Ʉluteelo lwa Mwana Ngoole nʉ Moose
15
Ɨpo nahalola ɨshimanyishizyo ɨshɨnjɨ hu mwanya,
ɨsho shigoosi nantele sha‑aswijizye.
Nahabhalolile abhantumi pʉnga (7),
bhahali bhaleeta amayɨmba pʉnga aga hu malishilo.
Amayɨmba ɨgo gabha ga hulilʉnjɨshe ilyoyo lya Ngʉlʉbhɨ.
2 Nantele nahalola ahantu ɨho hahali nanshi ɨnsʉmbi ɨyi‑ilolwe,
ɨyo ɨsangɨɨnywe nʉ mwoto.
Ɨpo panshɨnjɨ nahabhalola abhantu ɨbho bhahali bhalimenile ikhanu liila nɨ shifwani shaakwe nɨ mbaazyo yi‑itaawa lyakwe.
Abhantu ɨbho bhahɨmɨlɨɨye panshɨnjɨ yɨ nsʉmbi ɨyi‑ilolwe,
bhahali nɨ ntonga ɨzyo ʉNgʉlʉbhɨ ahabhapiiye.
3 Bhahali bhateela ʉluteelo lwa Moosea ʉmʼmomvi wa Ngʉlʉbhɨ nʉ lwa Mwana Ngoole,
bhayiga ɨshi,
“Mwɨnɨ Ngʉlʉbhɨ wi‑ikhone lyonti,
ɨmbombo zyaho ngoosi nantele zya‑aswijizye.
Aawe we Mwɨnɨ wɨ nsi zyonti,
na madala gaaho gɨ golosu na gɨ lyoli.
4 Wee Mwɨnɨ,
abhantu bhonti bhahayihutiniha,
nantele bhonti bhahayihumwamiha!
Aawe wʉmwene we mʼfinjile!
Abhantu abhɨ nsi zyonti bhahayihuhwɨnzɨla na hupuute,
pɨpo ɨmbombo zyaho ɨzyɨ golosu ziloleha pa pazelu.”
Ɨmbakuuli pʉnga ɨzi‑ilyoyo lya Ngʉlʉbhɨ
5 Lwa gaashila ɨgo naheenya,
nahalola ɨnyumba ɨmfinjile ɨya Ngʉlʉbhɨ ɨyiguliilwe ʉhwo hu mwanya,
hwa huje isebhele ifinjile.b
6 Abhantumi bhaala pʉnga (7) abhɨ mayɨmba pʉnga bhahafuma ʉmwo.
Bhahali bhakwɨte amenda aminza ga galawuha,
bhahahwipinyile amalamba amababaale agɨ zahaabu pa vifubha vyabho.
7 Ɨpo ʉmo mu vipelwa vinɨ ahamʼpeela shila weeka mu bhantumi bhaala pʉnga (7) ɨmbakuuli ɨyɨ zahaabu ya yahamemile ilyoyo lya Ngʉlʉbhɨ ʉyo alemba wiila na wiila.
8 Muuhati mu nyumba ɨmfinjile ɨya Ngʉlʉbhɨ mwahamemile ilyosi ɨlyo lyahabhombɨɨshe nʉ mwamu wa Ngʉlʉbhɨ ni‑ikhone lyakwe.
Nʉʉmo ʉyo ahabhajiiye atʉʉshe mu nyumba ɨmfinjile ɨya Ngʉlʉbhɨ afishe galʉnjɨshe amayɨmba ɨgo pʉnga (7) aga bhantumi bhaala pʉnga.