ɄMwana Ngoole ahwalula ɨshimanyishizyo ɨsha pʉnga
8
ɄMwana Ngoole ʉyo ahaalula ʉlimbo ʉwɨ shifundishilo ɨsha pʉnga (7),
hwahabha myɨ hu mwanya hu habhaazyo ahɨ nusu lisaala ɨshi.
2 Ɨpo nahabhalola abhantumi pʉnga (7) bhahwɨmɨɨlɨla pitagaalila lya Ngʉlʉbhɨ,
shila ʉmo ahapeewa ɨndudwe.
3 Ʉnʼtumi ʉwɨnjɨ ahɨnza,
ahɨmɨɨlɨla pitagaalila lyɨ shipuuto.
Ʉnʼtumi ʉyo ahali akhɨɨte ɨmbakuuli ɨyɨ zahaabu ɨya‑asushizye vya vinunshila.
Ahambɨɨlɨla vya vinunshila ɨvinji,
huje avyefwe peeka nɨ mpuuto ɨzya bhooziwa bhonti pa shipuuto ɨshɨ zahaabu ɨsho shili pitagaalila li‑itengo ɨlyɨ shimwɨnɨ.
4 Ilyosi ɨlyɨ vintu ɨvya‑anunshile lyahazʉbha hwa Ngʉlʉbhɨ peeka nɨ mpuuto ɨzya bhooziwa afume mu nyoobhe ya nʼtumi.
5 Ɨpo ʉnʼtumi ʉyo aheega ɨmbakuuli yaakwe,
ahamemya ʉmwoto ʉgwa pa shipuuto,
ahavuguzya mu nsi.
Hwahafumila ɨlyʉngʉmo,
izwi,
ɨntalala ni‑intensya ɨlyɨ nsi.
Abhantumi bhanɨ bhakhoma ɨndudwe zyabho
6 Ɨpo abhantumi bhaala pʉnga (7) ɨbho bhahali nɨ ndudwe pʉnga,
bhahahwilɨngaanya huje bhakhome ɨndudwe zyabho.
7 Ʉnʼtumi ʉwa hwande ahakhoma ɨndudwe yaakwe.
Ɨpo ɨmvula ɨyɨ mawe nʉ mwoto ɨvyo visangɨɨne ni‑idanda vyahataagwa mu nsi.
Ʉmwoto ʉgwo gwahapemba ɨmbali yeeka mu mbali zitaatu ɨzyɨ nsi,
gwahalʉngʉlɨzya amakwi na masole ɨmbali ɨyo.
8 Ʉnʼtumi ʉwa bhɨɨlɨ wope ahakhoma ɨndudwe yaakwe.
Ɨpo ahantu hahataagwa mu nsʉmbi ɨho hahali nanshi igamba igoosi tee ɨlyo lihwaha ʉmwoto.
Ɨpo ɨmbali yeeka mu mbali zitaatu ɨzyɨ nsʉmbi yahabha lidanda.
9 Ɨmbali ɨmo mu mbali zitaatu ɨzyɨ vipelwa ɨvyo vyahali nʉ wʉʉmi mu nsʉmbi yahayaziwa.
Nantele ɨmbali yeeka mu mbali zitaatu ɨzyɨ meeli ɨzya mu nsʉmbi yahayaziwa.
10 Ʉnʼtumi ʉwa taatu wope ahakhoma ɨndudwe yaakwe.
Ɨpo ɨntondwe ɨngoosi tee ɨyo ɨhwaha nanshi ʉlukhozyo yahagwa afume hu mwanya.
Yahagwɨla ɨmbali yeeka mu mbali zitaatu ɨzyɨ masooho nɨ mbali yeeka mu mbali zitaatu ɨzyɨ mbwiwi.
11 Itaawa ɨlyɨ ntondwe ɨyo lyahakwiziwaaga Bhaavi.
Ɨpo ɨmbali yeeka mu mbali zitaatu ɨzyɨ mɨnzɨ yahagaluuhana abhe nʉ bhaavi.
Abhantu abhinji bhahafwa hu nongwa ya huje bhahamwelile amɨnzɨ ga gahali nʉ bhaavi.
12 Ʉnʼtumi ʉwa wunɨ wope ahakhoma ɨndudwe yaakwe.
Ɨpo ɨmbali yeeka mu mbali zitaatu ɨzi‑isanya,
ɨzyɨ mwezi nɨ zyɨ nzota zyahakhomwa huje zibhe nɨ hiisi.
Ɨpo ɨmbali yeeka mu mbali zitaatu ɨzya pasanya yahabha nɨ hiisi,
nantele ɨmbali yeeka mu mbali zitaatu ɨzya nʉsiku yope yahabha nɨ hiisi.
13 Ɨpo naheenya na hwʉmvwe ɨnsimula ɨmo ɨpuluha hu mwanya.
Ɨnsimula ɨyo yahabwaga ibwago yahaga,
“Lwenyu!
Lwenyu!
Lwenyu amwɨ mwa mukhala mu nsi,
hu nongwa yi‑izwi ɨlyɨ ndudwe ɨzyo zisyalile ɨzya bhantumi bhataatu,
ɨbho bhali nzɨɨla huzikhome!”