Ʉnʼshɨ ni‑izoha
12
Ɨpo ʉhwo hu mwanya hwahafumila ɨshimanyishizyo ɨsha‑aswijizye.
Hwahali nʉ nʼshɨ ʉyo ahakwatiziiwe isanya,
gwope ʉmwezi gwahali pa nsi pa manama gaakwe.
Nantele,
hwi‑itwe lyakwe ahali akwɨte ɨnsushe ɨyɨ shimwɨnɨ ɨyɨ nzota ishʉmi na zibhɨɨlɨ.
2 Ʉnʼshɨ ʉyo ahali nʉ lwanda,
ahalila,
pɨpo ahali nʉ bhaavi ʉwa‑apaape ʉmwana.
3 Ɨpo ʉhwo hu mwanya hwahafumila ɨshimanyishizyo ɨshɨnjɨ ɨsha‑aswijizye.
Enya!
Izoha igoosi ishamamu lyahafumila.
Lyahali na matwe pʉnga (7) nɨ mpeeta ishʉmi,
na shila litwe lyahali nɨ nsushe.
4 Izoha ɨlyo lyahazyʉngʉʉzya ʉlubinda lwakwe,
nʉ lubinda lwahakwesanga ɨshilʉndɨlo sheeka mu vilʉndɨlo vitaatu ɨvyɨ nzota afume hu mwanya na huzilagazye mu nsi.
Izoha lyahɨmɨɨlɨla pitagaalila lya nʼshɨ ʉyo ahali apalamiiye apaape,
huje limʼmile ʉmwana lwa wapaapwa.
5 Ɨpo ʉnʼshɨ ʉyo ahapaapa ʉmwana ʉwɨ shilume.
Ʉmwana ʉyo ahayilongozya ɨvikholo vyonti ɨvya mu nsi hwi‑ikhone igoosi.
Izoha sha lisɨɨle hunʼnie,
ʉmwana ʉyo ahanyeetulwa,
ahatwalwa hwa Ngʉlʉbhɨ na hwi‑itengo lyakwe ɨlyɨ shimwɨnɨ.
6 Ʉnʼshɨ ʉyo ahashɨmbɨɨlɨla hu lʉʉgwa,
apantu ɨpo ʉNgʉlʉbhɨ ahali amʼmɨshɨɨye huje anʼsʉnje hu nsiku ɨelufu yeeka nɨ mya zibhɨɨlɨ na mashʉmi nʼtanda (1,260).a
Ʉlʉgʉ ʉgoosi hu mwanya
7 Ɨpo hwahafumiiye ʉlʉgʉ hu mwanya.
Ʉnʼtumi ʉnʼgoosi,
ʉyo bhahunʼkwizya Mikaeeli,
peeka na bhantumi bhaakwe,
bhahalwa ni‑izoha ɨlyo na bhantumi bhaakwe.
8 Leelo izoha na bhantumi bhaakwe bhahamenwa,
ɨpo bhahashɨmbɨzɨwa afume hu mwanya.
9 ɄMikaeeli na bhantumi bhaakwe bhahalitaaga izoha liila mu nsi peeka na bhantumi bhaakwe.
Izoha ɨlyo yɨ nzoha ɨla ɨyɨ mandɨ,
b ɨlyo nʼnʉgʉ,
nantele yʉ Seetano.
Ahubhagobela abhantu bhonti abha mu nsi huje bhabhombaje ɨmbiibhi.
10 Ɨshi nahʉmvwa izwi igoosi afume hu mwanya liyiga,
“Ɨshi,
ʉNgʉlʉbhɨ weetu abhafyʉlɨle abhantu bhaakwe!
Ɨshi alolesiizye ikhone lyakwe na‑alongozye nanshi ʉmwɨnɨ!
Nantele ʉMʼfyʉli waakwe alolesiizye ikhone lyakwe!
Enya atagwilwe pa nsi ʉNʼneneelezi wa bhooziwa abhamwetu,
ʉmwene ya‑ahabhanenelezyaga hwa Ngʉlʉbhɨ weetu,
ʉsiku nʉ sanya.
11 Ɨshi abhabhomvi abhamwetu bhamʼmenile hwi‑idanda lya Mwana Ngoole,
na hu simishizi ʉwo bhahafumiizye pa pazelu.
Ɨbho saga bhahasajiiye ʉwʉʉmi waabho,
bhahali nzɨɨla afwe hu nongwa ya humʼmwɨtɨshe ʉYeesu.
12 Ɨshi,
seshelaji,
amwɨ mwenti mwa mukhala ʉhwo hu mwanya!
Lwenyu amwɨ mwa mukhala mu nsi na mu nsʉmbi,
pɨpo ʉSeetano atagwilwe pa nsi ɨpo muli amwɨ.
Ɨshi avitiilwe tee,
pɨpo amɨɨnye huje ɨnsiku zyakwe zisyalile nyishe lwene.”
13 Hu habhaazyo ɨho izoha lyahalola huje litagwilwe mu nsi,
lyahamʼvwɨma ʉnʼshɨ ʉla wa‑ahali apɨɨpe ʉmwana ʉwɨ shilume.
14 Leelo ʉNgʉlʉbhɨ ahamʼpiiye ʉnʼshɨ ʉyo amapiho gabhɨɨlɨ agɨ nsimula ɨngoosi,
huje apulushe abhale hu lʉʉgwa ɨpo ʉNgʉlʉbhɨ ahali anʼnɨnganyiziizye huje abhe hutali ni‑izoha.
Ʉhwo ʉNgʉlʉbhɨ anza hunʼsʉnje hu maaha gataatu na meezi nʼtanda.c
15 Izoha lyahafumya amɨnzɨ aminji nanshi isooho afume mwi‑ilomu lyakwe huje gamʼmweje ʉnʼshɨ ʉyo na hunʼdwibhizye.
16 Leelo ɨnsi yahamʼmwavwa ʉnʼshɨ ʉyo,
yahaasama nanshi ilomu,
yahamila amɨnzɨ gaala gonti afume mwi‑ilomu li‑izoha.
17 Izoha lyahamʼviitilwa tee ʉnʼshɨ ʉyo,
lyahabhala alwe na bhaana bhaakwe abhanjɨ ɨbho bhahasyalile.
Abhaana ɨbho bha bhɨɨbho bhahuzitiniha ɨndajizyo zya Ngʉlʉbhɨ na hunʼsimishizye ʉYeesu ʉKilisiti.
18 Ɨpo izoha lyahɨmɨɨlɨla panshɨnjɨ pa nsʉmbi.