Ɨkalaata hwa bhantu abha hu shibhanza ɨsha hu Efeeso
2
ɄMuntu ʉyo ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Efeeso,
ʉyanje ɨshi.
Ɨga mazwi afume hwaliinɨ anɨ wɨ‑ɨhɨɨte ɨntondwe pʉnga (7) mu nʼkhono gwanɨ ʉgwa hu lɨɨlo,
nantele wɨ‑ɨjenda paahati yɨ mpandaganya ziila pʉnga ɨzyɨ zahaabu ɨzya‑abhɨɨshɨle ɨkolobooyi.
Tejeelezyi ɨgo ɨhubhabhʉʉzya!
2 Ɨmɨɨnye ɨnjendo zyenyu,
ʉdandamazu weenyu nʉ jimbiilizu weenyu.
Nantele,
ɨmɨɨnye huje saga muli palishimo na bhantu abhabhiibhi.
Mwahabhajelile ɨbho bhahwikwizya huje bhasontwa lwa saga lyoli.
Mwahamanya huje bhi‑ilenga.
3 Nantele,
ɨmɨɨnye huje muyɨmbɨle tee hu nongwa yaanɨ,
leelo mujimbile,
hwope ɨshi saga mulitile.
4 Leelo,
ɨndi ni‑izwi limo,
muwuleshile ʉkʉndwa weenyu ʉwa hwande.
5 Mwizuhaje ɨgo mwahabhombile ʉhwo hu wandilo ʉwa hwɨtɨshe hwenyu sha musɨɨle agwe.
Ɨshi mulambe!
Mubhombe gaala ɨgo mwahabhombile hu habhaazyo haala.
Nkashele saga mulamba,
nahayɨnza na hwefwe ɨmpandaganya yeenyu ɨya‑abhɨɨshɨle ɨkolobooyi.
6 Leelo ɨhubhasʉmba ahantu heeka.
Muviitwa ɨnjendo ɨmbiibhi ɨzyo Bhanikolaawoa bhabhomba.
Ɨnjendo ɨzyo hwope naanɨ ɨviitwa tee.
7 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.
Ʉmuntu wowonti ʉyo ahayimena ɨnjelo,
nahayihumʼmwɨtɨshɨzya alye amantongooni agi‑ikwi ɨlyɨ wʉʉmi ʉwa wiila na wiila.
Ikwi ɨlyo lili hu Paladiisob hu nʼgʉnda ʉgwa Ngʉlʉbhɨ.”c
Ɨkalaata hwa bhantu abha hu shibhanza ɨsha hu Simiina
8 Ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Simiina,
ʉyanje ɨshi.
Ɨga mazwi afume hwaliinɨ anɨ wɨ‑ɨndi wa hwande nantele wa hu malishilo.
Nahafwiye,
nahazyʉha nɨ‑ɨshi ɨndi mwʉmi!
Tejeelezyi ɨgo ɨhubhabhʉʉzya!
9 Ɨmɨɨnye amayɨmba geenyu nʉ pɨɨna weenyu.
Leelo lyoli amwɨ muli bhatabhazi!
Hwope ɨmɨɨnye ɨndigo ɨzyo abhantu bha Seetanod bhahubhaliga amwɨ,
ɨbho bhahwikwizya Bhayahuudi fwandi ndaali.
10 Mugandi ahwogope amayɨmba ɨgo gahayɨnza huliimwɨ.
Enyaaji!
ɄSeetano ahayihubhajela hwa hubhakʉnje abhamwenyu bhamo mu hoobhe.
Namwɨ mwahayiyɨmba ɨnsiku ishʉmi.
Leelo mubhanje bhalʉnjɨsu hwaliinɨ hwope afishe afwe,
naanɨ nahayihubhapeela ɨshʉʉbhalo ɨshɨ wʉʉmi ʉwa wiila na wiila.
11 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.
Ʉmuntu wowonti ʉyo ahayimena ɨnjelo,
isiku ɨlya hu malishilo saga ahayitaagwa lwonti mu mwoto ʉgwa wiila na wiila.
Ʉmwoto ʉgwo wʉ fwe wa bhɨɨlɨ.”e
Ɨkalaata hwa bhantu abha hu shibhanza ɨsha hu Peligamo
12 Ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Peligamo,
ʉyanje ɨshi.
Ɨga mazwi afume hwaliinɨ anɨ wɨ‑ɨndi ni‑ipanga ɨlyo lili nʉ wooji hwonti na hwonti.
Tejeelezyi ɨgo ɨhubhabhʉʉzya!
13 Anɨ ɨmɨɨnye ɨpo mukhala,
ɨpo pa pɨɨpo ʉmwene ʉSeetano alongozya.
Leelo hwope ɨsho mujendeelela hunɨɨtɨshe.
Nantele amwɨ saga mwahakhɨɨne ʉlwɨtɨho lwenyu huliinɨ,
hwope hu habhaazyo ɨho ʉnʼsimishizi waanɨ ʉnʼnʉnjɨsu ʉAntipaasi lwa‑ahagogwilwe mwi‑ibooma lyenyu ɨlyo ʉSeetano akhala.
14 Leelo ɨndi na mazwi mashe huliimwɨ.
Muuhati yeenyu bhalɨɨho bhamo ɨbho bhalondolezya ɨmanyizyo zya Balaamu.
ɄBalaamu ʉyo ahamʼmanyiziizye ʉBaalaki hubhateezanye aBhaizilaeeli huje,
bhabhombe ɨmbiibhi ɨya‑alye ɨvyalye ɨvyo vyahafumiziiwe nsangu hwa bhangʉlʉbhɨ na‑abhombe ʉlogozi.f
15 Nantele huliimwɨ bhalɨɨho na bhanjɨ ɨbho bhalondolezya ɨmanyizyo ɨzya Bhanikolaawo na‑abhombe ɨmbiibhi zyabho.
16 Leelo ɨshi lambaji!
Nkashele saga mulamba,
nahayɨnza nalinaali huje ɨmbakhome abhantu ɨbho ni‑ipanga ɨlyo lifuma mwi‑ilomu lyanɨ.
17 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.
Ʉmuntu wowonti ʉyo ahayimena ɨnjelo,
nahayihumʼpeela ɨshalye ɨshɨ maanag ɨsha hu mfiso.
Nantele nahayihumʼpeela iwe izelu ɨlyo lyahayibha lisimbwilwe itaawa ipya.
Nʉʉmo ʉmuntu ʉyo ahayihulimanya itaawa ɨlyo,
lyoli ʉmwene ʉyo ahapewiilwe iwe ɨlyo.”
Ɨkalaata hwa bhantu abha hu shibhanza ɨsha hu Siyaatila
18 Ahajendeelela humbʉʉzye ahaga,
“Ʉnʼsimbile ʉnʼtumi ʉwa hu shibhanza ɨsha hwi‑ibooma ɨlyɨ Siyaatila,
ʉyanje ɨshi.
Ɨga mazwi afume hwaliinɨ anɨ nɨMwana wa Ngʉlʉbhɨ.
h Ɨndi na maaso nanshi ɨmɨlɨ ɨzyɨ mwoto na manama ga galawuha nanshi ɨzahaabu ɨyo ɨpembwilwe mu mwoto huje ɨbhe nyinza.
Tejeelezyi ɨgo ɨhubhabhʉʉzya!
19 Ɨmɨɨnye ɨnjendo zyenyu.
Ɨmɨɨnye ʉkʉndwa weenyu,
ʉlwɨtɨho lwenyu,
ahwavwane hwenyu nʉ jimbiilizu weenyu.
Nantele ɨmbombo zyenyu ɨzyɨ‑ɨshi nyinza ashile ɨzya hu wandilo.
20 Leelo ɨndi ni‑izwi limo,
amwɨ mumʼmwɨtɨshɨzɨɨzye ʉnʼshɨ ʉyo ʉYezebeeli ʉyo ahwikwizya nʼkuwi,
leelo saga lyoli.
Ʉyo ahubhagobela abhabhomvi bhaanɨ hwa hubhamanyizye bhabhombaje ʉweegu na‑alye ɨvyalye ɨvyo vyahafumiziiwe nsangu hwa bhangʉlʉbhɨ.
21 Ɨmʼpiiye ahabhaazyo aha‑alambe ɨmbiibhi zyakwe,
leelo saga ahwanza aleshe ʉweegu waakwe.
22 Tejeelezyi!
Ɨshi hu nongwa ɨyo,
nahayihumʼponyezya amayɨmba agɨ mpʉngo ɨyo,
ahayipootwa adaamushe pa shitala.
Nantele abhantu bhonti ɨbho bhabhomba nawo ʉweegu,
nahayihubhalavya tee nkashele bhakhaana alambe ɨnjendo zyabho ɨmbiibhi.
23 Nantele nahayihubhagoga lwonti abhasundwe bhaakwe.
Ɨpo abhantu abha mu vibhanza vyonti bhahayimanya huje,
anɨ ɨhwelenganya ʉmwoyo nɨ nsɨɨbho zya shila muntu.
Nantele nahayihunʼsomba shila muntu alɨngaane nɨ mbombo zyakwe.
24 Leelo muuhati yeenyu mwa muli ʉhwo hu Siyaatila,
bhalɨɨho bhamo bha saga bhalondolezya ɨmanyizyo zya Yezebeeli ʉyo.
Nantele saga bhamanyiiye ɨzyo bhayanga huje mfiso zya Seetano.
Ɨhubhabhʉʉzya amwɨ ɨnjiga,
saga nahayihubhonjeezya amwɨ izigo ɨlyɨnjɨ,
25 leelo khataji tee ɨsho muli nasho afishe hu habhaazyo ɨho nahayɨnza.
26 Ʉmuntu wowonti ʉyo ahayimena ɨnjelo na‑ajendeelele alondolezye ʉkʉndwe waanɨ afishe hu malishilo,
‘Nahayihumʼpeela ikhone ɨlya‑alongozye abhantu abhɨ nsi zyonti.
27 Ahayihubhalongozya hwi‑ikhone igoosi,
ahayihubhabazula lwonti nanshi ʉmuntu wa‑abazula ɨnsonta.’
i
Ahayambɨɨlɨla ikhone, nanshi ɨsho anɨ ɨnambɨlɨɨye ikhone afume hwa Daada waanɨ.
28 Nantele nahayihumʼpeela ʉmwamu waanɨ ʉwo wulawuha nanshi ɨntondwe ɨya shampwi.
29 Wa‑ali na makutu ayʉmvwaje amazwi ɨgo ʉMʼpepo ʉMʼfinjile ahuvibhʉʉzya ɨvibhanza.”