Ʉnʼtumi wa‑ali nɨ shitaabu ɨshidoodo
10
Ɨpo nahanʼnola ʉnʼtumi ʉwɨnjɨ wa‑ali ni‑ikhone ahwiha afume hu mwanya.
Ʉnʼtumi ʉyo ahazyʉngʉlɨɨlwe na mabhɨngo,
nantele ʉtalambo ʉlwɨ mvula lwahali pa mwanya yi‑itwe lyakwe.
Ɨsheeni shaakwe shahalawuuhaga nanshi isanya,
amanama gaakwe gahali nanshi amanyooha ɨgo gahwaha ʉmwoto.
2 Mu nʼkhono gwakwe ahali akhɨɨte ɨshitaabu ɨshidoodo ɨsho shiguliilwe.
Ahɨmɨlɨɨye ɨshinama ɨsha hu lɨɨlo mu nsʉmbi nɨ shinama ɨsha hu mongo mu nsi ɨnyʉʉmu.
3 Ahakwizya hwi‑izwi igoosi nanshi ɨnsama ɨyo ɨbhʉna.
Lwa wakwizya,
amʉngʉmo pʉnga (7) gahʉmvwɨha.
4 Amʉngʉmo pʉnga (7) lwa gʉmvwɨha,
nahanzaga asimbe,
leelo nahʉmvwa izwi afume hu mwanya liyiga,
“Amazwi ɨgo agɨ mʉngʉmo,
ʉgandi asimbe!
Gɨ mfiso!”
5 Ɨpo ʉnʼtumi ʉyo nahanʼnolile ayɨmɨlɨɨye ɨshinama sheeka mu nsʉmbi nɨ shɨnjɨ mu nsi ɨnyʉʉmu,
ahabhʉʉsya ʉnʼkhono gwakwe ʉgwɨ lɨɨlo hu mwanya.
6 Ahalapa hwi‑itaawa lya Ngʉlʉbhɨ wa‑ali mwʉmi wiila na wiila,
ʉyo ahapelile ɨmwanya,
ɨnsi,
ɨnsʉmbi nɨ vipelwa vyonti vya vili muuhati yaabho.
Ʉnʼtumi ahaga ɨshi,
“Ahabhaazyo aha‑agʉʉle hashilile.
7 Leelo hu habhaazyo ɨho ʉnʼtumi ʉwa pʉnga (7) lwa‑ahayikhoma ɨndudwe yaakwe,
ʉNgʉlʉbhɨ ahayibhomba ɨnsɨɨbho yaakwe ɨya hu mfiso.
Yahayibhombeha nanshi ɨsho ahabhabhʉzɨɨzye abhakuwi abhabhomvi bhaakwe.”
8 Ɨpo izwi liila ɨlyo nahʉmvwɨzye afume hu mwanya lyahaga ɨshi,
“Bhala,
ʉyeeje ɨshitaabu shiila ɨshidoodo ɨsho shiguliilwe mu nʼkhono gwa nʼtumi ʉla,
ʉyo ayɨmɨlɨɨye ɨshinama ɨsha hu lɨɨlo mu nsʉmbi nɨ shɨnjɨ mu nsi ɨnyʉʉmu.”
9 Ɨpo nahabhala hwa nʼtumi ʉla nahamʼmʉʉzya huje,
ampeele ɨshitaabu ɨshidoodo ɨsho.
Ahambʉʉzya ahaga,
“Ʉsheeje ɨshitaabu na‑alye.
Nkashele waalya,
shɨnza‑abhe shinza nanshi ʉwʉʉshi mwi‑ilomu,
leelo mu vyanda shɨnza hupeele ʉbhaavi.”
10 Naheega ɨshitaabu ɨshidoodo ɨsho shahali mu nʼkhono gwa nʼtumi ʉyo,
nahalya.
Shahali shinza nanshi ʉwʉʉshi mwi‑ilomu lyanɨ,
leelo lwa nashimila,
shahabha shikhali mu vyanda vyanɨ.
11 Ɨpo bhahambʉʉzya bhahaga,
“Ʉhwanziwa afumye ʉkuwi nantele hu nongwa yɨ vikholo ɨvinji,
ɨnsi ɨnyinji,
ɨnjango ɨnyinji na bhamwɨnɨ abhinji.”