Ikhanu ɨlya hwande
13
Ɨpo nahalola ikhanu lifuma mu nsʉmbi.
Lyahali na matwe pʉnga (7) nɨ mpeeta ishʉmi.
Shila mpeeta yahali nɨ nsushe.
Nantele shila litwe lyahali lisimbwilwe itaawa ɨlya hunʼshente ʉNgʉlʉbhɨ.
2 Ikhanu ɨlyo nahalilolile lyahalɨngɨɨne nanshi ɨngooya,
leelo amanama gaakwe gahali nanshi agɨ duubu,
a lyope ilomu lyakwe lyahali nanshi ɨlyɨ nsama.
Izoha liila lyahalipeela ikhanu amaha gaakwe,
peeka ni‑itengo lyakwe ɨlyɨ shimwɨnɨ ni‑ikhone igoosi.
3 Itwe limo ɨli‑ikhanu lyahali ni‑ilonda ibhiibhi tee ɨlyɨ fwe.
Leelo lyahapona!
Abhantu bhonti bhahaswiga na hulilondolezye ikhanu ɨlyo.
4 Abhantu bhahalipuuta izoha ɨlyo,
pɨpo lyahalipiiye ikhanu ɨlyo ikhone lyakwe,
nantele bhahalipuuta ikhanu ɨlyo bhahaga,
“Weenu wa‑alɨngaana nanshi ikhanu ɨli?
Nantele,
weenu ʉyo abhajiiye alwe ʉlʉgʉ nalyo?”
5 Ikhanu lyahɨtɨshɨlwa ayanje amazwi aga hwibaade na hunʼshente ʉNgʉlʉbhɨ.
Nantele lyahapeewa ikhone ɨlya‑alongozye hu meezi amashʉmi ganɨ na gabhɨɨlɨ.b
6 Ikhanu lyahanda hunʼshente ʉNgʉlʉbhɨ na‑alije itaawa lyakwe na paala pa‑akhala na bhonti ɨbho bhakhala hu mwanya.
7 Lyahɨtɨshɨlwa alwe ʉlʉgʉ na bhooziwa na hubhamene.
Nantele lyahapeewa ikhone ɨlya‑alongozye abhantu abhɨ nsi zyonti,
abhɨ vikholo vyonti na bhɨ njango zyonti.
8 Abhantu bhonti abhɨ nsi zyonti bhahayihulipuuta ikhanu ɨlyo.
Lyoli abhantu ɨbho amataawa gaabho gasimbwilwe mu shitaabu ɨshɨ wʉʉmi ɨsha Mwana Ngoole afume hu wandilo ʉwa‑apelwe ɨnsi,
bha bhɨɨbho saga bhahayihulipuuta.
Ɨshitaabu ɨsho sha Mwana Ngoole ʉyo ahabudiilwe.
9 Wa‑ali na makutu,
ayʉmvwaje.
10 Ʉmuntu ʉyo abhɨhwɨlwe anyeetulwe hwi‑ikhone,
ahayinyeetulwa hwi‑ikhone.
Ʉmuntu ʉyo abhɨhwɨlwe agogwe ni‑imaajɨ,
ahayigogwa ni‑imaajɨ.
Ɨshi abhooziwa bhahwanziwa bhajimbiilile na‑abhe nʉ lwɨtɨho.
Ikhanu ɨlya bhɨɨlɨ
11 Nahalola ikhanu ɨlyamwabho lyahafuma mu longo nanshi ɨmfuho.
Ikhanu ɨlyo lyahali nɨ mpeeta zibhɨɨlɨ ɨndoodo nanshi ɨzyɨ nyaana ngoole,
lyahayanga nanshi izoha ɨlyo.
12 Lyahabha libhomba hwi‑ikhone lyonti ɨli‑ikhanu ɨlya hwande hu nongwa yaakwe.
Ɨpo ikhanu ɨlya bhɨɨlɨ ɨlyo lyahabhʉmɨɨlɨzya abhantu bhonti abha mu nsi huje bhalipuutaje ikhanu ɨlyo ɨlya hwande,
ɨlyo ilonda lyakwe ɨlyɨ fwe lyahaponile.
13 Ikhanu ɨlyo ɨlya bhɨɨlɨ lyahabhomba amayelec aga‑aswijizye,
hwope lyahabhomba huje ʉmwoto gwishe afume hu mwanya afishe mu nsi ʉhwu abhantu bhalola.
14 Ahabhagobela bhaala ɨbho bhakhala mu nsi hu mayele gaala ɨgo ahapewiilwe abhombe hu nongwa yi‑ikhanu liila ɨlya hwande.
Lyahabhalajizya huje abhantu bhaligombele ɨshifwani ɨshi‑ikhanu ɨlya hwande hu nongwa ya hulitinishe,
ɨlyo lyahali ni‑ilonda ɨli‑imaajɨ,
leelo lyahajendeelela alembe.
15 Ɨpo ikhanu ɨlya bhɨɨlɨ lyahapeewa ikhone ɨlya‑apuutile ʉmwoyi ʉgwɨ wʉʉmi mu shifwani huje shande ayanje.
Nantele ɨshifwani ɨsho shibhagoje bhonti ɨbho bhakhaana hushipuute.
16 Nantele ikhanu ɨlya bhɨɨlɨ lyahabhʉmɨɨlɨzya abhantu bhonti,
abhagoosi na bhadoodo,
abhatabhazi na bhapɨɨna,
abhasatulwe na bhakalwe,
bhabhɨɨhwe ɨshimanyishizyo mu nyoobhe ɨzya hu lɨɨlo awe mu vyeni vyabho.
17 Nantele lyahalajizya huje ʉmuntu wowonti wa saga ali nɨ shimanyishizyo ɨsho,
asahasheele akale awe akazye.
Ɨshimanyishizyo ɨsho litaawa li‑ikhanu ɨlya hwande,
awe ɨtalakimu zyonti ɨzi‑itaawa lyakwe.d
18 Ɨnongwa ɨzi zihwanza ʉtengamazu.
Wa‑ali nɨ njeele,
abhazyaje ɨmbaazyo yi‑ikhanu ɨlyo,
pɨpo mbaazyo ya muntu ʉmo.
Ɨmbaazyo yaakwe mya nʼtanda na mashʉmi nʼtanda na nʼtanda (666).