Abhasimishizi bhabhɨɨlɨ
11
Ɨpo nahapeewa ilanzi ɨlyo lyahali nanshi ɨndɨɨsa ɨya hwolele.
Nahabhʉʉzɨwa ɨshi,
“Bhala,
ʉyoole ɨnyumba ɨmfinjile ɨya Ngʉlʉbhɨ nɨ shipuuto shaakwe,
ʉbhabhaazye abhantu bhonti ɨbho bhapuuta ʉmwo.
2 Leelo ʉsahoole ʉlubhʉngʉlʉ ʉlwɨ nyumba ɨmfinjile ɨya Ngʉlʉbhɨ,
pɨpo ʉlubhʉngʉlʉ ʉlwo bhapewiilwe abhantu ɨbho saga bhamʼmwɨtɨɨshe ʉNgʉlʉbhɨ.
Bhope bhahayinangaanya ibooma ifinjile hu habhaazyo ahɨ meezi amashʉmi ganɨ na gabhɨɨlɨ.a
3 Nanɨ nahayihubhasonteelezya abhasimishizi bhaanɨ bhabhɨɨlɨ,
nahayihubhapeela ikhone ɨlya‑afumye ʉkuwi ɨnsiku ɨelufu yeeka nɨ mya zibhɨɨlɨ na mashʉmi nʼtanda (1,260).
b Bhahayikwata amenda agɨ magunila alolesye ʉzugumizu.”
4 Abhasimishizi ɨbho bhabhɨɨlɨ ga mizeyituuni gabhɨɨlɨ nɨ mbeeje zibhɨɨlɨ ɨzya‑abhɨɨshɨle ɨkolobooyi,
ɨvyo vilɨɨho pitagaalila lya Mwɨnɨ ʉNgʉlʉbhɨ ʉyo alongozya ɨnsi.c
5 Nkashele ʉmuntu ahwanza hubhavwalazye,
ʉmwoto gwahayifumaga mu malomu gaabho na hubhavwalazye abhalʉgʉ bhaabho.
Ɨsho sha shɨɨsho ʉmuntu wowonti ʉyo ahwanza hubhavwalazye ahayifwa.
6 Abhasimishizi bhabhɨɨlɨ ɨbha bhahayibha ni‑ikhone ɨlya‑adinde ɨmwanya,
huje ɨmvula ɨgandi atoonye hu nsiku ɨzyo abheene bhafumya ʉkuwi.
Nantele bhahayibha ni‑ikhone ɨlya‑agalulanye amɨnzɨ gabhe lidanda,
na‑aleete amayɨmba agɨ waaji nʉ waaji mu nsi nanshi sha bhahayanza.
7 Lwa bhaamala afumye ʉsimishizi waabho,
ikhanu ɨlyo lya lifuma mwi‑iliina ɨlya huzimu lyahayilwa nabho,
lyope lyahayihubhamena na hubhagoje.
8 Amavimba gaabho gahayibha mwi‑idala igoosi ɨli‑ibooma igoosi.
Ɨpo pa pɨɨpo bhahanʼkhomelɨɨye pa shikhobheehanyo ʉMwɨnɨ waabho.
Ibooma ɨlyo lili nɨ njendo nanshi ibooma ɨlyɨ Sodoma awe ɨnsi ɨyɨ Miisili.
9 Abhantu abhɨ vikholo vyonti,
abhɨ njango zyonti na bhɨ nsi zyonti,
bhahayɨnza hugeenye amavimba gaabho hu nsiku zitaatu na masaala ishʉmi na gabhɨɨlɨ.
Nʉʉmo ʉmuntu ʉyo ahayɨtɨshɨlwa asyɨle amavimba ɨgo.
10 Abhantu bha bhakhala mu nsi bhahayiseshela,
bhahayiluluutila na‑apeelane ɨmpeesya hu fwe ʉwa bhasimishizi ɨbho bhabhɨɨlɨ.
Bhahayibhomba ɨsho,
pɨpo abhakuwi ɨbho bhahabhatamiizye tee abhantu abha mu nsi.
11 Leelo lwa zyashila ɨnsiku zitaatu ɨzyo peeka na masaala ishʉmi na gabhɨɨlɨ ɨgo,
ʉmwoyi ʉgwo gufumile hwa Ngʉlʉbhɨ gwahayihubhatʉʉha abhakuwi ɨbho,
ɨpo abheene bhahayɨmɨɨlɨla.
Abhantu lwa bhahayilola huje bhazyʉshɨle,
bhahayoogopa tee.
12 Ɨpo abhasimishizi ɨbho bhabhɨɨlɨ bhahayʉmvwa izwi igoosi afume hu mwanya liyiga,
“Zʉbhaji ʉhwu!”
Bhope bhahayizʉbha abhale hu mwanya mwi‑ibhɨngo,
ʉhwu abhalʉgʉ bhaabho bhahubheenya.
13 Hu habhaazyo ɨho,
hwahayibha intensya igoosi,
ɨmbali yeeka mu mbali ishʉmi ɨzi‑ibooma yahayibhuguha.
Abhantu ɨelufu pʉnga (7,000) bhahayifwa ni‑intensya ɨlyo.
Ɨbho bhahayisyala bhahayoogopa tee,
bhahayihumʼmwamiha ʉNgʉlʉbhɨ ʉwa hu mwanya.
14 Amayɨmba aga bhɨɨlɨ gashilile,
amayɨmba aga taatu gapalamiiye ahwɨnze.
Ʉnʼtumi ʉwa pʉnga akhoma ɨndudwe yaakwe
15 Wope ʉnʼtumi ʉwa pʉnga (7) ahakhoma ɨndudwe yaakwe.
Ɨpo nahʉmvwa amazwi amagoosi ʉhwo hu mwanya gayiga,
“Ʉlongozi wɨ nsi
wabha mu nʼkhono gwa Mwɨnɨ ʉNgʉlʉbhɨ weetu,
nʉ Mʼfyʉlid waakwe,
ʉyo anʼsaluuye hubhafyʉle abhantu.
Wope ʉNgʉlʉbhɨ ahayilongozya wiila na wiila.”
16 Ɨpo abhagoosi amashʉmi gabhɨɨlɨ na bhanɨ,
ɨbho bhahali bhakhɨɨye mu matengo gaabho agɨ shimwɨnɨ pitagaalila lya Ngʉlʉbhɨ,
bhahagwa kupama,
bhahamʼmwamiha ʉNgʉlʉbhɨ,
17 bhahaga,
“Tihusalifya aawe Mwɨnɨ Ngʉlʉbhɨ ʉwi‑ikhone lyonti,
aawe ʉlɨɨho nantele wahalɨɨho,
pɨpo ʉlolesiizye ikhone lyaho igoosi
na hwande alongozye.
18 Abhantu ɨbho saga bhahahwɨtɨɨshe,
bhahaviitwa,
leelo ahabhaazyo aha hubhaweezezye abhantu ʉbhiibhi hafishile.
Ahabhaazyo hafishile aha‑alonje ɨbho bhahafwiye,
na hubhasombe ɨmpeesya abhabhomvi bhaaho abhakuwi,
na bhantu bhaaho bhonti ɨbho bhahutiniha,
abhagoosi na bhadoodo.
Nantele ahabhaazyo hafishile aha hubhayazye
ɨbho bhanangaanya ɨnsi.”
19 Ɨpo ɨnyumba ɨmfinjile ɨya Ngʉlʉbhɨ ɨyo ɨli hu mwanya yahiiguha.
Ipogooso ɨlya Ngʉlʉbhɨ ɨli‑ilaganoe lyahaloleha mu nyumba ɨyo.
Hwahabha nɨ ntalala,
izwi,
ɨlyʉngʉmo,
intensya nɨ mvula ɨngoosi tee ɨyɨ mawe.