ƗNyʉʉbhʉlo
ɨzya Yeesu ʉKilisiti hwa nʼsontwa ʉYoohani
Amazwi agɨ tagaalizyo
1
Ɨzi zyɨ nyʉʉbhʉlo ɨzya Yeesu ʉKilisiti.
a Ahapewiilwe ɨnyʉʉbhʉlo ɨzyo nʉ Ngʉlʉbhɨ huje abhalanje abhabhomvi bhaakwe ɨnongwa ɨzyo zihwanziwa afumile ɨshi mu pɨɨpɨ.
ɄYeesu wope ahanʼsonteelezya ʉnʼtumib waakwe huje aleete ɨnyʉʉbhʉlo ziila ɨzya Yeesu ʉKilisiti huliinɨ anɨ nɨYoohani,
nɨmʼmomvi waakwe.
2 Ɨpo nanɨ nahasimishizya ɨlyoli yonti ɨyo nahayilolile.
Ɨlyoli ɨyo yʉ Yeesu ʉKilisiti ya‑ahandolesiizye,
nantele ɨlyo lizwi lya Ngʉlʉbhɨ.
3 Asayiiwe ʉmuntu ʉyo ahubhabhaazizya abhanjɨ izwi ɨlyɨ kuwi ɨlyo lisimbwilwe mu shitaabu ɨshi.
Nantele bhasayiiwe ɨbho bhahwʉmvwa na‑akhate ɨgo gasimbwilwe,
pɨpo ahabhaazyo aha‑afumile hali mu pɨɨpɨ.
Ɨndamuho hu vibhanza pʉnga
4 Anɨ nɨYoohani ɨhubhasimbila ɨkalaata ɨnɨ mubhooziwa bha Yeesu bha mu vibhanza pʉnga (7) ɨvyo vili mu mukowa ʉgwɨ Aasiya.
Ɨmpyana nʉ tengaanu vibhanje peeka naamwɨ afume hwa Ngʉlʉbhɨ ʉyo ahalɨɨho,
ʉyo alɨɨho,
nantele ʉyo ahayɨnza.
Nantele ɨmpyana nʉ tengaanu vibhanje peeka naamwɨ afume hu Mpepo pʉnga ɨzyo zilɨɨho pitagaalila li‑itengo lyakwe ɨlyɨ shimwɨnɨ,
5 na‑afume hwa Yeesu ʉKilisiti.
ɄYeesu yʉ nʼsimishizi nʼnʉnjɨsu wa Ngʉlʉbhɨ,
ʉyo wa hwande azyʉshe,
nantele yʉ nʼnongozi wa bhamwɨnɨ bhonti abha mu nsi.
ɄYeesu yʉʉyo atigɨɨne na hutisatule afume mu mbiibhi zyetu hwi‑idanda lyakwe,
hwa hutifwɨle.
6 Ʉmwene ya yʉʉyo ahatitʉsɨɨzye mu wumwɨnɨ waakwe na hutibhɨɨshe atɨ abhe bhasayi bha Ngʉlʉbhɨc huje timʼmombelaje ʉNgʉlʉbhɨ,
ʉYise waakwe.
Ʉmwamu ni‑ikhone vibhanje nʉ mwene wiila na wiila.
Aameni!
7 Enyi!
ɄYeesu ʉKilisiti ahayɨnza mu mabhɨngo!
Abhantu bhonti bhahayihunʼnola,
bhope bha bhahanʼnasile nɨ mpalala,
ɨbha bhope bhahayihunʼnola.
Ɨvikholo vyonti ɨvya mu nsi vyahayilila hu nongwa yaakwe.
Lyoli,
yahayibha ɨsho.
Aameni.
8 ɄMwɨnɨ ʉNgʉlʉbhɨ ayanga huje,
“Anɨ nɨ Aalufa nantele Oomega.
d Anɨ nahalɨɨho,
ɨndɨɨho,
nantele nahayɨnza.
Anɨ nɨ Ngʉlʉbhɨ wi‑ikhone lyonti.”
ɄYoohani ahunʼnola ʉKilisiti mu ndoleshelo
9 Anɨ nɨYoohani nɨmwoziwa wamwenyu,
ɨndi peeka naamwɨ hu mayɨmba nʉ jimbiilizu hu nongwa ya hunʼnondolezye ʉYeesu ʉKilisiti nʉ wumwɨnɨ waakwe.
Nahakʉngwɨlwe mu nsi ɨyo ɨli paahati yɨ nsʉmbi,
ɨyo bhayiga Paatimo,
hu nongwa ya‑alʉmbɨɨlɨle izwi lya Ngʉlʉbhɨ na‑afumye ʉsimishizi ʉwa Yeesu.
10 Isiku limo ɨlya humʼpuute ʉMwɨnɨ,
ʉMʼpepo ʉMʼfinjilee ahaniishila,
nahʉmvwa izwi igoosi nanshi ɨndudwe yɨ‑ɨkhoola hwisinda lyanɨ.
11 Izwi ɨlyo lyahaga,
“Ɨga gonti ɨgo ʉhugalola,
ʉgasimbe mu shitaabu.
Lwa wasimba,
ʉsonteelezye ɨshitaabu ɨsho hu vibhanza ɨvyo vili mu mabooma pʉnga (7) agɨ Efeeso,
Simiina,
Peligamo,
Siyaatila,
Saadi,
Filadelifiya nɨ Lawodikiya.”
12 Ɨpo nahagaluuhana hwisinda huje ɨnʼnole ʉyo ahali ayanga naanɨ,
nahazilola ɨmpandaganya pʉnga (7) ɨzyɨ zahaabu ɨzya‑abhɨɨshɨle ɨkolobooyi.
13 Paahati yɨ mpandaganya ɨzyo,
nahanʼnola ʉmo nanshi ʉMwana wa Muntu,
f akwɨte igolole itali ni‑ilamba ibaaba ɨlyɨ zahaabu pa shifubha.
14 Isisi lyakwe lyahali lizelu nanshi ɨsabhula ɨnzelu,
nantele nanshi ɨnganda.
Amaaso gaakwe gahali galawuha nanshi ʉmwoto.
15 Amanama gaakwe gahali galapuuhana tee nanshi ɨshaaba ɨyo ɨpembwilwe mu mwoto huje ɨbhe nyinza.
Izwi lyakwe lyahali nanshi amɨnzɨ aminji ɨgo gahwiha pa nsalala.
16 Ahali nɨ ntondwe pʉnga (7) mu nʼkhono ʉgwɨ lɨɨlo.
Ipanga ɨlyo lili nʉ wooji hwonti na hwonti lyahali lifuma mwi‑ilomu lyakwe.
Ɨsheeni shaakwe shahali shilawuha nanshi isanya ɨlyo lilamile tee.
17 Lwa nanʼnola,
nahagwɨla pa manama gaakwe nanshi huje ɨmfwiye.
Leelo ʉmwene ahambɨɨha ʉnʼkhono gwakwe ʉgwɨ lɨɨlo,
ahambʉʉzya ahaga,
“Ʉgandi ahwogope!
Anɨ nɨ wa hwande nantele wa hu malishilo.
18 Anɨ nɨ wʉʉmi.
Anɨ nahali ɨmfwiye,
leelo ɨshi enya,
ɨndi mwʉmi wiila na wiila!
Anɨ ɨndi nɨ nyigulilo ɨzyɨ fwe nɨ zya huzimu.g
19 Ɨshi simba ɨnongwa ɨzyo ʉzilolile,
ɨzyo zibhombeha ɨshi na ziila ɨzyo zyahayibhombeha pamandɨ.
20 Ɨntondwe pʉnga (7) ɨzyo ʉzilolile hu nʼkhono gwanɨ ʉgwa hu lɨɨlo,
ɨbho bhantumi abha hu vibhanza viila pʉnga.
Nantele ɨmpandaganya pʉnga ɨzyɨ zahaabu ɨzya‑abhɨɨshɨle ɨkolobooyi ɨzyo ʉzilolile,
vibhanza ɨvyo pʉnga.”