Ɨsho ɨhwanziwa ahunʼkhondeezye ʉNgʉlʉbhɨ
13
Jendelelaji aganane mwɨmwɨ hu mwɨmwɨ nanshi ɨsho ɨhwanziwa hwa bhooziwa.
2 Nantele jendelelaji hubhambɨɨlɨle abhajenu mu nyumba zyenyu,
pɨpo hwi‑idala ɨlya‑abhombe ɨsho,
abhantu bhamo bhahabhambɨlɨɨye abhantumi bha Ngʉlʉbhɨ sinta amanye.
3 Bhizuhaji bhaala ɨbho bhakʉngwɨlwe mu hoobhe,
mubhe nanshi huje namwɨ mukʉngwɨlwe peeka nabho.
Bhizuhaji bhaala ɨbho bhalaviwa,
mubhe nanshi huje namwɨ mulaviwa peeka nabho.
4 Ʉweeji wuhwanziwa atinihwe na bhantu bhonti,
nantele ʉnʼnume nʉ nʼshɨ bhasahabhe bheegu,
pɨpo ʉNgʉlʉbhɨ ahayihubhalonga abhantu bhonti ɨbho bhabhomba ʉweegu.
5 Mugandi abhe nɨ nsʉngwo ɨmbiibhi ɨzya‑agane ɨmpɨɨya,
lyoli muhobhohaje nɨ‑ɨvyo muli navyo.
ɄNgʉlʉbhɨ ahayanjile ahajile,
“Saga nahayihuleha awe saga nahayihuhwɨwa dumu.”a
6 Sha shɨɨsho tibhajiiye ayanje sinta wooga huje,
“ɄMwɨnɨ ya yʉʉyo ahunaavwa anɨ,
saga ɨhwogopa hohonti.
Wɨlɨ,
ʉmuntu anza humbombe yeenu?”b
7 Bhizuhaji abhalongozi bhaala ɨbho bhahali bhamanyizya izwi lya Ngʉlʉbhɨ.
Sɨɨbhaji ɨnjendo zyabho ɨnyinza ziila ɨzyo bhahali bhahuzibhomba mu lemvu waabho na‑alondolezye ʉlwɨtɨho lwabho.
8 ɄYeesu ʉKilisiti saga nʼgalunʼgalu.
Ʉmwene ali nanshi ɨsho ahali hu wandilo,
hu habhaazyo ɨha na wiila.
9 Mugandi alondolezye ɨmanyizyo ɨnjenu ɨzyɨ waaji nʉ waaji.
Amaha agɨ mooyo geenyu saga gafuma mu ndajizyo ɨzyɨ vyalye ɨzyo saga zihubhaavwa hohonti ɨbho bhalondolezya,
lyoli zifuma mu mpyana ya Ngʉlʉbhɨ.
10 ɄYeesu yʉ nsangu yeetu.
Abhantu bha bhajendeelela afumye ɨnsangu mwi‑isebhele ifinjile ɨlya Bhayahuudi saga bhahwɨtɨshɨlwa alye ɨnsangu ɨyo atɨ tili nayo.
11 Alɨngaane nɨ ndajizyo zya Moose,
ʉnʼsayi ʉnʼgoosi ʉwa Ngʉlʉbhɨ ahwega idanda ɨlyɨ vyʉma na‑afumye aPafinjile pa Pafinjile huje ʉNgʉlʉbhɨ abhakhobhoshele abhantu ɨmbiibhi zyabho.
Leelo ahwega ɨnyama ɨzyɨ vipelwa na huzipembe hwʉnzɨ yɨ pantu paala.
12 Sha shɨɨsho ʉYeesu wope ahalaviiwe na‑agogwe hwʉnzɨ yi‑ibooma ɨlyɨ Yelusaleemu,
huje abhasangalusye abhantu ɨmbiibhi zyabho hwi‑idala ɨli‑idanda lyakwe.
13 Shɨɨsho natɨ tinʼnondolezye hwʉnzɨ yi‑ibooma na‑ajimbiilile ɨnsoni nanshi ɨsho wope ahajimbile.
14 Tibhombe ɨsho pɨpo mu nsi ɨnɨ saga tili ni‑ibooma ɨlya wiila na wiila,
lyoli tigʉʉla abhale atʉʉshe mwi‑ibooma ɨlya hu mwanya ɨlyo lihwɨnza.
15 Ɨshi,
hwi‑idala ɨlya Yeesu,
tijendelelaje humʼmwamishe ʉNgʉlʉbhɨ.
Amazwi geetu aga humʼmwamishe galɨngaana nanshi ɨnsangu ɨyo tihumʼfumizya.
16 Jendelelaji hubhaavwe abhamwenyu na‑abhe palishimo nabho mu vintu ɨvyo muli navyo,
pɨpo abhombe ɨsho,
yɨ nsangu ɨyo ɨhunʼkhondeezya ʉNgʉlʉbhɨ.
17 Bhatinihaji abhalongozi bheenyu na hwiyiisye,
pɨpo abheene bhahwifumya hugalaabhile amooyo geenyu sinta alite.
Abheene bhahayisimishizya ɨmbombo yaabho pitagaalila lya Ngʉlʉbhɨ.
Ɨshi bhatinihaji huje bhabhanje bhabhomba ɨmbombo yaabho hu nseho.
Nkashele saga muhubhatiniha,
bhahayibhomba ɨmbombo hu zugumizu,
yope ɨmbombo yaabho ɨyo saga yahayibha ɨhubhaavwa amwɨ hohonti.
18 Jendelelaji hutilaabhile.
Timɨɨnye hu lyoli huje amooyo geetu saga gahutilonga lwonti,
pɨpo tihwanza abhombe ɨgo gali gɨ golosu hwa bhantu bhonti.
19 Ɨhubhalaabha tee huje,
mumputilaje hwa Ngʉlʉbhɨ huje ɨmbwele huliimwɨ nalinaali.
Amazwi aga hu malishilo
20 ɄNgʉlʉbhɨ ʉwɨ tengaanu ahanʼzyʉsyɨzye ʉMwɨnɨ weetu ʉYeesu ʉKilisiti ʉyo Nʼdiimi nʼgoosi wɨ ngoole,
hu nongwa ɨya hwitishe idanda lyakwe ɨlyo lyahasimishiziizye ilagano ɨlya wiila.
21 Ʉmwene ʉNgʉlʉbhɨ ajendelelaje hubhapeele amaha aga‑abhombe aminza,
ɨgo gɨ kʉndwe waakwe,
abhombe mu mooyo geenyu ɨgo gahunʼkhondeezya pitagaalila lyakwe hwi‑idala ɨlya Yeesu ʉKilisiti.
Ʉmwene amwamihwaje wiila na wiila.
Aameni!
22 Amwɨ mubhooziwa bhamwetu,
ɨhubhalaabha tee huje mubhanje mulondolezya amazwi mashe aga hubhajinjizye amooyo ɨgo ɨmbasimbiiye mu kalaata ɨnɨ.
23 Ɨhwanza mumanye huje ʉmwoziwa ʉwamwetu ʉTiimoti bhamʼmwiguliiye afume mu hoobhe.
Nkashele wɨnza nalinaali ɨpa ɨndɨɨho,
nahayɨnza nawo huliimwɨ huje tibhalamushe.