Ʉnʼtumi ʉwa saanu akhoma ɨndudwe yaakwe
9
Wope ʉnʼtumi ʉwa saanu ahakhoma ɨndudwe yaakwe.
Ɨpo nahalola ɨntondwe afume hu mwanya ɨgwiye mu nsi.
Ɨntondwe ɨyo yahapeewa ɨnyigulilo ɨyi‑iliina ɨlya huzimu.a
2 Ɨntondwe ɨyo yahiigula iliina ɨlya huzimu,
ilyosi lyahafuma afume mwi‑iliina liila,
nanshi ilyosi li‑itanuli igoosi tee.
Ɨpo isanya na mabhɨngo saga vyahaloleha hu nongwa yi‑ilyosi ɨlyo.
3 Ɨpo mwi‑ilyosi ɨlyo zyahafumila ɨnzije ɨzyo zyahazyambaana mu nsi,
zyahapeewa ikhone ɨlya‑alume nanshi ɨnkoonya.
4 Ɨnzije ɨzyo zyahalajiziiwe huje zigandi anangaanye amasole,
awe amatʉndʉ,
awe amakwi gogonti,
leelo zibhavwalazye abhantu ɨbho saga bhali nɨ shimanyishizyo ɨsha Ngʉlʉbhɨ mu vyeni.b
5 Nantele ɨnzije zyahabhʉzɨɨwe huje zisahaabude abhantu ɨbho,
lyoli zibhayɨmvye hu meezi gasaanu lwene.
Ʉbhaavi waabho wahali nanshi ʉbhaavi ʉwa muntu ʉyo alumwilwe nɨ nkoonya.
6 Ɨnsiku ɨzyo abhantu bhahayiga hwashi afwe,
leelo saga bhahayifwa.
Bhahayisʉngwa afwe,
leelo ʉfwe wahayihubhashɨmbɨla.
7 Amabɨlɨ agɨ nzije ɨzyo gahali nanshi ɨfalaasi ɨzyo zibhɨhwɨlwe nzɨɨla abhale hu lʉgʉ.
Hu matwe gaabho pahali nɨ vintu nanshi ɨvyʉbhalo ɨvyɨ shimwɨnɨ ɨvyɨ zahaabu.
Nantele ɨvyeni vyabho vyahali vilɨngaana nanshi ɨvyeni vya bhantu.
8 Ɨnzije ɨzyo zyahali ni‑isisi itali nanshi ɨlya bhashɨ,
gope amiino gaabho gahali nanshi amiino gɨ nsama.
9 Pa vifubha vyabho zyahali zikwɨte ɨnkwela nanshi ɨzyɨ jela.
Amapiho gaabho gahʉmvwɨha nanshi izwi lyɨ magaali agɨ falaasi ɨgo gashɨmbɨla abhale hu lʉgʉ.
10 Ɨmbinda zyabho zyahali na mimvwa nanshi sha zili ɨnkoonya.
Mu mbinda ɨzyo mwahali nʉ kʉʉla ʉwa‑avwalazye abhantu hu meezi gasaanu.
11 Bhahali nʉ mwɨnɨ ʉyo ahali nʼtumi nʼgoosi wa huzimu.
Mu njango ɨyɨ Shiebulaniya itaawa lyakwe bhahunʼkwizya Abadooni na mu njango ɨyɨ Shiyunaani bhahunʼkwizya Apoliyooni,
hwa huje Nʼgoji.
12 Enya,
amayɨmba aga hwande gashilile,
gasagɨɨye amayɨmba aganjɨ gabhɨɨlɨ ɨgo gahwɨnza.
Ʉnʼtumi ʉwa nʼtanda akhoma ɨndudwe yaakwe
13 Wope ʉnʼtumi ʉwa nʼtanda ahakhoma ɨndudwe yaakwe.
Ɨpo nahʉmvwa izwi liyanga afume mu mpeeta ziila zinɨ ɨzyɨ shipuuto ɨshɨ zahaabu ɨsho shili pitagaalila lya Ngʉlʉbhɨ.
14 Izwi ɨlyo lyahamʼmʉʉzya ʉnʼtumi ʉwa nʼtanda ʉyo ali nɨ ndudwe mu nʼkhono huje,
“Bhigulile abhantumi bhanɨ ɨbho bhakʉngwɨlwe mwi‑isooho igoosi ɨlyɨ Efulaati.”
15 Ɨpo bhahigulilwa,
huje bhagoje ɨmbali yeeka mu mbali zitaatu ɨzya bhantu bhonti mu nsi.
Abhantumi ɨbho bhanɨ bhahali bhabhɨhwɨlwe nzɨɨla abhombe ɨgo hu saala yɨɨyo ɨyi‑isiku lyɨlyo ɨlyɨ mwezi gwʉgwo ʉgwɨ mwaha gwʉgwo.
16 Bhahɨnza abhalwi bhabhinji ɨbho bhahali bhakhɨɨye pa mwanya pa falaasi.
Nahʉmvwa huje bhahali ɨmiliyooni ɨmya zibhɨɨlɨ (200,000,000).
17 Mu ndoleshelo ɨyo nahazilolile ɨfalaasi na bhalwi bha bhahali bhakhɨɨye pa mwanya yaabho.
Pa vifubha vyabho bhahali bhakwɨte ɨnkwela,
ɨnkwela ɨzyo zyahali nshamamu,
mbuluulu nantele mpʉʉtɨla.
Nantele amatwe gɨ falaasi gahali nanshi amatwe gɨ nsama.
Mu malomu gɨ falaasi ɨgo,
hwahafuma ʉmwoto,
ilyosi nʉ bhusu ʉwɨ shibiliiti.
18 Ʉmwoto,
ilyosi nʉ bhusu ʉwɨ shibiliiti,
ga mayɨmba ɨgo gataatu ɨgo gahafumile mwi‑ilomu lyɨ falaasi,
gahagoga ɨmbali yeeka mu mbali zitaatu ɨzya bhantu.
19 Ikhone ɨlyɨ falaasi ɨzyo lyahali hu malomu na hu mbinda zyabho.
Ɨmbinda zyabho zyahali na matwe nanshi ɨnzoha ɨzya‑avwalazye abhantu.
20 Abhantu ɨbho saga bhahafwiye hu mayɨmba ɨgo bhahakhaana alaate ɨmbiibhi zyabho.
Leelo bhahajendeelela hubhapuute abhangʉlʉbhɨ nɨ vifwani ɨvyɨ zahaabu,
ɨvifwani ɨvyɨ mpɨɨya,
ɨvifwani ɨvyɨ shaaba,
ɨvifwani ɨvyɨ mawe nɨ vifwani ɨvyɨ mbaabho.
Ɨvifwani ɨvyo saga vilola,
awe ahwʉmvwe,
awe ajende.
21 Nantele saga bhahalaatile na‑aleshe ʉgoji waabho,
awe ʉlozi waabho,
awe ʉweegu waabho,
awe ʉwiibha waabho.