ɄMwana Ngoole ahwalula ɨvimanyishizyo ɨvyɨ limbo
6
Ɨpo nahanʼnola ʉMwana Ngoole ahwalula ʉlimbo ʉwɨ shifundishilo sheeka mu viila pʉnga (7).
Nahʉmvwa ɨshipelwa sheeka mu vipelwa vinɨ shiyanga nanshi izwi ɨlyɨ lyʉngʉmo,
shiyiga,
“Ɨnzaga!”
2 Nahayilola ɨfalaasi ɨnzelu nʉ muntu akhɨɨye pa mwanya yaakwe.
Ʉmuntu ʉyo ahali nɨ ndaabi,
wope ahali apewiilwe ɨshʉʉbhalo ɨshɨ shimwɨnɨ.
Ɨpo ahafuma hu mwanya lwa‑ali atolile ʉlʉgʉ nantele huje ajendeelele atole.
3 Ɨpo ʉMwana Ngoole ʉyo ahaalula ʉlimbo ʉwɨ shifundishilo ɨsha bhɨɨlɨ.
Ɨpo nahʉmvwa ɨshipelwa ɨsha bhɨɨlɨ shiyiga,
“Ɨnzaga!”
4 Ɨpo pahafumila ɨfalaasi ɨyɨnjɨ ɨnshamamu tee.
Nʉ‑ʉla wa‑ahali ahuyijenzya,
ahapeewa ikhone ɨlya hwefwe ʉtengaanu mu nsi,
huje abhantu bhagogane,
wope ahapeewa ipanga igoosi.
5 ɄMwana Ngoole ʉyo ahaalula ʉlimbo ʉwɨ shifundishilo ɨsha taatu,
nahʉmvwa ɨshipelwa shiila ɨsha taatu shiyiga,
“Ɨnzaga!”
Naheenya,
nahalola ɨfalaasi ɨnyiilu.
Ʉmuntu ʉyo ahali akhɨɨye pa mwanya yaakwe ahali nɨ nsekeelo mu nyoobhe zyakwe.
6 Nahʉmvwa izwi nanshi ɨlya muntu paahati yɨ vipelwa viila vinɨ,
liyanga liyiga,
“Ɨndonya yeeka ɨyɨ bhusu ʉwɨ ngano yahakalwaga hu mʼposheelo ʉgwi‑isiku lyeka,
nɨ ndonya zitaatu ɨzyɨ bhusu ʉwɨ ngongiiwe zyahakalwaga hu mʼposheelo ʉgwi‑isiku lyeka,
leelo ʉsahabhombele ɨmbiibhi ɨnyemba awe ɨdivaayi.”a
7 ɄMwana Ngoole ʉyo ahaalula ʉlimbo ʉwɨ shifundishilo ɨsha wunɨ,
nahʉmvwa ɨshipelwa shiila ɨsha wunɨ shiyiga,
“Ɨnzaga!”
8 Nahayilola ɨfalaasi ɨyɨ waaji ʉvuunya,
nʉ‑ʉla wa‑ahali akhɨɨye pa mwanya yaakwe,
ʉyo itaawa lyakwe bhahagaga Fwe,
nantele Huzimu ahalongozanya nawo.
Bhope bhahapeewa ikhone ɨlya‑agoje ɨmbali yeeka mu mbali zinɨ ɨzya bhantu mu nsi hwi‑ipanga,
hu nzala,
hu mpʉngo na hu hanu ɨhali.
9 ɄMwana Ngoole ʉyo ahaalula ʉlimbo ʉwɨ shifundishilo ɨsha saanu.
Pa nsi pa shipuuto nahalola ɨmpepo zya bhantu ɨbho bhahabudiilwe hu nongwa ya hwɨtɨshe izwi lya Ngʉlʉbhɨ na hulisimishizye.
10 Ɨpo ɨmpepo ɨzyo zyahabwaga ibwago zyahaga,
“Wee Mwɨnɨ wi‑ikhone lyonti,
wʉ‑ʉli mʼfinjile nʉ wɨ lyoli,
ɨshi yeenu ʉhwolobhela?
Ndi wahayihubhalonga abhantu abha mu nsi na hubhaweezezye ʉbhiibhi ʉwa hutigoje?”
11 Ɨpo bhonti ɨbho nahabhalolile bhahapeewa amenda amazelu.
Nantele bhahabhʉʉzɨwa huje bhagʉʉlɨle hu habhaazyo hashe,
afishe abhaholo bhaabho ɨbho bhabhomvi bhamwabho lwa bhagogwilwe nanshi abheene,
huje ʉwinji waabho wufishile.
12 Ɨpo nahanʼnola ʉMwana Ngoole ʉyo ahwalula ʉlimbo ʉwɨ shifundishilo ɨsha nʼtanda.
Hu habhaazyo lwa‑ahwalula,
intensya igoosi tee ɨlyɨ nsi lyahafumila.
Isanya lyahabha liilu tee nanshi amazimya,
gwope ʉmwezi gwahabha nʼshamamu nanshi idanda.
13 Ɨnzota afume hu mwanya zyahagwa mu nsi,
nanshi ɨsho amantongooni ɨgo saga gajinile sha galagala afume mwi‑ikʉ,
hu habhaazyo ɨho ɨnkʉngʉ ɨngoosi lwɨ‑ɨvugula.
14 Ɨmwanya yaheepa nanshi ɨsho ikalataasi sha lipintwa.
Amagamba gonti nɨ nsi zyonti ɨzyo zyahali paahati yɨ nsʉmbi vyaheepa afume paala pa vyahalɨɨho.
15 Ɨpo abhamwɨnɨ abhɨ nsi,
abhalongozi,
abhagoosi bha bhagoosi abha bhalwi,
abhatabhazi,
abhantu abhi‑ikhone,
peeka na bhantu abhanjɨ bhabhe bhakalwe awe bha saga bhakalwe,
bhonti bhahahwifisa mu magwenya na pa nsi yɨ mawe agɨ magamba.
16 Ɨbho bhonti bhahagabhʉʉzya amagamba na mawe huje,
“Tibhugushili!
Mutifise,
agandi hutilole ʉNgʉlʉbhɨ ʉyo akhɨɨye pi‑itengo ɨlyɨ shimwɨnɨ.
Nantele mutifise afume mwi‑ilyoyo ɨlya Mwana Ngoole.
17 Enya,
isiku igoosi ɨli‑ilyoyo ikhali afume hwa Ngʉlʉbhɨ nʉ Mwana Ngoole lifishile!
Weenu ʉyo wa‑abhajiiye ajimbe?”