Ikhone ɨlyɨ lwɨtɨho ʉlwa bhantu abhɨ mandɨ
11
Humʼmwɨtɨshe ʉNgʉlʉbhɨ hwa hubhe nʉ simishizi aje gahayibhombeha gaala ɨgo tihugasʉʉbhɨla,
nantele hu hwɨtɨshe huje gɨ lyoli gaala ɨgo saga tihugalola ɨshi.
2 Hu nongwa yɨ lwɨtɨho lwabho ʉNgʉlʉbhɨ ahabhasʉmbɨle abhamaama bheetu.
3 Hwi‑idala ɨlya hwɨtɨshe,
timɨɨnye huje ʉNgʉlʉbhɨ ahapelile ɨmwanya nɨ nsi hwi‑izwi lyakwe.
Nantele timɨɨnye huje ʉNgʉlʉbhɨ ahapelile shila hantu afume hwa saga haloleha.
4 Hwi‑idala ɨlyɨ lwɨtɨho lwakwe,
ʉAabeli ahamʼfumiziizye ʉNgʉlʉbhɨ ɨnsangu shinza ashile ʉnʼkʉlʉ waakwe ʉKayini.
Ɨshi ʉNgʉlʉbhɨ ahanʼsimishizya ʉAabeli huje muntu wa‑ali nʼgolosu.
ɄNgʉlʉbhɨ ahambɨlɨɨye ɨnsangu yaakwe.
Poshe ʉAabeli ahafwiye,
hwope ʉlwɨtɨho lyakwe lujendeelela abhe shifwani shinza ɨsha hwejeshele huliitɨ afishe sanyʉʉnʉ.a
5 Hwi‑idala ɨlyɨ lwɨtɨho,
ʉHenoko ahanyeetulwa abhale hu mwanya sinta afwe.
Saga ahalolɨɨshe nantele hu nongwa ɨya huje ʉNgʉlʉbhɨ ahanʼnyetuuye abhale hu mwanya.
ƗNsimbo ɨMfinjile zisimishizya huje ahabhaazyo ʉNgʉlʉbhɨ sha‑asɨɨle hunʼnyeetule ʉHenoko abhale hu mwanya,
ʉHenoko ahali abhomba ɨgo gahunʼkhondeezya ʉNgʉlʉbhɨ.b
6 Nʉʉmo ʉmuntu wa‑abhajiiye ahunʼkhondeezye ʉNgʉlʉbhɨ sinta abhe nʉ lwɨtɨho.
Shila muntu ʉyo ahwanza humʼpuute ʉNgʉlʉbhɨ,
akhondɨɨye ahwɨtɨshe huje ʉNgʉlʉbhɨ alɨɨho na‑aje ahayihubhapeela ɨmpeesya ɨbho saga bhaleha ahumʼmwanze huje bhamanye.
7 Hwi‑idala ɨlyɨ lwɨtɨho,
ʉNoowa ahanʼtiniishe ʉNgʉlʉbhɨ lwa‑ahunʼsunda hwɨ‑ɨgo ga gahali gasɨɨle afumile.
Ɨpo ahalɨngaanya ɨsafina,
huje ʉNgʉlʉbhɨ abhafyʉle ʉmwene peeka na bhantu abha mu nyumba yaakwe,
na hubhalonje abhantu abha mu nsi ɨbho bhahali saga bhahumʼmwɨtɨha.
Afumilane nɨ‑ɨsho ʉNgʉlʉbhɨ ahamʼmaazizya ʉNoowa huje nʼgolosu pitagaalila lyakwe.c
Ikhone ɨlyɨ lwɨtɨho ʉlwa Abulahaamu na bhaholo bhaakwe
8 Hwi‑idala ɨlyɨ lwɨtɨho,
ʉAbulahaamu ahanʼtiniishe ʉNgʉlʉbhɨ lwa‑amʼmʉzɨɨzye huje asaame mu nsi yaakwe,
abhale mu nsi ɨyo ʉNgʉlʉbhɨ ahalapile humʼpeele.
ɄAbulahaamu ahasaamile mu nsi ɨyo,
poshe saga ahamɨɨnye ʉhwo ahali abhala.d
9 Hwi‑idala ɨlyɨ lwɨtɨho,
ʉAbulahaamu ahakhɨɨye mu nsi ɨyo nanshi ʉnʼjenu.
Ahakhɨɨye mwi‑isebhele nanshi ɨsho ʉIsaaka nʉ Yaakobo sha bhahakhɨɨye pamandɨ.
Hwope abheene bhahambɨlɨɨye ɨndapo yɨyɨɨla ɨyɨ nsi nanshi ɨsho ʉAbulahaamu ahambɨlɨɨye.
10 ɄAbulahaamu ahabhombile ɨsho hu nongwa ɨya huje ahali asʉʉbhɨla akhale mwi‑ibooma igoosi lya lili nʉ lwalo ʉludandamazu ʉlwo saga lunanjiha dumu.
Ibooma ɨlyo lya lyɨlyo ʉNgʉlʉbhɨ ahalisɨbhɨlɨɨye hulizenje yʉʉyo.
11 Hwi‑idala ɨlyɨ lwɨtɨho,
ʉNgʉlʉbhɨ ahamʼpiiye ʉSaala ʉnʼshɨ wa Abulahaamu ikhone ɨlya‑abhe nʉ lwanda na‑apaape ʉmwana,
poshe ahali nʼgʉmba nantele nʼgogolo.
e ɄSaala ahali ahwɨtɨha huje ʉNgʉlʉbhɨ nʼnʉnjɨsu nantele abhomba gaala ga‑alapile.
12 Ɨshi hwi‑idala ɨlya muntu weeka ʉAbulahaamu ʉyo ahali nʼgogolo tee,
f bhahapapwilwe abhantu abhinji ɨbho saga ʉbhajiiye abhaazye nanshi ɨnzota ɨzya hu mwanya awe ʉnʼsanga ʉwa mu nsʉmbi.
13 Abhantu bhonti ɨbho bhahafwiye sha bhali bhahumʼmwɨtɨha huje ʉNgʉlʉbhɨ ahayihubhapeela gonti ɨgo ahalapile hubhapeele.
Saga bhahambɨlɨɨye ɨgo ʉNgʉlʉbhɨ ahalapile hubhapeele,
leelo bhahali bhahugalola sha hutali na hugaseshele.
Abheene bhahali bhahwɨtɨha huje bhahali bhajenu nantele bhashila lidala mu nsi ɨnɨ.
14 Abhantu ɨbho bhahwɨtɨha ɨgo,
bhalolesya pa pazelu huje bhahwanza ɨnsi ɨyɨnjɨ ɨyo bhahayibha bhakhaaya.
15 Nkashele bhabhanga bhasɨɨbha hu nongwa yɨ nsi yaabho ʉhwo bhahafumile,
ɨshi handɨ bhaweelaga na‑abhale humwabho.
16 Leelo abhantu ɨbho bhahali bhanyonywa ɨnsi ɨnyinza tee ɨya hu mwanya.
Ɨnɨ yɨ nongwa ʉNgʉlʉbhɨ saga abha nɨ nsoni nkashele abhantu ɨbho bhahunʼkwizya huje yʉ Ngʉlʉbhɨ waabho,
pɨpo abhalɨnganyiziizye ibooma huula hu mwanya.
17 Hwi‑idala ɨlyɨ lwɨtɨho,
ʉAbulahaamu ahɨtɨɨshe humʼfumye nsangu ʉIsaaka hu habhaazyo ɨho ʉNgʉlʉbhɨ ahanʼjelile.
ɄAbulahaamu ya yʉʉyo ahambɨlɨɨye ʉlufingo afume hwa Ngʉlʉbhɨ,
leelo ahɨtɨɨshe ahumʼfumye ʉmwana waakwe wa‑ali mwene,g
18 poshe ʉNgʉlʉbhɨ ahali amʼmʉzɨɨzye ʉAbulahaamu huje,
“Ɨmpaapo yaaho yahayifuma hwa Isaaka.”h
19 ɄAbulahaamu ahali ahwɨtɨha huje,
ʉNgʉlʉbhɨ ali ni‑ikhone ɨlya hunʼzyʉsye ʉIsaaka.
Hwi‑idala ɨlyo,
ʉAbulahaamu ahamʼmwambɨlɨɨye nantele ʉIsaaka ʉyo ahali nanshi afwiye ɨpo ahabha mwʉmi nantele.
20 Hwi‑idala ɨlyɨ lwɨtɨho,
ʉIsaaka ahabhasayile abhaana bhaakwe ʉYaakobo nʉ Esawu hwɨ‑ɨgo gabhala‑afumile hwitagaalila.i
21 Hwi‑idala ɨlyɨ lwɨtɨho,
hu habhaazyo ʉYaakobo lwa‑apalamiiye afwe,
ahabhasayile abhaana bhabhɨɨlɨ abha Yoosefu na humʼpuute ʉNgʉlʉbhɨ lwa‑ali asugamiliiye ɨngoodo yaakwe ɨya‑ajendele.j
22 Hwi‑idala ɨlyɨ lwɨtɨho,
hu habhaazyo ʉYoosefu lwa‑apalamiiye afwe,
ahayanjile ɨnongwa ɨya Bhaizilaeeli ɨsho bhahayifuma mu nsi ɨyɨ Miisili.
Nantele ahabhalajizya huje,
bheeje amafupa gaakwe na‑abhale nago hugasyɨle mu nsi ɨyɨ Kaanani.k
Ikhone ɨlyɨ lwɨtɨho ʉlwa Moose
23 Hwi‑idala ɨlyɨ lwɨtɨho,
abhapaafi bha Moose bhahamʼfisile ʉMoose hu meezi gataatu lwa wapaapwa.
Bhahabhombile ɨsho hu nongwa ɨya huje ʉMoose ahapapwilwe mwinza,
saga bhahogʉʉpe hwope anangaanye ɨndajizyo ɨya mwɨnɨ ʉwa hu Miisili ɨya hubhagoje abhaana bhonti abhalume aBhaizilaeeli.l
24 Hwi‑idala ɨlyɨ lwɨtɨho,
hu habhaazyo ʉMoose lwa‑ali nʼgoosi,
ahakhaana huje ʉmwene mwana wa mwalɨ wa mwɨnɨ ʉFalaawo.
25 Ʉmwene ahasaluuye alaviwe peeka na bhantu abha Ngʉlʉbhɨ ashile ahwikhondeezye mu mbiibhi hu habhaazyo hashe.
26 ɄMoose ahalolile hwashi alaviwe hu nongwa ya Mʼfyʉlim huje,
wʉ tabhazi tee ashile huzyaje ɨmfuha zyonti ɨzyɨ nsi ɨyɨ Miisili.
Ahalolile ɨsho hu nongwa ɨya huje,
ahali agʉʉlɨla ɨmpeesya ɨyo ʉNgʉlʉbhɨ ahayihumʼpeela ɨnsiku ɨzya hwitagaalila.
27 Hwi‑idala ɨlyɨ lwɨtɨho,
ʉMoose ahasogola mu nsi ɨyɨ Miisili sinta ahwogope ilyoyo lya mwɨnɨ.
Ʉmwene ahajimbile hu nongwa ɨya huje,
ahali nanshi shiila ahunʼnola ʉNgʉlʉbhɨ ʉyo saga aloleha na maaso.
28 Hwi‑idala ɨlyɨ lwɨtɨho lwakwe,
ʉMoose ahabhombile ɨshikulukulu ɨshɨ Paasakan na hubhalajizye aBhaizilaeeli bhapashe idanda ɨlyɨ nyaana ngoole mu mabadalyango agɨ nyiiji ɨzyɨ nyumba zyabho.
Bhahakhondɨɨye abhombe ɨsho huje ʉnʼtumi ʉwa‑ayazye lwa‑ashila,
asahasheele hubhayazye abhaana bhaabho abha hwande.o
29 Hwi‑idala ɨlyɨ lwɨtɨho,
aBhaizilaeeli bhahafwɨmɨɨla ɨNsʉmbi ɨNshamamu lwɨ manama nanshi ɨsho abhantu bhajenda mu nsi ɨnyʉʉmu.
Leelo hu habhaazyo ɨho aBhamiisili bhope bhafwɨmɨɨla,
amɨnzɨ gahabhakwinshila,
bhahafwa bhonti.p
Ikhone ɨlyɨ lwɨtɨho ʉlwa bhantu abhanjɨ
30 Hwi‑idala ɨlyɨ lwɨtɨho,
aBhaizilaeeli bhahazyʉngʉʉla ʉlubhaga ʉlugoosi ʉlwa hwi‑ibooma ɨlyɨ Yeeliko hu nsiku pʉnga (7),
lwope lwahagwa.q
31 Hwi‑idala ɨlyɨ lwɨtɨho lwakwe,
ʉLaahabu ʉyo ahali nʼshɨ mwegu ahaponile abudwe.
Ahaponile pɨpo ahabhambɨlɨɨye abhanziilizi hu tengaanu.
r Leelo abhantu ɨbho saga bhahamʼmwɨtɨɨshe ʉNgʉlʉbhɨ bhahabudiilwe.
32 Amwɨ mubhooziwa mubhamwetu,
wɨlɨ,
ɨnjanje yeenu tee yɨ‑ɨgo?
Enya,
saga ɨndi na habhaazyo aha hubhabhʉʉzye hu nongwa yɨ lwɨtɨho ʉlwa Gidiyooni,
ʉBaalaki,
ʉSamusoni,
ʉYefute,
ʉDaudi,
ʉSamweli na bhakuwi abhanjɨ.
33 Hwi‑idala ɨlyɨ lwɨtɨho lwabho,
abhantu ɨbho bhahali bhamena ʉlʉgʉ ʉwo bhahali bhalwa nʉ wumwɨnɨ ʉwɨ nsi ɨzyɨnjɨ.
Bhahali bhalongozya hu golosu na hwambɨɨlɨle gaala ɨgo ʉNgʉlʉbhɨ ahalapile hubhapeele.
Nantele abhanjɨ bhahali na maha aga‑abibe amalomu gɨ nsama.
34 Hwi‑idala ɨlyɨ lwɨtɨho lwabho,
bhahali bhazimya ʉmwoto ʉnʼkhali,
bhahali bhapona abudwe na bhalʉgʉ bhaabho.
Saga bhahali na maha,
leelo ʉNgʉlʉbhɨ ahabhapeela amaha aga‑amene ʉlʉgʉ na hubhadaje abhalwi ɨbho bhahali bhafuma mu nsi ɨzyɨnjɨ.
35 Hwi‑idala ɨlyɨ lwɨtɨho,
abhashɨ bhamo bhahabhambɨlɨɨye abhaholo bhaabho afume mu fwe hu habhaazyo lwa bhazyʉha nantele.
Abhanjɨ bhahakhaanile huje bhabhɨɨhwe bhasatulwe pɨpo bhahalolile shinza alaviwe na‑agogwe ashile hunʼneshe ʉNgʉlʉbhɨ.
Bhahabhombile ɨsho huje ʉNgʉlʉbhɨ abhazyʉsye na hubhapeele ʉlemvu ʉwinza tee.
36 Bhamo bhahali bhahubhasʉʉsya na hubhakhome nɨ nsanzʉ.
Bhamo bhahali bhakʉngwɨlwe na manyololo na‑ataagwe mu hoobhe.
37 Nantele bhamo bhahali bhahubhakhoma na mawe,
bhamo bhahali bhahubhabhoola‑bhoola na bhamo bhahali bhahubhabuda na mamaajɨ agɨ lʉgʉ.
Bhamo bhahali bhapɨɨna,
bhahakwataga ɨnkwembe ɨzyɨ ngoole nɨ zyɨ mbuzi,
bhahali bhahubhalavya na hubhabhombele amabhiibhi aminji.
38 Abhantu ɨbho bhahayɨmbaga‑yɨmbaga mu lʉʉgwa na mu magamba,
bhahakhalaga mu magwenya na mu malɨndɨ.
Abhantu ɨbho bhahali bhalʉnjɨsu tee,
hwope saga bhahakhondɨɨye akhale mu nsi ɨyo.
39 Poshe abhantu bhonti ɨbho bha tihuziyanga ɨnongwa zyabho bhahasimishiziizye hwi‑idala ɨlyɨ lwɨtɨho lyabho,
hwope ɨsho nʉʉmo ʉyo ahambɨlɨɨye ɨgo ʉNgʉlʉbhɨ ahalapile.
40 ɄNgʉlʉbhɨ ahabhombile ɨsho hu nongwa ɨya huje,
ahali atilɨnganyiziizye ɨnongwa ɨnyinza tee huje ɨbho peeka naatɨ tambɨɨlɨle gaala ɨgo ahalapile hutipeele.