Bhahumʼpuuta ʉNgʉlʉbhɨ hu mwanya
4
Lwa gaashila ɨgo,
nahalola ʉlyango gwiguha hu mwanya!
Nantele nahʉmvwa izwi ɨlyo nahʉmvwɨzye hu wandilo lya lyahakhoola nanshi ɨndudwe,
lyahayanga naanɨ huje,
“Zʉbha afishe ʉhwu,
anɨ ɨnza hulolesye ɨgo gahayikhondela afumile hu habhaazyo ɨho hahwɨnza.”
2 Nalinaali ʉMʼpepo ʉMʼfinjile ahaniishila,
nahalilola itengo ɨlyɨ shimwɨnɨ ʉhwo hu mwanya,
ɨpo ʉmo akhɨɨye pa mwanya yaakwe.
3 Ʉyo ahali pi‑itengo,
ahali alawuha tee nanshi amawe agɨ nshɨnshɨ ɨngoosi ɨgo galawuuhana.
Ʉtalambo ʉlwɨ mvula ʉlwo lwahali lulawuha nanshi ʉlemba,
lwahazyʉngʉʉlɨle itengo ɨlyo ɨlyɨ shimwɨnɨ.
4 Nantele amatengo aganjɨ agɨ shimwɨnɨ amashʉmi gabhɨɨlɨ na ganɨ gahalizyʉngʉʉlɨle itengo liila ɨlyɨ shimwɨnɨ.
Mu matengo ɨgo,
bhahali bhakhɨɨye abhagoosi amashʉmi gabhɨɨlɨ na bhanɨ ɨbho bhakwɨte amenda amazelu nɨ vyʉbhalo ɨvyɨ shimwɨnɨ ɨvyɨ zahaabu hu matwe gaabho.
5 Pi‑itengo liila ɨlyɨ shimwɨnɨ pahali pafuma ɨntalala ni‑izwi ɨlyɨ lyʉngʉmo.
Pitagaalila lyakwe pahali nɨ kolobooyi pʉnga (7) ɨzyɨ mwoto ɨzyo zyahali zihwaha.
Ɨkolobooyi ɨzyo zyɨ Mpepo pʉnga ɨzya Ngʉlʉbhɨ.
6 Nantele pitagaalila li‑itengo ɨlyɨ shimwɨnɨ ɨlyo,
pahali na hantu nanshi ɨnsʉmbi ɨyi‑ilolwe.
Ɨnsʉmbi ɨyo yahali nanshi iwe lya lilawuha tee.
Ɨmbali zyonti ɨzi‑itengo ɨlyɨ shimwɨnɨ,
pahali nɨ vipelwa vinɨ vya vyahali na maaso gaminji hwitagaalila na hwisinda.
7 Ɨshipelwa ɨsha hwande shahalɨngɨɨne nanshi ɨnsama,
ɨsha bhɨɨlɨ shahalɨngɨɨne nanshi ɨngwata ɨhambakʉ,
ɨsha taatu shahali nɨ sheeni nanshi ɨsha muntu nɨ sha wunɨ shahalɨngɨɨne nanshi ɨnsimula ɨyo ɨpuluha.
8 Ɨvipelwa ɨvyo vinɨ,
shila shipelwa shahali na mapiho nʼtanda.
Gope amapiho gahali na maaso ɨmbali zyonti.
Vyahali viteela pasanya na nʉsiku sinta apʉʉme vyahagaga,
“Mʼfinjile,
Mʼfinjile,
Mʼfinjile,
yʉ Mwɨnɨ ʉNgʉlʉbhɨ ʉwi‑ikhone lyonti,
ʉyo ahalɨɨho,
ʉyo alɨɨho,
nantele ʉyo ahayɨnza.”
9 Ahabhaazyo honti ɨvipelwa ɨvyo vyahali vihumʼmwamiha hu nshɨnshɨ na hunʼsalifye ʉmwene ʉyo akhɨɨye pi‑itengo ɨlyɨ shimwɨnɨ,
nantele wa‑ali mwʉmi wiila na wiila.
10 Hu habhaazyo lwa vihumʼpuuta,
bhope abhagoosi amashʉmi gabhɨɨlɨ na bhanɨ ɨbho bhahali bhasugamila pitagaalila lyakwe na humʼpuute ʉyo wa‑ali mwʉmi wiila na wiila.
Nantele bhahali bhahumʼfumizya ɨvyʉbhalo vyabho pitagaalila li‑itengo ɨlyɨ shimwɨnɨ bhahagaga ɨshi,
11 “Ʉkhondɨɨye aawe wʉMwɨnɨ,
Ngʉlʉbhɨ weetu,
ahwambɨɨlɨle ʉmwamu,
ɨnshɨnshɨ ni‑ikhone.
Aawe wa wahapelile ɨvintu vyonti,
hu kʉndwe waaho vyahapeliilwe,
nantele vilɨɨho.”