Ʉlemvu wa wuhunʼsʉngwɨzya ʉNgʉlʉbhɨ
4
ɄKilisiti ahalaviiwe mu mʼbɨlɨ.
Ɨshi namwɨ muhwilɨngaanye nzɨɨla alabhe shishiila na‑abhe nɨ nsɨɨbho nanshi ʉmwene.
Ɨnjanjile ɨsho,
pɨpo ʉmuntu ʉyo abha alaviiwe mu mʼbɨlɨ gwakwe,
alehana nɨ mbiibhi.
2 Ɨshi mu lemvu weenyu,
saga mwahayilongozewaaga nɨ nsʉngwo ɨzyɨ mʼbɨlɨ,
leelo mwahayilembaga nanshi ʉNgʉlʉbhɨ sha‑asʉngwa.
3 Ɨmandɨ ʉhwo mwahazilondolezyaga ɨnsʉngwo zyenyu ɨmbiibhi ɨzya hubhagane abhashɨ awe abhalume abhinji nʉ kholwe.
Nantele mwahasʉngwaga ɨshikulukulu ɨsha‑akholwe na hwanje ɨnyango ɨzyɨ weegu,
na‑apuute abhangʉlʉbhɨ.
Apuute ʉhwo hwa huhumʼviisya ʉNgʉlʉbhɨ tee.
Mumanye huje yahakwɨlɨɨne sha mwahalondolezyaga ɨnjendo ɨzya bhantu ɨbho bha saga bhamʼmɨɨnye ʉNgʉlʉbhɨ.
Ɨshi,
saga muhwanziwa huje muwelelaje abhombe ɨsho nantele.
4 Abhantu ɨbho bha saga bhamʼmɨɨnye ʉNgʉlʉbhɨ,
ɨshi bhaswiga hu nongwa ya‑aje saga mulongozanya nabho abhombe ɨmbiibhi,
nantele bhahubhaliga amwɨ.
5 Ɨshi hu nongwa yɨ mbiibhi zyabho ɨzyo,
bhahayihwiyʉʉmɨla bhɨɨbho pitagaalila lya Ngʉlʉbhɨ.
Ʉmwene ʉNgʉlʉbhɨ ahwilɨngɨɨnye hubhalonje abhantu bhonti,
abhʉʉmi na bhafwe.
6 Ɨnjanjile ɨsho,
pɨpo abhantu bha bhahalʉmbɨlɨɨlwe ɨNongwa ɨNyinza na huzyɨtɨshe bha bhɨɨbho ɨshi bhafwiye.
Ɨnongwa ɨzyo zyahalʉmbɨlɨɨlwe hwa bheene peeka na‑aje ʉNgʉlʉbhɨ ahabhalonjile afwe nanshi abhantu abhanjɨ,
ɨshi bhali bhʉʉmi pitagaalila lya Ngʉlʉbhɨ hwi‑ikhone lya Mʼpepo ʉMʼfinjile.
7 Ɨnsiku ɨzya hu malishilo zipalamiiye.
Ɨshi mubhanje nɨ njeele na‑abhe maaso huje mubhanje ni‑ikhone ɨlya‑apuute nanshi shɨ‑ɨkhondɨɨye.
8 Imwamu ashile gonti,
mugananaje hu lyoli,
pɨpo ʉlugano lukhobhoshela ɨmbiibhi hwope nkashele zibhe nyinji tee.a
9 Mubhanje bhantu bha bhasʉngwa hubhejeelele abhooziwa abhamwenyu mu nyumba zyenyu,
sinta ahwibhunanzye.
10 ɄNgʉlʉbhɨ ya yʉʉyo ahubhapeela amwɨ mubhooziwa ɨvikʉnjɨlwa ɨvyɨ waaji wuwinji wuwinji.
Ɨshi,
shila muntu abhɨɨshe shinza ɨshikʉnjɨlwa shaakwe na hushibhombele ɨmbombo hu nongwa ya bhooziwa abhamwabho.
11 Wowonti wa‑ali nɨ shikʉnjɨlwa ɨsha‑ayanje,
ayanje nanshi ʉNgʉlʉbhɨ yʉʉyo wa‑ayanga ashilile mwa mwene.
Wope ʉyo ali nɨ shikʉnjɨlwa ɨsha hwavwe,
abhavwaje abhanjɨ hwi‑ikhone lya Ngʉlʉbhɨ.
Hwi‑idala ɨlyo ʉNgʉlʉbhɨ ayɨmɨhwaje hu gonti,
hu nongwa ya Yeesu ʉKilisiti,
ʉyo ali nʉ mwamu ni‑ikhone wiila na wiila.
Aameni!
Ayɨmbe hu nongwa ɨya humʼmwɨtɨshe ʉKilisiti
12 Bhakʉndwe bhaanɨ,
mugandi aswije alole amayɨmba amagoosi ga gahubhaaga aga hulujele ʉlwɨtɨho lwenyu.
Ɨshi mugandi hugabhaazizye huje majenu huliimwɨ.
13 Lyoli museshelelaje huje muyɨmba nanshi ʉKilisiti sha‑ahayɨmbɨle.
Ɨpo mwahayibha nʉ luseshelo tee hu habhaazyo ɨho ʉKilisiti lwa waloleha mu mwamu waakwe.
14 Amwɨ musayiiwe,
nkashele abhantu bhahubhaliga hu nongwa ya‑aje muli bhooziwa,
pɨpo ʉMʼpepo ʉMʼmwamu,
hwa huje ʉMʼpepo wa Ngʉlʉbhɨ,
akhala muuhati yeenyu.
15 Mwaliimwɨ,
nkashele muyɨmba,
mugandi ayɨmbe hu nongwa ya‑aje muli bhagoji,
bhiibha,
bhabhomba mbiibhi awe bhalumanyi.
16 Lyoli nkashele muyɨmba hu nongwa ya‑aje muli bhooziwa,
mugandi alole ɨnsoni.
Leelo mumʼmwamihaje ʉNgʉlʉbhɨ,
pɨpo bhahubhakwizya bhasundwe bha Yeesu.
17 Ahabhaazyo aha‑alongwe hafishile.
Alongwe ʉhwo huhwanda na bhantu bhaakwe ʉNgʉlʉbhɨ yʉʉyo.
Ɨshi nkashele atagaalila hutilonje atɨ,
zyahayibha wɨlɨ hwɨ‑ɨbho bha saga bhahwɨtɨha ɨNongwa ɨNyinza ɨzya Ngʉlʉbhɨ?
18 Nanshi ɨsho ɨsimbwilwe mu Nsimbo ɨMfinjile huje,
“Nkashele afyʉlwe hwa muntu ʉnʼgolosu hukhome,
ɨshi hwahayibha wɨlɨ hwa mʼmomba mbiibhi
ʉyo saga amʼmwɨtɨɨshe ʉNgʉlʉbhɨ?”b
19 Ɨshi,
ɨbho bhayɨmba pɨpo ʉNgʉlʉbhɨ ahabhɨɨshɨle huje ɨbhe ɨsho,
bhajendelelaje abhombe aminza na hunʼsʉʉbhɨle ʉNgʉlʉbhɨ,
ʉMʼpeli waabho ʉnʼnʉnjɨsu.