Ɨkalaata hwa bhantu abha hu shibhanza ɨsha hu Saadi
3
ɄMuntu ʉyo ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Saadi,
ʉyanje ɨshi.
Ɨga mazwi afume hwaliinɨ anɨ wɨ‑ɨndi nɨ Mpepo pʉnga (7) ɨzya Ngʉlʉbhɨ nɨ ntondwe pʉnga.
Tejeelezyi ɨgo ɨhubhabhʉʉzya!
Ɨmɨɨnye ɨnjendo zyenyu.
Muloleha huje muli bhʉʉmi,
leelo mufwiye.
2 Daamushi!
Khamantanyi ɨnongwa nyishe ɨzyo zisyalile nyʉʉmi,
pɨpo ɨnjendo zyenyu saga zikhondɨɨye pitagaalila lya Ngʉlʉbhɨ waanɨ.
3 Ɨshi,
mwizuhaje ɨmanyizyo ɨzyo mwahambɨlɨɨye na huzyʉmvwe.
Mukhate ɨzyo na‑alambe.
Leelo nkashele saga mudaamuha,
nahayɨnza hwi‑idala ɨlya‑agundusye,
nanshi ɨsho ʉmwibha ahwɨnza,
nantele saga mwahayimanya lwonti ahabhaazyo ɨho nahayɨnza.
4 Leelo huli abhantu bhashe ʉhwo hu Saadi,
ɨbho saga bhilufiizye amenda gaabho hwa‑abhombe ɨmbiibhi.
Ɨbho bha bhɨɨbho bhahayibhala peeka naanɨ,
bhope bhahayikwatiziwa amenda amazelu pɨpo abhantu ɨbho bhakhondɨɨye ɨsho.
5 Ʉmuntu wowonti ʉyo ahayimena ɨnjelo,
ahayikwata amenda amazelu nanshi abheene.
Anɨ saga nahayihulyefwa itaawa lyakwe dumu mu shitaabu ɨshɨ wʉʉmi,
a leelo nahayihuliyanga itaawa lyakwe pitagaalila lya Daada na pitagaalila lya bhantumi bhaakwe.
6 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.”
Ɨkalaata hwa bhantu abha hu shibhanza ɨsha hu Filadelifiya
7 Ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Filadelifiya ʉyanje ɨshi.
Ɨga mazwi afume hwaliinɨ anɨ nɨmʼfinjile nʉ wɨ lyoli,
anɨ wɨ‑ɨndi nɨ nyigulilo ɨyi‑ikhone ɨlya mwɨnɨ ʉDaudi.
b ‘Nkashele ɨngaliiye ʉlyango,
nʉʉmo ʉwɨnjɨ ʉyo abhajiiye ahwigule.
Nantele nkashele ɨniguuye ʉlyango,
nʉʉmo ʉwɨnjɨ ʉyo abhajiiye agalile.’
c Tejeelezyi ɨgo ɨhubhabhʉʉzya!
8 Ɨmɨɨnye ɨnjendo zyenyu.
Tejeelezyi!
Anɨ ɨmbiguliiye ʉlyango,
nʉʉmo ʉmuntu ʉyo abhajiiye hugugalile.
Hwope poshe ikhone lyenyu lidoodo,
leelo mukhɨɨte ɨmanyizyo zyanɨ,
nantele saga muhaanile anɨ.
9 Tejeelezyi!
Nahayihubhaleetela abhasundwe bha Seetano ɨbho bhahwikwizya Bhayahuudi,
leelo saga lyoli,
lyoli bhi‑ilenga,
bhɨnze hubhasugamilile.
Ɨbho bhonti bhahayimanya huje ɨmbagɨɨne amwɨ.
10 Hahayɨnza ahabhaazyo ahɨ mayɨmba hu nsi yonti na bhantu bhonti bhahayijelwa.
Leelo hu habhaazyo ɨho,
nahayihubhalɨndɨɨlɨla amwɨ hu nongwa ya‑aje mwahajimbile amayɨmba nanshi ɨsho nahabhalajiziizye.
11 Nahayɨnza lubhilo.
Mukhate shinza aminza ɨgo muli nago,
huje ʉmuntu asahasheele hubhafyʉle ɨshʉʉbhalo sheenyu.
12 Ʉmuntu wowonti ʉyo ahayimena ɨnjelo,
nahayihumʼmɨɨha abhe linyooha mu nyumba ɨmfinjile ɨya Ngʉlʉbhɨd waanɨ,
wope saga ahayifuma ʉmwo nantele.
Ɨpo nahayihunʼsimba itaawa lya Ngʉlʉbhɨ waanɨ ni‑itaawa li‑ibooma lya Ngʉlʉbhɨ waanɨ.
Ibooma ɨlyo Yelusaleemue mpya,
lyahayiiha afume hu mwanya hwa Ngʉlʉbhɨ.
Nantele nahayihunʼsimba itaawa lyanɨ ipya.
13 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.”
Ɨkalaata hwa bhantu abha hu shibhanza ɨsha hu Lawodikiya
14 Ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Lawodikiya,
ʉyanje ɨshi.
Ɨga mazwi afume hwaliinɨ anɨ nɨAameni,
nɨnʼsimishizi nʼnʉnjɨsu nantele wɨ lyoli,
anɨ wɨ‑ɨlongozya ɨvipelwa vyonti ɨvyo ahavipelile ʉNgʉlʉbhɨ.
Tejeelezyi ɨgo ɨhubhabhʉʉzya!
15 Ɨmɨɨnye ɨnjendo zyenyu huje saga muli bhakhatazu awe bhakʉʉsu.
Hwashi nkashele mwabhanga bhakhatazu awe bhakʉʉsu!
16 Ɨshi muli bhafugutizu,
saga muli bhakhatazu awe bhakʉʉsu,
ɨpo nahayihubhatapiha mufume mwi‑ilomu lyanɨ.
17 Muyanga huje,
‘Atɨ tili bhatabhazi.
Tihwitabhaziizye tee.
Tili na shila hantu,
saga tibhuliililwa nka hashe!’
Leelo saga mumɨɨnye huje amwɨ muli bhadeganu,
mukhondɨɨye alolelwe ɨnkʉmbʉ,
muli bhapɨɨna,
muli bhantonko,
nantele muli weleele.
18 Ɨhubhabhʉʉzya huje,
mukale hwaliinɨ ɨzahaabu ɨyo nyinza huje mubhe bhatabhazi,
mukale amenda amazelu,
mukwate na huwufise ʉweleele weenyu,
huje mugandi alole ɨnsoni.
Nantele mukale ʉnʼnembo ʉgwa‑apotozye mu maaso geenyu huje mulole.
19 Abhantu ɨbho ɨhubhagana anɨ,
ɨhubhakhajila na hubhasunde.
Ɨshi mubhanje nʉ dandamazu alambe.
20 Enya!
Anɨ ɨnɨmɨlɨɨye pa lyango,
ɨhwiguzya.
Ʉmuntu nkashele wʉmvwa izwi lyanɨ na hwigule ʉlyango,
ɨnza‑atʉʉshe hwa mwene,
ɨnza‑alye peeka nawo,
wope anza‑alye peeka naanɨ.
21 Ʉmuntu wowonti ʉyo ahayimena ɨnjelo,
nahayihumʼmwɨtɨshɨzya akhale naanɨ pi‑itengo lyanɨ ɨlyɨ shimwɨnɨ,
nanshi ɨsho anɨ nahamenile na‑akhale nʉ Daada pi‑itengo lyakwe ɨlyɨ shimwɨnɨ.
22 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.”