Ɨmanyizyo hwa bhashɨ na hwa bhalume
3
1-2 Amwɨ mubhashɨ,
mubhatinihaje abhalume bheenyu.
Hwi‑idala ɨlyo,
nkashele bhalɨɨho abhalume bha saga bhahuzyɨtɨha ɨNongwa ɨNyinza,
bhakhondezewe lwa bhaalola ɨnjendo zyenyu ɨnsangalusu nantele zyɨ nshɨnshɨ.
Ɨpo bhanza humʼmwɨtɨshe ʉNgʉlʉbhɨ sinta alʉmbɨɨlɨlwe izwi lyolyonti.
3 Mugandi abhe bhantu bha bhahwidona hwʉnzɨ lwene,
nanshi atabhe isisi,
akwate ɨzahaabu na menda agɨ mpɨɨya ɨngoosi.a
4 Lyoli ʉwinza weenyu wandilaje muuhati.
Ʉwinza ʉwo saga wunanjiha awe alale,
wa wuula wa wubha woloolo nantele wutengamazu.
Ʉwu wʉ winza wɨ nshɨnshɨ ɨngoosi tee,
wa wuhwanziwa pitagaalila lya Ngʉlʉbhɨ.
5 Ɨsho sha shɨɨsho sha zyahali ɨmandɨ.
Abhashɨ bha bhahanʼsʉbhɨlaga ʉNgʉlʉbhɨ na humʼmwɨtɨshe,
bhahahwidonaga hu njendo ɨnyinza ɨzya hubhatinishe abhalume bhaabho.
6 Ʉnʼshɨ ʉmo ya‑ahabhombile ɨsho,
yʉ Saala ʉnʼshɨ wa Abulahaamu.
b Ʉnʉ ahanʼtinihaga shinza ʉnʼnume waakwe na humʼpeele ɨnshɨnshɨ.
Ahanʼkwizyaga ahagaga,
“Mwɨnɨ waanɨ.”
c Namwɨ muli bhaana bhaakwe,
hu nongwa ɨyo mujendelelaje abhombe ɨnyinza,
sinta ahwogope lyolyonti.
7 Namwɨ mubhalume mwa mwejile,
muhwanziwa huje mulembaje shinza na bhashɨ bheenyu,
pɨpo mumɨɨnye huje saga bhali ni‑ikhone nanshi amwɨ.
Nantele mubhasʉngaje hu nshɨnshɨ,
pɨpo ʉNgʉlʉbhɨ ahabhalapiiye amwɨ mwenti abhalume na bhashɨ huje mwahayambɨɨlɨla ɨmpeesya ɨyɨ wʉʉmi ʉwa wiila na wiila.
Ɨshi,
mubhombaje ɨsho huje ɨmpuuto zyenyu zigandi azijilwe.
Alaviwe hu nongwa ɨya‑abhombe ɨnyinza
8 Ɨmalɨɨzɨzya hubhabhʉʉzye mwenti huje mubhe nʉ mwoyo gweka nɨ nsɨɨbho palishimo mwenti.
Nantele mutʉlanaje na‑aganane,
pɨpo amwɨ muli bhaholo mu lwɨtɨho.
Mulolelanaje ɨnkʉmbʉ na hwiyiisye mwɨmwɨ hu mwɨmwɨ.
9 Mugandi aweezezye ʉbhiibhi hwɨ‑ɨbho bha bhahubhabhombela amabhiibhi,
awe ɨndigo hu ndigo,
lyoli mubhabhombelaje aminza.
Ɨsho sha shɨɨsho ʉNgʉlʉbhɨ sha‑ahwanza aje mubhombaje huje abhasaye amwɨ.
10 Ɨnjanjile ɨsho,
pɨpo ɨNsimbo ɨMfinjile ziyiga,
“Wowonti ʉyo ahwanza abhe nʉ luseshelo mu wʉʉmi waakwe,
na‑abhe nɨ nsiku zya zimemile ɨnsayo,
ahwanziwa ahwizijile ʉlumɨlɨ lwakwe
lugandi hubhayanje abhantu shibhiibhi,
nantele ilomu lyakwe ligandi ayanje ilenga.
11 Ahwanziwa aleshe abhombe ɨmbiibhi,
lyoli abhombaje ɨnyinza.
Akhalaje hu tengaanu na bhamwabho,
nantele akhataje tee abhombe ɨsho.
12 Ɨnjanjile ɨsho hu nongwa ya‑aje
ʉMwɨnɨ ʉNgʉlʉbhɨ ahubhalɨndɨɨlɨla shinza abhagolosu,
nantele ahuzyʉmvwa ɨmpuuto zyabho.
Leelo abhabhomba mbiibhi,
ahubhapeela ɨhoonyo.”d
13 Yʉ naanu wa‑abhajiiye hubhabhombele shibhiibhi,
nkashele muhwifumya lwonti abhombe ɨnyinza?
14 Leelo hwope nkashele bhahubhalavya hu nongwa ya‑abhombe ga gali gɨ golosu,
musayiiwe nʉ Ngʉlʉbhɨ.
Ɨshi,
mugandi hubhoogope awe ataamiwe mu mooyo geenyu.
Lyoli,
mʼmwamihaji ʉMwɨnɨ ʉKilisiti mu mooyo geenyu.
15 Hwilɨnganyaaji nzɨɨla hu habhaazyo honti humʼmwamule wowonti wa‑abhʉzɨɨlɨzya hu nongwa yɨ lusʉʉbhɨlo lwenyu.
16 Leelo mubhombaje ɨshi hu woloolo na hu nshɨnshɨ.
Mubhanje nʉ mwoyo ʉnʼzelu,
pɨpo amwɨ mupatihɨɨnywe nʉ Kilisiti,
huje ɨbho bha bhayanga ilenga hu nongwa yɨ njendo zyenyu,
bhalolaje ɨnsoni.
17 Ɨnjanjile ɨsho,
pɨpo nkashele ʉNgʉlʉbhɨ ahwanza mulaviwe,
hwashi alaviwe hu nongwa ya‑abhombe ɨnyinza ashile aje mulaviwe hu nongwa ya‑abhombe ɨmbiibhi.
18-19 Wope ʉKilisiti ahalaviiwe,
ahafwa heeka lwene hu nongwa yɨ mbiibhi zyetu,
hwa huje wa‑ali nʼgolosu ahafwiye hu nongwa ya bha saga bhagolosu huje tɨtɨɨhane nʉ Ngʉlʉbhɨ.
Bhahanʼgoga hu habhaazyo ɨho ahali nʉ mʼbɨlɨ ʉgwa muntu.
Hwi‑ikhone lya Mʼpepo ʉMʼfinjile ahabhala hwa bhafwe bha bhahakʉngwɨlwe mu hoobhe,
hubhabhʉʉzye hu nongwa ya‑amene hwakwe na‑alongwe hwabho.
Ɨpo isiku ɨlya taatu ahazyʉha hwi‑ikhone lya Mʼpepo ʉMʼfinjile.
20 Abhafwe ɨbho,
bha bhɨɨbho bhahakhɨɨne ɨmandɨ hunʼtinishe ʉNgʉlʉbhɨ,
ʉNoowa lwa‑agomba ɨsafina.
ɄNgʉlʉbhɨ ahajimbile ɨmbiibhi zyabho afishe ɨpo ɨsafina lwa yagombwa.
Hu malishilo,
abhantu naana lwene bha bhahatʉʉha mu safina,
bha bhɨɨbho ʉNgʉlʉbhɨ ahabhafyʉlɨle huje bhagandi ayaziwe na mɨnzɨ.
21 Amɨnzɨ ɨgo shifwani shɨ lwozyo ʉlwo luhutifyʉla atɨ hu habhaazyo ɨha.
Ʉlwozyo ʉlwo saga luhuteefwa ʉkhandamanu ʉwɨ mʼbɨlɨ,
lyoli lilaganoe nʉ Ngʉlʉbhɨ ɨlyo libhombeha hu mwoyo ʉnʼzelu.
Ʉlwozyo ʉlwo luhutifyʉla atɨ hwi‑idala ɨlya‑azyʉshe hwa Yeesu ʉKilisiti.
22 ɄKilisiti ʉyo ahabhalile hu mwanya,
ɨshi akhɨɨye hu nʼkhono ʉgwa hu lɨɨlo ʉgwa Ngʉlʉbhɨ,
apantu apɨ nshɨnshɨ tee.
Ahubhalongozya abhantumi bha Ngʉlʉbhɨ peeka nɨ vipelwa vya vili ni‑ikhone na maha.