Ʉmwegu ʉnʼgoosi ni‑ikhanu ishamamu
17
Ɨpo ʉmo mu bhantumi pʉnga (7) ɨbho bhahali nɨ mbakuuli pʉnga ahaga,
“Ɨnzaga,
ɨʼlolesye ʉlongwe ʉlwo lwahayihumʼmwaga ʉmwegu ʉnʼgoosi,
ʉyo libooma ɨlyo lizengwilwe munshɨnjɨ yɨ masooho.
2 Abhamwɨnɨ abha mu nsi bhahabhembuushe nawo na bhantu abha mu nsi bhope bhakholiilwe ɨdivaayi ɨyɨ weegu.”
3 Ɨpo ʉMʼpepo wa Ngʉlʉbhɨ ahaniishila.
Ʉnʼtumi ʉyo ahandongozya afishe hu lʉʉgwa.
Ʉhwo nahanʼnola ʉnʼshɨ akhɨɨye pa mwanya pi‑ikhanu ishamamu.
Ikhanu ɨlyo lyahasimbwilwe hwonti amataawa agi‑ishento,
lyahali na matwe pʉnga (7) nɨ mpeeta ishʉmi.
4 Ʉnʼshɨ ʉyo ahali akwɨte amenda aminza agɨ vuutu nʉ shamamu.
Nantele ahali ahwidonile nɨ vintu ɨvyɨ zahaabu,
amawe agɨ mpɨɨya ɨngoosi nɨ nyambo ɨzyɨ mpɨɨya ɨngoosi.
a Mu nʼkhono gwakwe ahali akhɨɨte ʉlupɨndɨ ʉlwɨ zahaabu ʉlwo lwahamemile aga‑aviisye nʉ bhiibhi.
Ɨvyo vyonti vilolesya ʉweegu waakwe.
5 Pa sheeni shaakwe pahasimbwilwe itaawa ɨlya hu mfiso ɨli,
Ibooma igoosi ɨlyɨ Baabeli,
nyina wa bheegu
nʉ wɨ njendo ɨzyo ziviisya ɨnsi
6 Nahalola huje ʉnʼshɨ ʉyo akholiilwe hwa‑amwele idanda lya bhooziwa ni‑idanda lya bhantu ɨbho bhahabudiilwe hu nongwa ya hunʼsimishizye ʉYeesu.
Lwa nanʼnola,
nahaswijile tee.
7 Leelo ʉnʼtumi ahambʉʉzya ahaga,
“Yeenu ʉswiga tee?
Anɨ ɨhubhʉʉzya ɨzya hu mfiso ɨzya nʼshɨ ʉyo nɨ zi‑ikhanu ɨlyo lihunʼnyeemula,
ɨlyɨ matwe pʉnga (7) nɨ mpeeta ishʉmi.
8 Ikhanu ɨlyo wahalilolile lyahali lyʉmi,
leelo ɨshi lifwiye.
Ɨshi lyahayifuma mwi‑iliina ɨlya huzimu,
leelo ʉNgʉlʉbhɨ ahayihuliyazya.
Abhantu bhonti abha mu nsi bhahayiswiga,
ɨbho amataawa gaabho saga gahasimbwilwe mu shitaabu ɨshɨ wʉʉmi afume ɨnsi shɨ‑ɨsɨɨle apelwe.
Bhahayiswiga lwa bhahayihulilola ikhanu ɨlyo,
ɨlyo hu wandilo lyahali lyʉmi,
ɨshi lifwiye,
leelo hu malishilo lyahayizyʉha.
9 Ɨnongwa ɨzi zihwanza ʉmuntu wa‑ali nʼtengamazu.
Amatwe pʉnga (7) ɨgo,
ga magamba pʉnga ɨgo ʉnʼshɨ ʉyo agakhaliiye.
10 Nantele amatwe pʉnga (7) ɨgo,
bhamwɨnɨ pʉnga.
Mu bhamwɨnɨ ɨbho,
bhasaanu bhafwiye,
ʉmwɨnɨ weeka ali alongozya,
ʉwamwabho asɨɨle ahwɨnze,
leelo lwa wɨnza ahayilongozya hu habhaazyo hadoodo.
11 Ikhanu ɨlyo lyahalɨɨho leelo pamandɨ lyahafwa,
yʉ mwɨnɨ ʉwa naana.
Ʉyo yʉ mwɨnɨ mwa bhaala pʉnga (7).
Wope ahayiyaziwa nʉ Ngʉlʉbhɨ.
12 Ɨmpeeta ishʉmi ɨzyo ʉhuzilola,
bhamwɨnɨ ishʉmi ɨbho bhasɨɨle alongozye.
Leelo bhahayipeewa ikhone ɨlya‑alongozye hu habhaazyo hashe peeka ni‑ikhanu ɨlyo.
13 Abhamwɨnɨ ishʉmi ɨbho bhahayɨtɨɨhana hulipeele ikhanu ɨlyo ikhone lyabho na maha gaabho gonti.
14 Bhahayilwa ʉlʉgʉ nʉ Mwana Ngoole,
leelo ʉMwana Ngoole ahayihubhamena,
pɨpo ʉmwene yʉ Nʼgoosi wa bhagoosi,
nantele Mwɨnɨ wa bhamwɨnɨ.
Ʉmwene ahayibha na bhantu bhaakwe ɨbho ahabhakwiziizye na hubhasalule na hubhabhɨɨshe bhabhe bhalʉnjɨsu.”
15 Ʉnʼtumi ahambʉʉzya anɨ nantele,
ahaga,
“Amɨnzɨ ɨgo wahagalolile ɨpo akhɨɨye ʉmwegu ʉla,
mpʉga zya bhantu abhɨ nsi zyonti,
abhɨ vikholo vyonti na bhɨ njango zyonti.
16 Ɨmpeeta ishʉmi ɨzyo wahazilolile ni‑ikhanu liila vyahayihumʼviitilwa ʉnʼshɨ ʉyo ʉmwegu.
Bhahayeega ɨvintu vyonti ɨvyo ali navyo,
bhahayihunʼneha weleele.
Bhahayilya ɨnyama yaakwe na‑apembe amasagalilo mu mwoto.
17 ɄNgʉlʉbhɨ yʉʉyo abhapiiye ɨnjeele yeeka mu mooyo gaabho,
huje bhabhombe ɨgo ahwanza hwi‑idala ɨlya hwɨtɨɨhane peeka hulipeele ikhanu liila ikhone lyabho ɨlya‑alongozye.
Bhahayibhomba ɨsho afishe ɨbhombeshe ɨnsɨɨbho ya Ngʉlʉbhɨ.
18 Ʉnʼshɨ ʉyo wahanʼnolile,
ʉmwene libooma liila igoosi ɨlyo lilongozya abhamwɨnɨ bhonti abha mu nsi zyonti.”