Alondolezye ɨshifwani ɨsha Yeesu
12
Ɨshi,
tili nɨ mpʉga ɨngoosi ɨya bhasimishizi ɨbho bhatizyʉngʉʉlɨle.
Hu nongwa ɨyo,
natɨ teefwe shila hantu ɨho hahutizijila na huzileshe ɨmbiibhi ɨzyo zihutigwisya.
Nantele tidandamalaje abhombe ɨgo ʉNgʉlʉbhɨ abhɨɨshɨle pitagaalila lyetu nanshi ɨsho ʉmuntu ashɨmbɨla mu lwɨlano hu jimbiilizu.
2 Tibhombe ɨsho ʉhwu tihumʼmwenya ʉYeesu ʉyo ahutilongozya mu lwɨtɨho,
afume hu habhaazyo ɨho tihwanda ahwɨtɨshe afishe hu malishilo.
Ʉmwene ʉYeesu ahajimbile ʉfwe pa shikhobheehanyo sinta alole ɨnsoni hu nongwa yɨ luseshelo ʉlwo lwahali pitagaalila lyakwe.
Ɨshi akhɨɨye hu nʼkhono ʉgwa hu lɨɨlo pi‑itengo ɨlyɨ shimwɨnɨ ɨlya Ngʉlʉbhɨ,
apantu apɨ nshɨnshɨ tee.
3 Musɨɨbhe ɨgo gahamʼmwajile ʉYeesu nɨ‑ɨsho ahali ajimbiilila hu gaala ɨgo abhabhomba mbiibhi bhahali bhahunʼdalisizya,
huje mugandi alite na‑atengushe ʉmwoyo.
4 Poshe mudandamala amene ɨmbiibhi,
hwope ɨsho musɨɨle saga mulwiye ʉlʉgʉ afishe ahwitishe idanda lyenyu.
5 Wɨlɨ,
mwɨwɨɨlwe amazwi gaala ɨgo ʉNgʉlʉbhɨ ahali ahubhabhʉʉzya amwɨ mwa muli bhaana bhaakwe lwa‑ahubhajinjizya ʉmwoyo?
ɄNgʉlʉbhɨ ahayanjile ahajile,
“Aawe wʉmwana waanɨ,
tejeelezya!
Ʉgandi hugasyonshele ɨgo ʉMwɨnɨ waaho ahusunda,
nantele ʉhwipeelaje ʉmwoyo
lwa‑ahudaamila paala pʉ‑ʉteega.
6 ɄMwɨnɨ ahumʼpeela ʉlufundo shila muntu
ʉyo ʉmwene ahunʼgana.
Nantele ahumʼpeela ʉlufundo shila muntu
ʉyo ʉmwene amʼmwɨtɨɨshe huje mwana waakwe.”a
7 Ɨshi jimbililaji hu habhaazyo ɨho ʉNgʉlʉbhɨ ahubhafunda.
Abhomba ɨsho hu nongwa ɨya huje amwɨ muli bhaana bhaakwe.
Ɨnjanjile ɨsho,
pɨpo nʉʉmo ʉmwana wowonti ʉyo saga afundwa nʉ yise waakwe.
8 ɄNgʉlʉbhɨ ahubhafunda abhaana bhaakwe bhonti.
Ɨshi nkashele ʉNgʉlʉbhɨ saga ahubhafunda,
mumanyaje huje amwɨ muli bhaana bhasosi,
saga muli bhaana bhaakwe.
9 Nkashele tihubhatiniha abhapaafi bheetu abhɨ shimʼbɨlɨ ɨbho bhahali bhahutifunda,
wɨlɨ,
saga tihwanziwa hunʼtinishe tee ʉNgʉlʉbhɨ ʉDaada weetu ʉyo ali hu mwanya,
huje tibhe nʉ wʉʉmi ʉwa wiila na wiila?
10 Abhapaafi bheetu abhɨ shimʼbɨlɨ bhahutifunda hu habhaazyo hashe alɨngaane nɨ‑ɨsho bhasɨɨbha huje shinza.
Leelo ʉNgʉlʉbhɨ ahutifunda hu nongwa yeetu tɨɨtɨ huje tibhe peeka nawo hu sangalusu waakwe.
11 Nʉʉmo ʉmuntu ʉyo aseshela hu habhaazyo ha‑afundwa,
lyoli azugumila.
Leelo bhaala ɨbho bhamanyiiye abhe nɨ njendo ɨnyinza hwi‑idala ɨlya‑afundwe,
bhabha nʉ tengaanu na‑abhombe ɨgo gakhondɨɨye pitagaalila lya Ngʉlʉbhɨ.
12 Ɨshi zipeelaji amaha ɨnyoobhe zyenyu ɨzyo zili ndedebhazu na manama geenyu huje mwɨmɨɨlɨle shinza.b
13 Shililaji mu madala ga gagolʉʉshe,
huje bhaala bha bhali na manama amalemazu bhagandi abʉmɨle na‑agwe,
lyoli bhapone.c
Ɨnsundo hwa bhooziwa
14 Amwɨ mubhooziwa mubhamwetu,
mubagaje akhale hu tengaanu na bhantu bhonti.
Nantele mubagaje abhe bhasangalusu mu lemvu weenyu,
pɨpo nʉʉmo ʉmuntu ʉyo abhajiiye hunʼnole ʉMwɨnɨ sinta abhe nʼsangalusu.
15 Mubhanje maaso huje,
asahasheele abhe ʉmuntu ʉwa‑apootwe huyaaje ɨmpyana ya Ngʉlʉbhɨ.
Asahasheele abhe ʉmuntu muuhati yeenyu wa‑ali nʉ mwoyo ʉnʼkhali ʉgwa‑abhe nanshi amalandazi amakhali agɨ makwi.
Ʉmuntu nanshi ʉyo,
ahubhataamya na hugabhɨɨshe maavu amooyo ga bhantu abhinji.
16 Mubhanje maaso huje,
asahasheele abhe ʉmuntu ʉyo ali mwegu awe saga ahumʼpuuta ʉNgʉlʉbhɨ,
nanshi ʉEsawu.
Ʉmwene ahakaziizye ʉgoosi waakwe ʉwa hwande apaapwe hu nongwa yɨ shalye ɨsha hu habhaazyo heeka lwene.d
17 Amwɨ mumɨɨnye huje ʉEsawu lwa‑ahwanza aje ʉyise waakwe anʼsaye nanshi ɨsho ɨhwanziwa hwa mwana ʉwa hwande apaapwe,
ʉyise waakwe ahakhaana.
Poshe ʉEsawu ahakhoolile tee,
leelo ʉyise waakwe ahakhaana hunʼsaye pɨpo ʉEsawu saga ahahaajile ahabhaazyo aha‑alaate nantele.
18 Amwɨ saga mufishile pi‑igamba ɨlyɨ Sinaayi nanshi aBhaizilaeeli,
igamba ɨlyo liloleha,
nantele bhabhajiiye hulikhate nɨ nyoobhe.
Saga mufishile pi‑igamba ɨlyo,
ɨlyo lyahali lihwaha ʉmwoto,
nɨ hiisi yahalikwinshiiye,
nɨ nkʉngʉ ɨngoosi yahavuguuye.
19 Nantele saga mufishile pi‑igamba ɨlyɨ Sinaayi ɨpo aBhaizilaeeli bhahʉmvwɨzye izwi igoosi ɨlya Ngʉlʉbhɨ hu habhaazyo ɨndudwe lwa zikhoola.
Lwa bhʉmvwa izwi liila,
aBhaizilaeeli bhahogʉʉpe tee,
bhahanʼnaabha ʉMoose huje ʉNgʉlʉbhɨ agandi ayanje nabho nantele.e
20 Bhahogʉʉpe tee,
pɨpo ʉNgʉlʉbhɨ ahalajiziizye ahajile,
“Hwope nkashele hanu awe muntu ʉyo ahulipalamansya igamba ɨli,
akhondɨɨye akhomwe na mawe hwope na‑afwe.”f
21 Gonti ɨgo gahafumiiye pi‑igamba ɨlyɨ Sinaayi gahabhoogofya tee abhantu,
hwope ʉMoose ahayanjile ahajile,
“Ɨyinga tee hu nongwa yɨ wooga.”g
22 Leelo amwɨ mufishile pi‑igamba ɨlyɨ Sayuuni,
pi‑ibooma ɨlyɨ Yelusaleemuh ɨlya hu mwanya.
Ibooma ɨlyo libooma lya Ngʉlʉbhɨ ʉyo ali mwʉmi.
Mwi‑ibooma ɨlyo bhabhʉngɨɨne hu luseshelo abhantumi ɨelufu nɨ elufu.
23 Amwɨ mufishile pa mpʉga ɨngoosi ɨya bhantu ɨbho ʉNgʉlʉbhɨ ayiga,
bhonti bhaana bhaakwe bha hwande,
ɨbho amataawa gaabho gasimbwilwe hu mwanya.
Mufishile pitagaalila lya Ngʉlʉbhɨ ʉyo ali Nʼnonzi wa bhantu bhonti.
Mufishile hu mwanya ʉhwo bhalɨɨho abhantu abhagolosu,
ɨbho ʉNgʉlʉbhɨ abhasangalusiizye.
24 Amwɨ mufishile hwa Yeesu ʉyo ahubhakʉndanya abhantu nʉ Ngʉlʉbhɨ mwi‑ilagano ipya.
Nantele,
mufishile hwi‑idanda lyakwe ɨlyo lyahitiishe pa shikhobheehanyo hu nongwa yɨ mbiibhi zyetu,
saga lya‑aweezezye ʉbhiibhi nanshi liila ɨlya Aabeli.i
25 Ɨshi mubhe muhunʼtejeelezya ʉyo ahubhasunda.
ɄNgʉlʉbhɨ ahabhapiiye ʉlufundo ʉlugoosi abhamaama bheetu ɨbho bhahali bhakhaana hunʼtejeelezye ʉMoose hu habhaazyo ɨho ahabhasundaga mu nsi.
Wɨlɨ,
tipone wɨlɨ,
nkashele saga tihunʼtejeelezya ʉNgʉlʉbhɨ hu habhaazyo ha‑ahutisunda afume hu mwanya?
26 Hu habhaazyo haala ɨho aBhaizilaeeli bhahʉmvwɨzye ʉNgʉlʉbhɨ ayanga pi‑igamba ɨlyɨ Sinaayi,
ɨnsi yonti yahayinga.
Leelo ɨshi ahalapile ahajile,
“Nahayiyinzya ɨnsi nantele,
saga nahayiyinzya ɨnsi yɨɨyo yɨɨnɨ,
lyoli hwope na hu mwanya.”j
27 Izwi ɨlyo liyiga,
“Nantele,”
lilolesya pa pazelu huje ɨvintu vyonti ɨvyo ʉNgʉlʉbhɨ ahavipelile mu nsi ɨnɨ,
vyahayiyinga na‑ayaziwe huje visagale ɨvintu ɨvyo saga vibhajiiye ayinje.
28 Ɨshi tibhe tihunʼsalifya ʉNgʉlʉbhɨ pɨpo atɨtɨshɨɨye huje tibhe hu wumwɨnɨ waakwek ʉwo saga wuyinga.
Timʼpuutaje ʉNgʉlʉbhɨ hwi‑idala ɨlyo lihunʼkhondeezya,
hwa hwiyiisye na hu nshɨnshɨ.
29 Ɨshi,
ʉNgʉlʉbhɨ weetu ali nanshi ʉmwoto ʉnʼkhali ʉgwo gupemba na‑alʉngʉlɨzye lwonti.