Ɨkalaata ɨya
Yuuda
ɄYuuda ahubhalamuha abhooziwa
1
Anɨ nɨYuuda,
nɨmʼmomvi wa Yeesu ʉKilisiti,
a nantele nɨnʼdoodo wa Yaakobo,
ɨhubhasimbila amwɨ mwa mukwiziiwe na‑aganwe nʉ Daada ʉNgʉlʉbhɨ,
amwɨ ɨbho ʉYeesu ʉKilisiti ahubhadiima.
2 ɄNgʉlʉbhɨ abhonjelaje ɨnkʉmbʉ,
ʉtengaanu nʉ kʉndwa hu winji.
Ɨnsɨɨbho zya Yuuda asimbe ɨkalaata ɨnɨ
3 Bhakʉndwe bhaanɨ,
nahanzaga tee huje ɨmbasimbile hu nongwa yɨ fyʉli weetu atɨ tenti.
Leelo,
ɨndolile huje ɨhwanziwa ɨmbasimbile ɨkalaata ɨnɨ hubhakʉndɨɨlɨzye huje mulwɨle ʉlwɨtɨho ʉlwo abhooziwa bhonti bhahambɨlɨɨye heeka lwene afume hwa Ngʉlʉbhɨ.
4 Ɨhubhasimbila,
pɨpo abhantu bhamo bhahwitʉsɨɨzye hu mfiso,
na hwisangaanye mwaliimwɨ.
Abhantu ɨbho saga bhahunʼtiniha ʉNgʉlʉbhɨ,
bhasɨɨbha huje bhɨtɨshɨlɨɨlwe abhombe ʉbhembusu hu nongwa ya‑aje bhambɨlɨɨye ʉkhobhoshelo afume hwa Ngʉlʉbhɨ.
Nantele bhanʼkhɨɨne ʉYeesu ʉKilisiti,
ʉNʼnongozi ʉnʼgoosi,
ʉMwɨnɨ weetu.
Leelo afume ɨmandɨ gasimbwilwe huje ʉNgʉlʉbhɨ ahayihubhalonga hu nongwa yɨ mbiibhi zyabho.
Ɨnsundo hu nongwa ya bhamanyizyi abhi‑ilenga
5 Peeka na‑aje mugamɨɨnye ɨga gonti,
ɨshi ɨhwanza hubhiizusye amazwi gamo.
ɄMwɨnɨ ʉNgʉlʉbhɨ ahabhafyʉlɨle aBhaizilaeeli hwi‑idala ɨlya hubheefwe afume mu nsi ɨyɨ Miisili,
leelo pamandɨ ahabhayazya bhaala bha bhahakhɨɨne humʼmwɨtɨshe.b
6 Nantele mwizuhaje huje bhope abhantumic bhamo bhapinyiilwe hu hiisi ɨngoosi na manyololo ga saga gadaduha nka lumo.
Bhapinyiilwe,
pɨpo bhahaleshile ikhone lyabho lya bhahapewiilwe nʉ Ngʉlʉbhɨ na‑aleshe apa‑akhale paabho.
Hu nongwa ɨyo,
bhagʉʉla isiku liila igoosi ɨlya hu malishilo,
lya bhahayilongwa.
7 Nantele mwizuhaje abhantu abha hu mabooma agɨ Sodoma nɨ Gomola na hu mabooma aga munshɨnjɨ,
ɨsho sha bhalɨngaana na bhantumi ɨbho bhahabhombile ʉbhiibhi.
Abhakhaaya abha mu mabooma ɨgo bhahabhombaga ʉweegu abhɨnjɨɨlɨle ɨnsʉngwo ɨmbiibhi ɨzyɨ mabɨlɨ gaabho,
ɨzyo saga zibhalilana na shiila sha bhahapeliilwe.
ɄNgʉlʉbhɨ ahabhayazya hwi‑idala ɨlyɨ mwoto gwa saga guzima nka lumo,
huje ɨbhe nsundo hwa bhantu bhonti.d
8 Shɨnɨɨsho sha bhali abhantu ɨbho bha saga bhahunʼtiniha ʉNgʉlʉbhɨ.
Bhaloota ɨnzozi na‑aje zifuma hwa Ngʉlʉbhɨ.
Ɨnzozi zyabho ɨzyo zihubhalongozya hugabhɨɨshe maavu amabɨlɨ gaabho hwi‑idala ɨlya‑abhombe ʉweegu.
Nantele,
abhantu ɨbho bhakhɨɨne hunʼtinishe ʉNgʉlʉbhɨ na huvilije ɨvipelwa ɨvimwamu ɨvya hu mwanya.
9 Hwope ʉMikaeeli ʉnʼtumi ʉnʼgoosi saga ahalɨnjɨle hunʼnonje ʉSeetanoe na hunʼnije,
lwa‑ahadalihanaga nawo hu nongwa yɨ mʼvimba gwa Moose.
Lyoli ʉmwene ahajile,
“ɄMwɨnɨ ʉNgʉlʉbhɨ yʉʉyo ya‑aʼkhajile!”
10 Leelo abhantu ɨbha bhahuziliga ɨnongwa zya saga bhazyagɨɨnye.
Nantele bhabhomba lyolyonti nanshi ɨvyʉma vya saga vili nɨ njeele,
hu nongwa yɨ nsɨɨbho zyabho ɨmbiibhi ɨzyo zihubhalongozya.
Ɨli lya lihubhayazya.
11 Lwabho abhantu ɨbho hu nongwa ya‑aje bhabhɨnjɨɨlɨla idala lya Kayini.
f Nantele hu nsʉngwo ɨzya hushaaje ɨshʉʉma,
bhabhɨnjɨlɨɨye ʉbhiibhi wa Balaamu.
g Bhabhombile ʉvwalanganu nanshi ʉKoola,
ɨshi bhahayiyaziwa nanshi ʉmwene.h
12 Abhantu ɨbho bhananzi mu vikulukului vyenyu ɨvyɨ kʉndwa.
Bhahwisaaga alye bhɨɨbho lwene sinta nsoni,
ɨbho bhali nanshi amabhɨngo ga saga gatoonyezya ɨmvula,
ga gabuuhwa nɨ nkʉngʉ ʉhwu nʉ‑ʉhwo.
Nantele bhali nanshi amakwi ga saga gali na mantongooni hu habhaazyo aha‑atʉngʉle,
ɨgo gasenyiilwe na‑afwe lwonti.
13 Abheene bhapotiilwe ahwizijile nanshi amabhilingwa amagoosi agɨ nsʉmbi,
nantele ɨnjendo zyabho ɨzyɨ nsoni zifuma nanshi amatatafula mu nsʉmbi.
Nantele bhali nanshi ɨnzota zya ziloleha na‑ateeje mu hiisi.
Ɨshi ʉNgʉlʉbhɨ abhɨɨshɨle nzɨɨla ʉlufundo ʉlwɨ wiila,
apantu pa pali nɨ hiisi ɨngoosi.
14 ɄHenoko ʉyo mpaapo yɨ pʉnga (7) afume apelwe hwa Aadamu,
j ahakuwile hwɨ‑ɨbho huje,
“Enya!
ɄMwɨnɨ ahayɨnza peeka na bhantumi bhaakwe abhasangalusu ɨelufu nɨ elufu,
15 hubhalonje abhantu bhonti,
na hubhafunde bhonti bha saga bhahumʼpuuta ʉNgʉlʉbhɨ.
Ahayihubhalonga hu njendo zyabho ɨmbiibhi,
na hu nongwa yɨ mazwi amabhiibhi ɨgo abhabhomba mbiibhi ɨbho bhahanʼnijile ʉmwene.”
16 Abhantu ɨbha bhahwibhunanzya na‑ayanganishe,
bhalondolezya ɨnsʉngwo zyabho ɨmbiibhi,
nantele bhahwisʉmba tee.
Bhahubhasʉmba tee abhantu abhanjɨ huje bhambɨɨlɨle ɨzya pa mwanya.
Ɨnsundo nɨ ndajizyo hwa bhooziwa
17 Leelo amwɨ bhakʉndwe,
mwizuhaje ga gahayangwilwe na bhasontwa bha Mwɨnɨ weetu ʉYeesu ʉKilisiti.
18 Abheene bhahajile,
“Ɨnsiku ɨzya hu malishilo,
hwahayifumila abhantu bha bhahayisyonshela na‑abhɨnjɨɨlɨle ɨnsʉngwo zyabho ɨmbiibhi.”k
19 Ɨbho bha bhasonzya ibho,
bhasɨɨbha ɨzya mu nsi lwene.
Nantele saga bhali nʉ Mʼpepo ʉMʼfinjile.l
20 Ɨshi leelo amwɨ bhakʉndwe bhaanɨ,
mudandamalaje mwɨmwɨ mu lwɨtɨho lwenyu lwa luli lufinjile tee na‑apuute hwi‑ikhone lya Mʼpepo ʉMʼfinjile.
21 Jendelelaji alembe mu kʉndwa wa Ngʉlʉbhɨ lwa muhunʼgʉʉlɨla ʉYeesu ʉKilisiti,
ʉMwɨnɨ weetu,
ʉyo hu nkʉmbʉ yaakwe ahayihubhapeela ʉwʉʉmi ʉwa wiila.
22 Abhantu bha bhali nɨ nsyoho mu lwɨtɨho,
mubhalolelaje ɨnkʉmbʉ.
23 Nantele abhanjɨ mubhafyʉlaje afume mu mwoto.
Abhanjɨ mubhalolelaje ɨnkʉmbʉ,
leelo muhwidiimaje nabho na‑abhe hutali nɨ njendo zyabho ɨmbiibhi.
ɄYuuda ahunʼsalifya ʉNgʉlʉbhɨ
24 ɄNgʉlʉbhɨ ya yʉʉyo ali ni‑ikhone ɨlya hubhadiime amwɨ huje mugandi agwe mu lwɨtɨho.
Nantele yʉʉyo ya‑abhajiiye hubhabhɨɨshe pitagaalila lyakwe mu mwamu waakwe hu luseshelo ʉlugoosi sinta mbuno nka yeeka.
25 Ʉmwene yʉ Ngʉlʉbhɨ yʉʉyo mwene nantele yʉ Mʼfyʉli weetu,
hwi‑idala ɨlya Yeesu ʉKilisiti ʉMwɨnɨ weetu.
Ʉmwamu,
ʉgoosi,
amaha ni‑ikhone vili nʉ mwene afume halɨ,
ɨshi na wiila!
Aameni.