Ɨshitaabu nʉ Mwana Ngoole
5
Ɨpo nahashilola ɨshitaabu hu nʼkhono ʉgwa hu lɨɨlo ʉgwʉ‑ʉyo ahali akhɨɨye pi‑itengo ɨlyɨ shimwɨnɨ.
Ɨshitaabu ɨsho shahali shisimbwilwe muuhati na hwʉnzɨ,
nantele shipinyiilwe nɨ vifundishilo pʉnga (7) ɨvyɨ limbo.
2 Ɨpo nahanʼnola ʉnʼtumi ʉwi‑ikhone tee ayanga hwi‑izwi igoosi,
ahajile,
“Weenu ʉyo akhondɨɨye ahwalule ɨvifundishilo ɨvyo na hwigule ɨshitaabu ɨshi?”
3 Leelo saga ahalɨɨho ʉmuntu lwonti ʉhwo hu mwanya,
awe mu nsi,
awe huzimu,
ʉyo ahali akhondɨɨye ahwigule ɨshitaabu ɨsho na hushibhaazye.
4 Ɨpo nahanda alile tee,
hu nongwa ya‑aje saga nahashilolile ɨshipelwa shoshonti ɨsho shahakhondɨɨye ahwigule awe hushibhaazye ɨshitaabu ɨsho.
5 Ɨpo ʉmo mu bhagoosi bhaala ahambʉʉzya,
“Leha alile!
Enya!
ɄNʼsama ʉwɨ shikholo ɨsha Yuuda,
afume mu mpaapo ya mwɨnɨ ʉDaudi amenile ʉlʉgʉ.
Ʉmwene ya yʉʉyo akhondɨɨye ahwalule ɨvifundishilo ɨvyɨ limbo pʉnga (7) mu shitaabu ɨsho na hushiigule.”
6 Ɨpo nahanʼnola ʉMwana Ngoolea ayɨmɨlɨɨye pa pɨɨpɨ ni‑itengo ɨlyɨ shimwɨnɨ,
ahali nanshi abholiilwe.
Ahazyʉngʉlɨɨlwe nɨ vipelwa viila vinɨ na bhagoosi bhaala amashʉmi gabhɨɨlɨ na bhanɨ.
Ahali nɨ mpeeta pʉnga (7) na maaso pʉnga.
Amaaso ɨgo zyɨ Mpepo pʉnga ɨzya Ngʉlʉbhɨ ɨzyo zyahali zisonteleziiwe mu nsi yonti.
7 ɄMwana Ngoole ʉyo ahabhala,
aheega ɨshitaabu shiila afume hu nʼkhono ʉgwa hu lɨɨlo ʉgwʉ‑ʉyo ahali akhɨɨye pi‑itengo ɨlyɨ shimwɨnɨ.
8 Lwa weega ɨshitaabu ɨsho,
ɨvipelwa viila vinɨ na bhagoosi bhaala amashʉmi gabhɨɨlɨ na bhanɨ bhahasugamila pitagaalila lya Mwana Ngoole.
Shila ʉmo ahali nɨ ntonga nɨ mbakuuli ɨzyɨ zahaabu ɨzyo zyahamemile ɨvintu vya vinunshila.
Ɨvintu vya vinunshila ɨvyo zyɨ mpuuto zya bhooziwa.
9 Ɨpo bhahanʼteelela ɨnteelo ɨmpya bhahaga,
“Ʉkhondɨɨye aawe ahweje ɨshitaabu ɨsho
na hwalule ɨvifundishilo vyakwe,
pɨpo wahabholiilwe.
Hwi‑idanda lyaho wahanʼgombolɨɨye ʉNgʉlʉbhɨ
abhantu abhɨ vikholo vyonti,
abhɨ njango zyonti na bhɨ nsi zyonti.
10 Ʉbhatʉsɨɨzye abhantu ɨbho mu wumwɨnɨ waaho
na hubhabhɨɨshe abhe bhasayi bha Ngʉlʉbhɨ
huje bhamʼmombele ʉNgʉlʉbhɨ,
bhope bhahayilongozya ɨnsi.”
11 Ɨpo naheenya,
nahʉmvwa amazwi aga bhantumi abhinji tee.
Bhahalizyʉngʉʉlɨle itengo liila ɨlyɨ shimwɨnɨ,
ɨvipelwa viila na bhagoosi bhaala.
Ɨmpʉga ɨyo yahali na bhantumi ɨelufu nɨ elufu ɨbho saga bhabhaaziwa.
12 Nahabhatejeelezya bhateela hwi‑izwi igoosi,
bhayanga ɨshi,
“ɄMwana Ngoole ʉyo ahabholiilwe,
akhondɨɨye ahwambɨɨlɨle ikhone,
ʉtabhazi nʉ tengamazu.
Amaha,
ɨnshɨnshɨ,
ʉmwamu nɨ nsalifyo vya mwene!”
13 Ɨpo nahʉmvwa ɨvipelwa vyonti ʉhwo hu mwanya,
mu nsi,
huzimu na mu nsʉmbi viteela palishimo na huje,
“Ʉmwene ʉyo akhɨɨye pi‑itengo ɨlyɨ shimwɨnɨ nʉ Mwana Ngoole,
bhasʉmbwe,
bhatinihwe.
Nantele ʉmwamu ni‑ikhone vibhanje nabho wiila na wiila.”
14 Ɨvipelwa viila vinɨ vyahɨɨtɨha vyahaga,
“Aameni!”
Bhope abhagogolo bhaala bhahasugamila na‑apuute.