Adiime ɨshibhanza
5
Ɨshi ɨyanga na bhagoosi abhɨ vibhanza bha bhali mwaliimwɨ.
Anɨ nanɨ ɨndi nʼgoosi wamwenyu wɨ shibhanza,
ɨndi nʼsimishizi wɨ malabha ga Yeesu ʉKilisiti.
Nantele ɨsʉʉbhɨla ahwambɨɨlɨle ʉmwamu peeka nawo,
ʉKilisiti lwa waloleha nantele mu nsi.
Ɨshi ɨhubhalaabha amwɨ huje,
2 diimaji shinza ɨmpʉga ɨyo mupewiilwe nʉ Ngʉlʉbhɨ.
Nantele mugandi huyidiime ɨmpʉga ɨyo hwa‑abijiilizwe,
leelo hu mwoyo ʉgwɨ nseho nanshi ʉNgʉlʉbhɨ sha‑ahwanza.
Mugandi abhombe ɨmbombo zyenyu hu nongwa ya‑anyonywe ɨmpɨɨya,
lyoli muhwifumyaje hu mwoyo gwenyu gwonti.
3 Mugandi abhe bhakhali hwa bhantu ɨbho muhubhalongozya,
leelo ʉlemvu weenyu wubhanje shifwani shinza hwa bheene.
4 Nkashele mubhomba ɨsho,
ɨpo mwahayambɨɨlɨla ɨshʉʉbhalo ɨshimwamu ɨshɨ wʉʉmi ʉwa wiila na wiila hu habhaazyo lwa waloleha ʉNʼdiimi ʉnʼgoosi.
Ɨshʉʉbhalo ɨsho saga shahayinanjiha nka lumo.
5 Namwɨ mubhasahaala na mubhalɨndu mubhatinihaje abhalongozi bheenyu abhɨ shibhanza sha Ngʉlʉbhɨ.
Amwɨ mwenti,
mubhagoosi namwɨ mwa mulongozewa,
muhwiyisyaje huje mwavwanaje mwɨmwɨ hu mwɨmwɨ,
nanshi ɨNsimbo ɨMfinjile sha ziyiga,
“ɄNgʉlʉbhɨ ahubhakhaana bha bhahwisʉmba,
leelo bha bhahwiyiisya,
ahubhapeela ɨmpyana.”a
6 Ɨshi muhwiyisyaje mwɨmwɨ pa nsi yi‑ikhone lya Ngʉlʉbhɨ,
wope ahayihubhazʉvya hu habhaazyo haakwe ha hakhondɨɨye lwa haafiha.
7 Nʼneshelaji ʉNgʉlʉbhɨ amayɨmba geenyu gonti,
pɨpo ʉmwene ya‑ahubhasʉnga.
8 Muhwidiimaje na‑abhe maaso hu habhaazyo honti.
Ʉnʼnʉgʉ weenyu ʉSeetanob ahumʼmwanza ʉmuntu ʉwa hunʼteezye mu lwɨtɨho,
nanshi ɨnsama ɨyo ɨbhʉna,
ɨhumʼmenda ʉmuntu huje ɨnʼnie.
9 Ɨshi nʼkhaanaji ʉSeetano hwi‑idala ɨlya‑adandamale mu lwɨtɨho.
Nanshi sha mumɨɨnye,
abhamwenyu mu lwɨtɨho abhɨ nsi zyonti bhalabha nanshi amwɨ.
10 Mumanye huje lwa mwamala ayɨmvwe hu habhaazyo hashe,
ʉNgʉlʉbhɨ ahayihubhabhɨɨha abhe bhadandamazu,
ahayihubhasimishizya,
ahayihubhapeela ikhone nʉ lwalo ʉludandamazu mu lwɨtɨho lwenyu.
Ʉmwene yʉ Ngʉlʉbhɨ ʉwɨ mpyana yonti,
ya yʉʉyo ya‑ahabhakwiziizye ahwambɨɨlɨle ʉmwamu waakwe ʉwa wiila hu nongwa ɨya‑apatiihanywe nʉ Kilisiti.
11 ɄNgʉlʉbhɨ yʉʉyo alongozyaje wiila na wiila.
Aameni.
Ɨndamuho ɨzya hu malishilo
12 Ɨmbasimbiiye ɨkalaata ɨnɨ ashilile hwa Silwanoc ʉyo ɨmɨɨnye huje mwoziwa wamwetu ʉnʼnʉnjɨsu.
Nantele ɨmbasimbiiye ɨkalaata ɨndoodo ɨnɨ huje ɨmbajinjizye amooyo na hubhasimishizye ɨgo ga gasimbwilwe huje,
mpyana yɨ lyoli ɨya Ngʉlʉbhɨ.
Ɨshi mwamanya ɨnongwa ɨzyo,
mwɨmɨɨlɨle hu dandamazu humʼmwɨtɨshe.
13 Ɨmpʉga ya bhooziwa,
abhakʉndwe bheenyu abha mwi‑ibooma ʉmu mu Baabelid ɨbho bhasaluliilwe nʉ Ngʉlʉbhɨ,
bhahubhalamuha.
Nantele wope ʉmwana waanɨ mu lwɨtɨho,
ʉyo bhahunʼkwizya Maalʉko,
ahubhalamuha.
14 Mulamuhanaje hu kʉndwa ʉwɨ lyoli.
Bhooziwa mwa Kilisiti,
ʉtengaanu wubhanje naamwɨ mwenti.