ɄMwana Ngoole na bhantu bhaakwe
14
Ɨpo nahanʼnola ʉMwana Ngoole ayɨmɨlɨɨye pa mwanya pi‑igamba ɨlyɨ Sayuuni,
peeka na bhantu ɨlaaki yeeka na mashʉmi ganɨ na zinɨ ɨelufu (144,000).
Abhantu ɨbho bhahali bhasimbwilwe mu vyeni vyabho itaawa ɨlya Mwana Ngoole ni‑itaawa ɨlya Yise waakwe.
2 Nahʉmvwa izwi afume hu mwanya nanshi izwi lyɨ nsalala ɨyɨ mɨnzɨ aminji,
nanshi izwi lyɨ lyʉngʉmo igoosi.
Nantele izwi lyahʉmvwɨha nanshi abhantu bha bhakhoma ɨntonga zyabho peeka.
3 Ɨpo nahalola abhantu ɨlaaki yeeka na mashʉmi ganɨ na zinɨ ɨelufu (144,000) ɨbho bhahali bhɨmɨlɨɨye pitagaalila li‑itengo ɨlyɨ shimwɨnɨ,
na pitagaalila lyɨ vipelwa vinɨ na bhagoosi bhaala amashʉmi gabhɨɨlɨ na bhanɨ.
Bhahali bhateela ʉluteelo ʉlupya,
nʉʉmo ʉwɨnjɨ ʉyo ahabhajiiye amanyile ʉluteelo ʉlwo,
lyoli abhantu ɨbho bhahagomboliilwe afume mu nsi.
4 Abhantu ɨbho bhahanʼnondolezyaga ʉMwana Ngoole hwonti hwa‑abhala.
Ɨbho bha bhɨɨbho saga bhahwibhɨɨshɨle mu weegu,
pɨpo bhahali nanshi abhalɨndu abhaduvya.
Bhahagomboliilwe afume mu bhantu abhanjɨ,
bhope bhahafumiziwa nanshi ɨnsangua ɨzyɨ viyabho ɨvya hwande hwa Ngʉlʉbhɨ nʉ Mwana Ngoole.
5 Bhope saga bhayanga ilenga,
saga bhali nʉ bhiibhi wowonti.
Abhantumi bhataatu bhafumya ɨntumi zya Ngʉlʉbhɨ
6 Ɨpo nahalola ʉnʼtumi ʉwɨnjɨ apuluha paahati pa mwanya.
Ʉnʼtumi ʉyo ahali nɨ Nongwa ɨNyinza ɨzya wiila ɨzya hubhalʉmbɨɨlɨle abhantu ɨbho bhakhala mu nsi,
abhantu abhɨ nsi zyonti,
abhɨ vikholo vyonti na bhɨ njango zyonti.
7 Ɨshi,
ʉnʼtumi ʉyo ahayanga hwi‑izwi igoosi ahaga,
“Munʼtinihaje ʉNgʉlʉbhɨ na humʼmwamishe,
pɨpo ɨsaala yaakwe ɨya hubhalonje ɨfishile.
Mumʼpuutaje ʉyo ahapelile ɨmwanya,
ɨnsi,
ɨnsʉmbi nɨ mbwiwi.”
8 Ʉnʼtumi ʉwɨnjɨ ʉwa bhɨɨlɨ ahalondolezya,
ahaga ɨshi,
“Ʉgwiye!
Ʉgwiye Baabeli,
we libooma ligoosi!
Aawe wahabhombile huje abhantu abhɨ nsi zyonti bhakholwe ɨdivaayi afume hwaliiwe.
Ɨdivaayi ɨyo weegu wa saga wuli nʉ malishilo.”
9 Ʉnʼtumi ʉwɨnjɨ ʉwa taatu ahalondolezya,
ahayanga hwi‑izwi igoosi ahaga,
“Nkashele ʉmuntu ahulipuuta ikhanu ɨlyo nɨ shifwani shaakwe na‑abhɨɨhwe ɨshimanyishizyo hu vyeni vyabho awe mu nyoobhe,
10 ʉmuntu ʉyo ahayimwela ɨdivaayi ɨyi‑ilyoyo lya Ngʉlʉbhɨ.
Ɨdivaayi ɨyo ɨlɨngɨɨnywe sinta asangaanywe na mɨnzɨ,
mu lupɨndɨ lwi‑ilyoyo lyakwe.
Wope ʉNgʉlʉbhɨ ahayihunʼnyɨmvya hu mwoto ʉnʼkhali tee pitagaalila lya bhantumi abhasangalusu na pitagaalila lya Mwana Ngoole.
11 Ilyosi ɨlyɨ mwoto ʉgwo lyahayizʉbha hu mwanya wiila na wiila.
Abhantu ɨbho saga bhahayitʉʉya ʉsiku nʉ sanya,
pɨpo bhahalipuutaga ikhanu ɨlyo nɨ shifwani shaakwe,
nɨ‑ɨbho bhambɨlɨɨye ɨshimanyishizyo ɨshi‑itaawa lyakwe.”
12 Ɨshi,
abhooziwa bhahwanziwa bhajimbiilile.
Ɨbho bha bhɨɨbho bhalondolezya ɨndajizyo zya Ngʉlʉbhɨ na humʼmwɨtɨshe ʉYeesu.
13 Ɨpo nahʉmvwa izwi afume hu mwanya liyiga,
“Simba huje,
bhasayiiwe abhantu bhonti ɨbho bhafwa ahwande ɨshi,
ʉhwu bhamʼmwɨtɨɨshe ʉMwɨnɨ ʉYeesu.”
Ɨpo ʉMʼpepo wa Ngʉlʉbhɨ ahaga,
“Wee,
bhasayiiwe tee.
Bhahayitʉʉya afume mu mbombo zyabho ɨhome,
pɨpo ɨmbombo zyabho ɨnyinza zyahayiizuhwa nʉ Ngʉlʉbhɨ.”
Ɨviyabho ɨvya mu nsi
14 Nahalola nantele,
enya ibhɨngo izelu.
Pa mwanya yi‑ibhɨngo ɨlyo ahali akhɨɨye ʉmuntu nanshi ʉMwana wa Muntu.
Ʉmuntu ʉyo ahali akwɨte ɨshʉʉbhalo ɨshɨ shimwɨnɨ ɨshɨ zahaabu hwi‑itwe lyakwe.
Mu nʼkhono gwakwe ahali akhɨɨte ɨngwedulo ɨnyooji tee.
15 Ɨpo ʉnʼtumi ʉwɨnjɨ ahafuma mu nyumba ɨmfinjile ɨya Ngʉlʉbhɨ,
ahamʼmʉʉzya hwi‑izwi igoosi ʉla wa‑ahali akhɨɨye pa mwanya pi‑ibhɨngo ahaga,
“Ega ɨngwedulo yaaho,
ʉyande avune,
pɨpo ahabhaazyo aha‑avune hafishile,
nantele ɨvya‑avune mu nsi vijinile.”
16 Ɨpo ʉla wa‑ahali akhɨɨye pa mwanya yi‑ibhɨngo ahavuna ɨviyabho vyonti ɨvya mu nsi yonti.
17 Ɨpo ʉnʼtumi ʉwɨnjɨ ahafumila mu nyumba ɨmfinjile ɨya Ngʉlʉbhɨ ʉhwo hu mwanya.
Wope ahali akhɨɨte ɨngwedulo ɨnyooji.
18 Ɨpo ahafumila ʉnʼtumi ʉwɨnjɨ pa shipuuto shiila,
ʉyo ahali ni‑ikhone ɨlya‑ayazye nʉ mwoto.
Hwi‑izwi igoosi ahamʼmʉʉzya ʉnʼtumi wa‑ahali nɨ ngwedulo ɨnyooji ahaga,
“Bhombela ɨngwedulo yaaho ɨnyooji,
ʉdumule ɨnsamba zyɨ mantongooni agɨ zabiibu aga mu nsi yonti,
pɨpo amantongooni gatonile.”
19 Ɨpo ʉnʼtumi wa‑ahali akhɨɨte ɨngwedulo yaakwe ɨnyooji,
ahavuna ɨzabiibu ɨzya mu nsi,
ahaziponya mwi‑ilɨndɨ igoosi ɨlya‑asʉʉyɨle ɨzabiibu.
Ilɨndɨ ɨlyo lilolesya ilyoyo lya Ngʉlʉbhɨ.
20 Bhahasʉʉya ɨzabiibu ɨzyo mwi‑ilɨndɨ ɨlyo lyahali hwʉnzɨ yi‑ibooma.
Zyahafumya idanda,
ni‑idanda ɨlyo lyahabha lwizi lutali.
Ʉtali waakwe wahali ɨkilomeeta ɨmya zitaatu nʉ tali waakwe ʉwa‑abhale pa nsi wahali ɨmeeta yeeka nɨ zya pa mwanya.