Abhantu bha Ngʉlʉbhɨ bhabhɨɨhwa ɨvimanyishizyo
7
Lwa gaashila ɨgo,
nahalola abhantumi bhanɨ bhɨmɨlɨɨye ɨmbali zinɨ ɨzyɨ nsi.
Abhantumi ɨbho bhahali bhazijila ɨnkʉngʉ afume ɨmbali zyonti zinɨ ɨzyɨ nsi,
huje ɨgandi avugule mu nsi ɨnyʉʉmu,
awe mu nsʉmbi,
awe mwi‑ikwi lyolyonti.
2 Abhantumi ɨbho bhahali bhapewiilwe ikhone ɨlya‑anangaanye ɨnsi ɨnyʉʉmu nɨ nsʉmbi.
Ɨpo nahanʼnola ʉnʼtumi ʉwɨnjɨ azʉbha afume hu tukulilo ʉwi‑isanya ali nɨ shimanyishizyo sha Ngʉlʉbhɨ wa‑ali mwʉmi.
Ahabhakhajila hwi‑izwi igoosi abhantumi ɨbho bhanɨ,
3 ahaga,
“Mugandi anangaanye ɨnsi ɨnyʉʉmu,
awe ɨnsʉmbi,
awe amakwi,
afishe ɨpo tibhabhɨɨshe ɨshimanyishizyo mu vyeni vya bhabhomvi bhonti abha Ngʉlʉbhɨ weetu.”
4 Ɨpo nahabhʉʉzɨwa ʉwinji wa bhantu ɨbho bhahali bhabhɨhwɨlwe ɨvimanyishizyo afume mu vikholo vyonti ishʉmi na vibhɨɨlɨ ɨvya Bhaizilaeeli,
bhahali ɨlaaki yeeka na mashʉmi ganɨ na zinɨ ɨelufu (144,000).
5 Abhantu ɨbho bhahali bhabhɨhwɨlwe ɨshimanyishizyo afume mu shikholo ɨsha Yuuda bhahali ɨelufu ishʉmi na zibhɨɨlɨ (12,000),
abhɨ shikholo ɨsha Luubeni bhahali ɨelufu ishʉmi na zibhɨɨlɨ,
abhɨ shikholo ɨsha Gaadi bhahali ɨelufu ishʉmi na zibhɨɨlɨ.
6 Abhɨ shikholo ɨsha Aasheli bhahali ɨelufu ishʉmi na zibhɨɨlɨ (12,000),
abhɨ shikholo ɨsha Nafutaali bhahali ɨelufu ishʉmi na zibhɨɨlɨ,
abhɨ shikholo ɨsha Manase bhahali ɨelufu ishʉmi na zibhɨɨlɨ.
7 Abhɨ shikholo ɨsha Siimoni bhahali ɨelufu ishʉmi na zibhɨɨlɨ (12,000),
abhɨ shikholo ɨsha Laawi bhahali ɨelufu ishʉmi na zibhɨɨlɨ,
abhɨ shikholo ɨsha Isakaali bhahali ɨelufu ishʉmi na zibhɨɨlɨ.
8 Abhɨ shikholo ɨsha Zabulooni bhahali ɨelufu ishʉmi na zibhɨɨlɨ (12,000),
abhɨ shikholo ɨsha Yoosefu bhahali ɨelufu ishʉmi na zibhɨɨlɨ na bhɨ shikholo ɨsha Benjamiini bhahali ɨelufu ishʉmi na zibhɨɨlɨ ɨbho bhahali bhabhɨhwɨlwe ɨshimanyishizyo.
Ɨmpʉga ɨngoosi ɨya bhantu abhɨ vikholo vyonti
9 Lwa gaashila ɨgo,
nahalola ɨmpʉga ɨngoosi tee ɨya bhantu ɨyo nʉʉmo wa‑abhajiiye huyibhaazye.
Abhantu abhɨ nsi zyonti,
abhɨ vikholo vyonti na bhɨ njango zyonti bhahali bhɨmɨlɨɨye pitagaalila li‑itengo ɨlyɨ shimwɨnɨ na pitagaalila lya Mwana Ngoole.
Ɨbho bhahali bhakwɨte amenda amazelu,
nantele bhahali bhakhɨɨte ɨnsamba ɨzyɨ manshindo.
10 Bhahayanga hwi‑izwi igoosi bhahaga,
“Ʉfyʉli wufuma hwa Ngʉlʉbhɨ weetu,
ʉyo akhɨɨye pi‑itengo ɨlyɨ shimwɨnɨ,
na‑afume hwa Mwana Ngoole.”
11 Abhantumi bhonti bhahali bhɨmɨlɨɨye azyʉngʉʉle itengo ɨlyɨ shimwɨnɨ,
abhagoosi bhaala nɨ vipelwa viila vinɨ.
Bhahagwa kupama pitagaalila li‑itengo ɨlyo,
bhahamʼpuuta ʉNgʉlʉbhɨ,
12 bhahaga,
“Aameni!
Wee Ngʉlʉbhɨ weetu,
tihusʉmba,
tihumwamiha,
tihusalifya,
nantele ʉtengamazu,
ɨnshɨnshɨ ni‑ikhone na maha
vyaho wiila na wiila.
Aameni!”
13 Ʉmo mwa bhagoosi bhaala ahambʉzɨɨlɨzya ahaga,
“Abhantu ɨbho bhakwɨte amenda amazelu bha naanu?
Bhafumile hwoshi?”
14 Nahamʼmwamula nahaga,
“Wee mwɨnɨ,
aawe ʉmɨɨnye.”
Ɨpo ʉmwene ahaga,
“Ɨbha bha bhantu ɨbho bhafumile hu mayɨmba amagoosi.
Bhakhanzile amenda gaabho hwi‑idanda lya Mwana Ngoole,
gope gahabha mazelu tee.
15 Ɨyo yɨ nongwa bhali pitagaalila li‑itengo ɨlyɨ shimwɨnɨ lya Ngʉlʉbhɨ.
Bhahumʼmombela pasanya na nʉsiku mu nyumba ɨmfinjile ɨya Ngʉlʉbhɨ.
Wope ʉyo akhɨɨye pi‑itengo ɨlyɨ shimwɨnɨ,
ahayibha peeka nabho na hubhalɨndɨɨlɨle.
16 Saga bhahayilola ɨnzala awe ɨnyoota dumu,
nantele isanya saga lyahayihubhoosha awe ilyoto lyolyonti.
17 Yahayibha ɨsho,
pɨpo ʉMwana Ngoole paala pa pɨɨpɨ ni‑itengo ɨlyɨ shimwɨnɨ ahayibha nʼdiimi waabho.
Ahayihubhalongozya bhonti abhale pa mbwiwi ɨyɨ mɨnzɨ agɨ wʉʉmi ʉwa wiila na wiila.
Wope ʉNgʉlʉbhɨ ahayihubhasyʉmʉla amansozi gaabho gonti.”