16
Nahʉmvwa izwi igoosi afume mu nyumba ɨmfinjile ɨya Ngʉlʉbhɨ,
lihubhabhʉʉzya abhantumi bhaala pʉnga (7) liyiga ɨshi,
“Bhalaji mwite ɨmbakuuli ɨzyo pʉnga ɨzi‑ilyoyo lya Ngʉlʉbhɨ mu nsi.”
2 Ʉnʼtumi ʉwa hwande ahabhala,
ahiita ɨmbakuuli yaakwe ɨyi‑ilyoyo lya Ngʉlʉbhɨ mu nsi.
Pɨnɨɨpo abhantu bhonti abhɨ shimanyishizyo ɨshi‑ikhanu nɨ‑ɨbho bhahapuutaga ɨshifwani shaakwe bhahakhatwa na malonda amabhiibhi ga gabhabha tee.
3 Ɨpo ʉnʼtumi ʉwa bhɨɨlɨ wope ahiita ɨmbakuuli yaakwe mu nsʉmbi.
Amɨnzɨ gahagaluuhana gahabha nanshi idanda lya muntu wa‑afwiye,
ɨvipelwa vyonti ɨvya mu nsʉmbi vya vyahali vyʉmi,
vyahafwa.
4 Ɨpo ʉnʼtumi ʉwa taatu wope ahiita ɨmbakuuli yaakwe mu masooho na mu mbwiwi,
gope amɨnzɨ gonti gahagaluuhana abhe madanda.
5 Ɨpo nahʉmvwa ʉnʼtumi ʉyo ahagɨmɨlɨɨye amɨnzɨ ahaga ɨshi,
“Wee Mʼfinjile,
aawe ʉlɨɨho,
nantele wahalɨɨho!
Aawe ʉli nʼgolosu,
ʉlonjile ɨzyo hu lyoli.
6 Abhantu abhabhiibhi bhahiitile idanda lya bhooziwa bhaaho na bhakuwi bhaaho,
ɨshi bhope ʉbhapiiye idanda,
bhamwele.
Bhakhondɨɨye abhombelwe ɨsho!”
7 Ɨpo nahʉmvwa izwi afume pa shipuuto liyiga,
“Lyoli,
aawe we Mwɨnɨ ʉNgʉlʉbhɨ ʉwi‑ikhone lyonti!
Ʉlongwe lwaho lwɨ golosu nantele lwɨ lyoli.”
8 Ɨpo ʉnʼtumi ʉwa wunɨ ahiita ɨmbakuuli yaakwe pi‑isanya.
Isanya lyahapeewa ikhone ɨlya hubhooshe abhantu hu mwoto gwakwe.
9 Ɨpo abhantu bhahapya tee ni‑isanya.
Bhahanʼniga ʉNgʉlʉbhɨ,
pɨpo ʉmwene ahali ni‑ikhone hu nongwa yɨ mayɨmba ɨgo.
Leelo saga bhahalaatile awe humʼmwamishe ʉNgʉlʉbhɨ.
10 Ɨpo ʉnʼtumi ʉwa saanu ahiita ɨmbakuuli yaakwe hwi‑itengo ɨlyɨ shimwɨnɨ ɨshi‑ikhanu liila.
Ɨhiisi yahadinda ʉwumwɨnɨ waakwe,
abhantu bhahabha bhahwiluma ɨmɨlɨ zyabho hu nongwa yɨ mavune.
11 Bhahanʼniga ʉNgʉlʉbhɨ ʉwa hu mwanya hu nongwa yɨ mavune gaabho na malonda gaabho.
Leelo saga bhahalaatile hu njendo zyabho ɨmbiibhi.
12 Ɨpo ʉnʼtumi ʉwa nʼtanda wope ahiita ɨmbakuuli yaakwe mwi‑isooho igoosi ɨlyɨ Efulaati.
Gope amɨnzɨ gaakwe gahʉʉma huje idala lilɨngaanywe hwa bhamwɨnɨ afume hu tukulilo.
13 Ɨpo nahalola amapepo gataatu ɨgo gahali nanshi ɨnyʉʉla.
Lyeka lyahafumile mwi‑ilomu li‑izoha liila.
Ipepo ɨlyamwabho lyahafumile mwi‑ilomu li‑ikhanu liila ɨlya hwande,
nɨ lyamwabho lyahafumile mwi‑ilomu li‑ikhanu liila ɨlya bhɨɨlɨ ɨlyo lyahali nʼkuwi ʉwi‑ilenga.a
14 Amapepo ɨgo gahali ni‑ikhone ɨlya‑abhombe amayele.
Ɨgo ga gabhala hwa bhamwɨnɨ bhonti abha mu nsi na hubhabhʉngaanye peeka hu nongwa yɨ lʉgʉ,
mwi‑isiku liila igoosi ɨlyo ʉNgʉlʉbhɨ ʉwi‑ikhone lyonti ahayihubhalonga abhantu bhonti.
15 ɄMwɨnɨ ʉYeesu ayiga,
“Enyaaji!
Nahayɨnza nanshi ʉmwibha sha‑ahwɨnza.
Asayiiwe ʉyo agona maaso na‑akwate amenda gaakwe huje asahaabhale ʉhwo weleele na‑alole ɨnsoni pa pazelu.”
16 Ɨpo amapepo ɨgo gahabhabhʉngaanya abhamwɨnɨ ɨbho nɨ mpʉga ɨzya bhalwi apantu ɨpo bhahagaga Halimagedoni mu njango ɨyɨ Shiebulaniya.
17 Ɨpo ʉnʼtumi ʉwa pʉnga (7) ahiita ɨmbakuuli yaakwe mu mwanya.
Izwi igoosi lyahʉmvwɨha afume pi‑itengo ɨlyɨ shimwɨnɨ mu nyumba ɨmfinjile ɨya Ngʉlʉbhɨ,
lyahaga,
“Ʉmalishilo wufishile!”
18 Hwahabha nɨ ntalala,
izwi,
ɨlyʉngʉmo ni‑intensya igoosi ɨlyɨ nsi,
ɨlyo saga lyahalɨnjɨle afumile nalumo,
afume ʉNgʉlʉbhɨ lwa‑ahapelile ʉmuntu.
19 Ɨpo ibooma ɨlyo igoosi ɨlyɨ Baabeli lyahatapuuhana pataatu.
Amabooma aga bhantu abha mu nsi zyonti gahananjiha gonti.
ɄNgʉlʉbhɨ saga ahɨwɨɨlwe ibooma igoosi ɨlyɨ Baabeli.
Ahalibijiilizya amwelele ʉlupɨndɨ ʉlwɨ divaayi ɨyi‑ilyoyo lyakwe igoosi.
20 Intensya ɨlyo lyahabhombile huje ɨnsi zyonti ɨzya paahati yɨ nsʉmbi ziteeje,
gope amagamba gonti gagandi aloleshe nantele.
21 Ɨmvula ɨyɨ mawe amagoosi yahabhatoonyela abhantu,
shila liwe lyahali nʉ mwamu ʉwɨ kiilo amashʉmi gasaanu ɨshi.
Abhantu bhahanʼniga ʉNgʉlʉbhɨ hu nongwa yɨ mayɨmba agɨ mvula ɨyɨ mawe,
lyoli amayɨmba agɨ mvula ɨyo ɨyɨ mawe gahali magoosi tee.