
19
Lwa gaashila ɨgo,
nahʉmvwa izwi nanshi izwi lyɨ mpʉga ɨngoosi ʉhwo hu mwanya liyiga,
“ɄMwɨnɨ ʉNgʉlʉbhɨ asayiwaaje!
Ʉfyʉli,
ʉmwamu ni‑ikhone vifuma hwa Ngʉlʉbhɨ weetu,
2 pɨpo ʉlongwe lwakwe lwɨ lyoli nʉ lwɨ golosu.
Anʼnonjile ʉmwegu ʉnʼgoosi.
Ʉyo ya yʉʉyo ahanangɨɨnye ɨnsi hu weegu waakwe.
ɄNgʉlʉbhɨ amʼmwezeziizye iliiga
hu nongwa ya hwite idanda lya bhabhomvi bhaakwe.”
3 Nantele izwi lyahayanga ʉlwa bhɨɨlɨ lyahaga,
“ɄMwɨnɨ ʉNgʉlʉbhɨ amwamihwaje!
Ilyosi lyɨ mwoto ʉgwo gulʉngʉlɨzya ibooma ɨlyɨ Baabeli,
lizʉbha hu mwanya wiila na wiila.”
4 Abhagoosi bhaala amashʉmi gabhɨɨlɨ na bhanɨ nɨ vipelwa viila vinɨ bhahasugamila na humʼpuute ʉNgʉlʉbhɨ ʉyo akhɨɨye pi‑itengo ɨlyɨ shimwɨnɨ,
bhayiga,
“Aameni!
ɄMwɨnɨ ʉNgʉlʉbhɨ amwamihwaje!”
5 Ɨpo izwi lyahʉmvwɨha afume pi‑itengo ɨlyɨ shimwɨnɨ lyahaga,
“Mumʼmwamihaje ʉNgʉlʉbhɨ weetu,
amwɨ mubhabhomvi bhaakwe mwenti,
amwɨ mwenti mwa muhunʼtiniha,
amwɨ mubhagoosi na mubhadoodo!”
6 Ɨpo nahʉmvwa izwi nanshi ɨlyɨ mpʉga ɨngoosi.
Izwi ɨlyo lyahʉmvwɨha nanshi ɨlyɨ mɨnzɨ aminji sha gahwiha pa nsalala.
Nantele lyahali nanshi izwi igoosi ɨlyɨ lyʉngʉmo.
Lyahagaga,
“ɄMwɨnɨ ʉNgʉlʉbhɨ amwamihwaje,
pɨpo ʉMwɨnɨ ʉNgʉlʉbhɨ weetu ʉwi‑ikhone lyonti alongozya.
7 Tishanje na hunʼnuluutile na humʼmwamishe,
pɨpo ʉweeji ʉwa Mwana Ngoole wufishile,
nʉ mwali ahwibhɨɨshɨle nzɨɨla.
8 Ʉmwali apewiilwe amenda aminza ga galawuha,
na minza tee.”
Amenda aminza ɨgo galolesya ɨnjendo ɨzyɨ lyoli zya bhooziwa.
9 Ɨpo ʉnʼtumi ʉla ahambʉʉzya ahaga,
“Simba ɨga,
‘Bhasayiiwe ɨbho bhaniilwe hu shikulukulu ɨshɨ weeji ʉwa Mwana Ngoole!’
” Nantele ahambʉʉzya ahaga,
“Amazwi ɨga gɨ‑ɨnjanjile mazwi gɨ lyoli ga Ngʉlʉbhɨ.”
10 Ɨpo nahasugamila pa manama ga nʼtumi ʉyo huje ɨmʼpuute.
Leelo ʉmwene ahambʉʉzya ahaga,
“Leha!
Anɨ ɨndi mʼmomvi lwene nanshi aawe peeka na bhamwenyu ɨbho bhahunʼsimishizya ʉYeesu.
Ɨshi,
ʉmʼpuutaje ʉNgʉlʉbhɨ mwene,
pɨpo ʉsimishizi wa Yeesu yɨ mpepo yɨ kuwi.”
Ʉyo alongozya ɨfalaasi ɨnzelu
11 Pamandɨ nahalola ɨmwanya yiiguha,
ʉhwo nahalola ɨfalaasi ɨnzelu,
nʉ muntu ʉyo ahali akhɨɨye pa mwanya,
bhahagaga Nʼnʉnjɨsu nantele Wɨ lyoli.
Ʉyo alonga na‑alwe ʉlʉgʉ hu golosu.
12 Amaaso gaakwe gahali nanshi ɨmɨlɨ ɨzyɨ mwoto,
nantele ahali akwɨte ɨvyʉbhalo ɨvinji hwi‑itwe.
Lyahasimbwilwe itaawa ɨlyo nʉʉmo ʉmuntu wa‑ahali amɨɨnye,
lyoli yʉʉyo mwene.
13 Ahali akwɨte ʉmwenda ʉgwo bhahazubhiishe mwi‑idanda.
Itaawa lyakwe bhahagaga Lizwi lya Ngʉlʉbhɨ.
14 Ɨmpʉga ya bhalwi abha hu mwanya yahali ɨhunʼnondolezya,
ʉhwu abhalwi ɨbho bhakhɨɨye pa mwanya pa falaasi ɨnzelu,
nantele bhakwɨte amenda aminza amazelu ɨgo saga gali na mabada lwonti.
15 Ipanga ɨlyoji lyahali lifuma mwi‑ilomu lyakwe.
Hwɨ‑ɨlyo ahubhamena abhantu abhɨ nsi zyonti.
Ʉmwene ya yʉʉyo ahayihubhalongozya hwi‑ikhone igoosi na‑asʉʉye ɨdivaayi ɨhali mwi‑ilɨndɨ ɨlya‑asʉʉyɨle ɨzabiibu.
Ilɨndɨ ɨlyo lilyoyo ligoosi ɨlya Ngʉlʉbhɨ ʉwi‑ikhone lyonti.
16 Mu nʼsheto gwakwe pa mwenda pahali pasimbwilwe itaawa ɨli,
ɄMwɨnɨ ʉwa bhamwɨnɨ nʉ Nʼgoosi ʉwa bhagoosi
17 Ɨpo nahanʼnola ʉnʼtumi ʉmo ayɨmɨlɨɨye hu mwanya pi‑isanya.
Ahakwizya hwi‑izwi igoosi na huzibhʉʉzye ɨnyonyi zyonti ɨzyo zyahapuluhaga huje,
“Ɨnzaji!
Mubhʉngaane mwenti pa shikulukulu ɨshigoosi ɨsha Ngʉlʉbhɨ.
18 Ɨnzaji,
mulye amavimba aga bhamwɨnɨ,
aga bhagoosi bha bhagoosi abha bhalwi,
na ga bhantu abhi‑ikhone.
Ɨnzaji,
mulye ɨnyama yɨ falaasi nɨ ya bhajenzya ɨfalaasi na mavimba aga bhantu bhonti,
abhakalwe na bha saga bhakalwe,
abhagoosi na bhadoodo.”
19 Nahalola ikhanu liila ɨlya hwande peeka na bhamwɨnɨ abhɨ nsi zyonti nɨ mpʉga zya bhalwi bhabhʉngɨɨne pandwɨmo.
Bhahabhʉngɨɨne huje bhalwe nʉ‑ʉla ʉyo ahali akhɨɨye pa mwanya pa falaasi peeka nɨ mpʉga ya bhalwi bhaakwe.
20 Leelo ʉyo ahali akhɨɨye pa falaasi ahalikhata ikhanu peeka nʉ nʼkuwi waakwe ʉwi‑ilenga,
ʉyo ahabhombile amayele hu nongwa yaakwe.
Hu mayele gaakwe ɨgo,
ahabhagobɨɨye abhantu ɨbho bha bhahali nɨ shimanyishizyo ɨshi‑ikhanu ɨlyo na hushipuute ɨshifwani shaakwe.
Ikhanu ɨlyo peeka nʉ nʼkuwi ʉyo bhahataagwa bhonti bhabhɨɨlɨ,
sha bhali bhʉʉmi,
mu nsʉmbi ɨyɨ mwoto ʉnʼkhali tee.
21 Ʉmuntu ʉyo wa‑ahali akhɨɨye pa mwanya pa falaasi,
ahabhombɨɨye ipanga lyakwe ɨlyo lyahafumile mwi‑ilomu lyakwe huje abhabude abhalwi bhonti.
Ɨnyonyi ɨzyo zyonti zyahalya ɨnyama ɨzyo na‑angute tee.