Ɨkalaata ɨya hwande ɨya nʼsontwa
ʉPeeteli
ɄPeeteli ahubhalamuha abhooziwa
1
Anɨ nɨSiimoni Peeteli,
nɨnʼsontwa wa Yeesu ʉKilisiti,
a ɨhubhasimbila amwɨ mubhasalulwe bha Ngʉlʉbhɨ,
amwɨ mwa munyampɨɨne,
mwa muli bhajenu na‑akhale mu nsi ɨzi ɨzyɨ mikowa agɨ Ponto,
Galatiya,
Kapadokiya,
Aasiya nɨ Bisiniya.
2 Amwɨ muli bhantu bha Ngʉlʉbhɨ nanshi sha‑ahatalile hubhamanye na hubhasalule afume halɨ,
na hubhasangalusye hwi‑idala ɨlya Mʼpepo ʉMʼfinjile.
b Ahabhombile ɨgo huje munʼtinihaje ʉYeesu ʉKilisiti nantele huje ʉmwene abhasangalusye ashilile hwi‑idanda lyakwe.
c ɄNgʉlʉbhɨ abhonjelaje ɨmpyana nʉ tengaanu hu winji.
Ʉlusʉʉbhɨlo ʉlwɨ wʉʉmi
3 Ayɨmɨhwaje ʉNgʉlʉbhɨ,
ʉDaada ʉwa Mwɨnɨ weetu ʉYeesu ʉKilisiti!
Hu nkʉmbʉ yaakwe ɨngoosi,
ahatipaapa shipya ashilile hwi‑idala ɨlya hunʼzyʉsye ʉYeesu ʉKilisiti afume hwa bhafwe.
Nantele,
hwɨ‑ɨlyo tili nʉ lusʉʉbhɨlo ʉlwɨ lyoli
4 huje tahambɨɨlɨle ʉgaali ʉwa Ngʉlʉbhɨ ʉwo ahabhabhɨshɨɨye abhantu bhaakwe hu mwanya.
Ʉgaali ʉwo saga wunanjiha,
saga wubhola nantele saga wulala.
5 Ʉgaali ʉwo weenyu amwɨ,
mwa mudiimwa ni‑ikhone lya Ngʉlʉbhɨ hwi‑idala ɨlyɨ lwɨtɨho.
Mwahayidiimwa afishe mwahayihuwaaga ʉfyʉli wa wahayiloleha mu nsiku ɨzya hu malishilo.
6 Ɨshi,
seshelaji hu nongwa yɨ‑ɨzyo ʉNgʉlʉbhɨ zya‑ahayihubhabhombela,
poshe na‑aje,
hu habhaazyo ɨha hashe,
muhwanziwa azugumile hu nongwa yɨ njelo ɨnyinji ɨzyɨ waaji ʉwinji.
7 Ajimbe mu njelo ɨzyo hulolesya huje ʉlwɨtɨho lwenyu lwɨ lyoli.
Ʉlwɨtɨho ʉlwo lujelwa nanshi ɨsho bhahuyijela ɨzahaabu hwi‑idala ɨlya‑apembwe mu mwoto huje ɨbhe nyinza.
Ɨshi leelo,
humʼmwɨtɨshe ʉYeesu hwinza tee ashile ɨzahaabu yɨ‑ɨnanjiha.
Ɨpo ʉYeesu ʉKilisiti ahayihubhasʉmba,
hubhamwamishe na hubhapeele ɨnshɨnshɨ hu habhaazyo lwa‑ahwɨnza na hwilolesye pa pazelu.
8 Ʉmwene munʼgɨɨne peeka na‑aje,
saga munʼnolile,
nantele muhumʼmwɨtɨha peeka na‑aje,
saga muhunʼnola.
Ɨshi muli nʉ luseshelo ʉlugoosi lwa saga lugayangwa,
9 pɨpo muhwambɨɨlɨla ɨmpeesya ɨya humʼmwɨtɨshe,
ɨyo yɨ fyʉli wɨ mooyo geenyu.
10 Hu nongwa yɨ fyʉli weenyu ʉwo,
abhakuwi bhahanzaga tee huje bhawaaganye.
Bhahakuwile hu nongwa yɨ mpyana ya Ngʉlʉbhɨ ɨyo ahasɨbhɨlɨɨye hubhapeele amwɨ.
11 ɄMʼpepo wa Mʼfyʉli ʉyo ahali muuhati yaabho,
ahakuwile huje ʉMʼfyʉlid ahayilaviwa,
pamandɨ ahayibha nʉ mwamu.
Abhakuwi bha Ngʉlʉbhɨ ɨbho bhahanzile tee huje bhamanye ɨnongwa ɨzi zyahayibha habhaazyo wɨlɨ,
nantele zyahayihumʼmwaga wɨlɨ.
12 ɄNgʉlʉbhɨ ahabhiluliiye huje ɨnongwa ɨzyo bhahakuwaaga saga zyahali hu nongwa yaabho,
lyoli zyahali hu nongwa yeenyu amwɨ.
Ɨgo ga gɨɨgo mwahalʉmbɨlɨɨlwe na bhaala ɨbho bhahalʉmbɨlɨɨye ɨNongwa ɨNyinza ɨzya Yeesu ʉKilisiti.
Bhope ahabhalʉmbɨlɨɨye hwi‑ikhone lya Mʼpepo ʉMʼfinjile,
ʉyo ʉNgʉlʉbhɨ ahanʼsonteleziizye afume hu mwanya.
Ɨnongwa ɨzyo zya zyɨzyo bhope abhantumie bhanyonywa tee huzimanye.
Alembe hu sangalusu
13 Ɨshi,
muhwilɨnganyaaje nzɨɨla na‑abhe bhantu bha bhahwiziga,
bhɨɨhaji ʉlusʉʉbhɨlo lwenyu lwonti mu mpyana ɨyo mwahayambɨɨlɨla hu habhaazyo ɨho ʉYeesu ʉKilisiti lwa‑ahwɨnza.
14 Mubhe bhaana bha bhahunʼtiniha ʉNgʉlʉbhɨ.
Mugandi hwɨtɨshe nantele alondolezye ɨnsʉngwo zyenyu ɨmbiibhi ɨzyo mwahali nazyo,
hu habhaazyo ɨho mwahasɨɨle huyimanye ɨlyoli ɨya Ngʉlʉbhɨ.
15 Lyoli,
muhwanziwa abhe bhasangalusu hu njendo zyenyu zyonti,
nanshi ʉNgʉlʉbhɨ ʉyo abhasaluuye amwɨ,
sha‑ali nʼsangalusu.
16 Ɨnjanjile ɨsho,
pɨpo mu Nsimbo ɨMfinjile ʉNgʉlʉbhɨ ayiga,
“Mubhanje bhasangalusu,
pɨpo anɨ ɨndi nʼsangalusu.”f
17 ɄNgʉlʉbhɨ wa muhunʼkwizya mu mpuuto zyenyu huje,
“Wee Daada,”
ya yʉʉyo ya‑ahubhalonga abhantu bhonti alɨngaane nɨ mbombo zyabho sinta abaagule ʉmuntu.
Ɨshi,
munʼtinihaje tee hu habhaazyo ɨha ha mukhala mu nsi ʉmu nanshi abhajenu.
18 Ɨnjanjile ɨsho,
pɨpo mumɨɨnye huje ʉNgʉlʉbhɨ ahabhagombʉʉye huje mugandi abhe nɨ njendo zya saga zikhondɨɨye ɨzyo mwahambɨlɨɨye hwa bhamaama bheenyu.
ɄNgʉlʉbhɨ saga ahabhagombʉʉye hu vintu vya vinanjiha nanshi ɨmpɨɨya nɨ zahaabu,
19 lyoli ahabhagombʉʉye hwi‑idala ɨli‑idanda ɨlyɨ mwamu ɨlya Kilisiti.
Ʉmwene ahali nanshi ɨnyaana ngooleg ya saga ɨli nʉ waavu awe ʉlemazu nka wumo.
20 Shɨ‑ɨsɨɨle apelwe ɨnsi,
ʉNgʉlʉbhɨ ahali anʼsaluuye hu nsɨɨbho ɨzyo.
Leelo ahagʉʉla afishe hu habhaazyo ɨha aha hu malishilo,
ɨpo ahanʼneeta na hunʼnolesye pa pazelu hu nongwa yeenyu.
21 Hwi‑idala ɨlya Yeesu ʉKilisiti,
amwɨ muhumʼmwɨtɨha ʉNgʉlʉbhɨ,
ʉyo ahanʼzyʉsyɨzye afume hwa bhafwe na humʼpeele ʉmwamu.
Hwɨ‑ɨlyo,
muhumʼmwɨtɨha ʉNgʉlʉbhɨ na hunʼsʉʉbhɨle.
22 Amwɨ mulemba alɨngaane nɨ manyizyo ɨzyɨ lyoli hu nongwa ya Yeesu ʉKilisiti.
Hwi‑idala ɨlyo,
amooyo geenyu gasangalusiiwe huje mubhaganaje abhamwenyu hu mwoyo ʉnʼgolosu.
Ɨshi mugananaje hu mwoyo gwonti.
23 Muhwanziwa mubhe nʉ lugano ʉlwu,
pɨpo amwɨ mupapwilwe shipya.
Apaapwe ʉhwu saga hubha nanshi apaapwe na bhapaafi abhɨ mʼbɨlɨ,
pɨpo ʉwʉʉmi ʉwɨ mʼbɨlɨ,
ʉmalishilo waakwe hwa hufwe.
Lyoli mupapwilwe huje mubhe nʉ wʉʉmi ʉwa wiila ʉwo wufumilana ni‑izwi lya Ngʉlʉbhɨ.
Izwi ɨlyo lili nʉ wʉʉmi,
nantele lya wiila na wiila.
24 ƗNsimbo ɨMfinjile ziyiga,
“Shila muntu ali nanshi isole,
nʉ mwamu waakwe wuli nanshi ʉweezya ʉwa mwi‑igona.
Amasole gahwʉma nʉ weezya wulagala,
25 leelo izwi lya Mwɨnɨ ʉNgʉlʉbhɨ lilemba wiila.”
h
Izwi ɨlyo, Nongwa Nyinza ɨzyo mwahalʉmbɨlɨɨlwe hu nongwa ya Yeesu ʉKilisiti.