ƗNyʉʉbhʉlo
ɨzya Yeesu ʉKilisiti hwa nʼsontwa ʉYoohani
Ʉtagaalizyo
Ɨshitaabu ɨshi shahasimbwilwe nʉ nʼsontwa ʉYoohani hubhaavwe abhooziwa abha mu vibhanza pʉnga (7) ɨvyo ahali ahuvyɨmɨɨlɨla. Mu lyango ʉgwa 2-3 ahushisimbila shila shibhanza ɨkalaata. Ahubhasunda huje bhagaluuhane mu mbiibhi zyabho. Nantele, ahubhajinjizya abhabhomvi bha Ngʉlʉbhɨ huje bhajendeelele abhe bhagolosu hwope nkashele bhali mu mayɨmba. Ahwande ʉlyango ʉgwa 4 afishe hu malishilo wɨ shitaabu ɨshi, ʉYoohani amama ɨzyɨ ndoleshelo ɨzi‑ikhone ɨlya Ngʉlʉbhɨ, nʉ mwamu waakwe ʉwo ahawulolile. Mu ndoleshelo ɨzyo ʉNgʉlʉbhɨ avundula ilyoyo lyakwe hwa bhantu abhabhiibhi bhonti abha mu nsi, alolesya ɨsho ʉYeesu ʉKilisiti ahayihuwumena ʉbhiibhi. Nantele, alolesya huje ʉYeesu ahayihubhalonga abhantu bhonti ɨbho bhahuyikhaana ɨlyoli yaakwe. ɄNgʉlʉbhɨ ahayihuyiyazya ɨnsi na‑apele ɨnsi ɨmpya. Ɨshi, mu nsi ɨyo abhantu bhonti ɨbho bhahumʼmwɨtɨha ʉNgʉlʉbhɨ bhahayikhala peeka nawo wiila na wiila.
Ɨmbaatiho ɨzyɨ shitaabu ɨshi
1:1-20 Ʉwandilo ʉwɨ ndoleshelo zya Yoohani
2:1-3:22 Ɨkalaata pʉnga (7) hu vibhanza pʉnga
4:1-5:14 Ɨndoleshelo hu nongwa ya Ngʉlʉbhɨ nʉ Mwana Ngoole
6:1-8:5 Ɨvimanyishizyo pʉnga (7) ɨvyɨ limbo
8:6-11:19 Ɨndudwe pʉnga (7)
12:1-14:20 Ɨndoleshelo hu nongwa yɨ lʉgʉ ʉwa mu nsi yonti na hu mwanya
15:1-16:21 Ɨmbakuuli pʉnga (7) ɨzi‑ilyoyo lya Ngʉlʉbhɨ
17:1-20:10 Ʉlongwe hwa nʼshɨ ʉmwegu ʉwɨ Baabeli, ikhanu, ʉnʼkuwi ʉwi‑ilenga nʉ Seetano
20:11-22:21 Ʉlongwe ʉlwa hu malishilo, na habhaazyo ahapya