ABhaebulaniya 10

ɄYeesu nsangu ya wiila na wiila

Ɨndajizyo zya Moose shifwani shɨ mbombo ɨnyinza ɨzyo zyahayɨnza, leelo saga nyinza zyɨzyo. Sha shɨɨsho ɨnsangu ɨzyo abhantu bhafumya shila mwaha alɨngaane nɨ ndajizyo ɨzyo, saga zibhajiiye dumu hubhasangalusye abhantu ɨbho bhahumʼpuuta ʉNgʉlʉbhɨ. 2 Abhantu ɨbho bha bhahumʼpuuta ʉNgʉlʉbhɨ nkashele bhabhanga bhasangalusiiwe ɨmbiibhi zyabho lyoli, handɨ saga bhajendeelela ahwiyʉmvwe mu nsɨɨbho zyabho huje bhali nɨ mbiibhi. Nantele handɨ bhaleshile afumye ɨnsangu zyabho pɨpo ʉNgʉlʉbhɨ handɨ abhasangalusiizye heeka lwene. 3 Leelo ɨnsangu ɨzyo bhafumya shila mwaha zibha zihubhiizusya ɨmbiibhi zyabho, 4 pɨpo idanda ɨlyɨ mbuzi nɨ lyɨ hambakʉ saga lili na maha aga hwefwe ɨmbiibhi zya bhantu. 5 Sha shɨɨsho ʉKilisiti lwa‑ahɨnzɨle mu nsi, ahamʼmʉzɨɨzye ʉNgʉlʉbhɨ ahajile,

“Aawe saga ʉhwanza ɨnsangu ɨzyɨ vyʉma

hwope ɨnsangu ɨzyɨnjɨ,

leelo ʉmʼbɨlɨ gwanɨ ʉgubhɨɨshɨle nzɨɨla.

6 Aawe saga ʉkhondezewa nɨ nsangu ɨzya‑alʉngʉlɨzye

awe ɨnsangu ɨzyo abhantu bhahali bhafumya hu nongwa yɨ mbiibhi.

7 Ɨshi nahayanjile nahajile, ‘Wee Ngʉlʉbhɨ waanɨ! Anɨ ɨndi ɨpa

huje ɨmbe ɨbhomba ʉkʉndwe waaho,

nanshi ɨsho ɨsimbwilwe hu nongwa yaanɨ.’ ”

8 Ɨlya hwande ɨlyo ahamʼmʉzɨɨzye ʉNgʉlʉbhɨ ahajile, “Aawe saga ʉhwanza ɨnsangu ɨzyɨ vyʉma awe ɨnsangu ɨzya‑alʉngʉlɨzye, aawe saga ʉkhondezewa nɨ nsangu ɨzya‑alʉngʉlɨzye awe ɨnsangu ɨzyo abhantu bhahali bhafumya hu nongwa yɨ mbiibhi,” poshe ɨnsangu zyonti ɨzyo bhahali bhafumya alɨngaane nɨ ndajizyo zya Moose. 9 Ɨpo ahayanjile ahajile, “Wee Ngʉlʉbhɨ waanɨ! Anɨ ɨndi ɨpa huje ɨmbe ɨbhomba ʉkʉndwe waaho.” Ɨshi ʉNgʉlʉbhɨ ahazyefwizye ɨnsangu ɨzyo ɨzyɨ mandɨ, ahabhɨɨha ɨpo ɨnsangu ya Yeesu. 10 Ɨshi hu nongwa ya huje, ʉYeesu ʉKilisiti ahabhombile ʉkʉndwe wa Ngʉlʉbhɨ, ʉNgʉlʉbhɨ ahutisangalusya ɨmbiibhi zyetu hwi‑idala ɨlya Yeesu ahwifumye ʉmʼbɨlɨ gwakwe heeka lwene abhe nsangu.

11 Alɨngaane ni‑ilagano ɨlyɨ mandɨ, shila lisiku abhasayi bha Bhayahuudi bhahali bhahumʼmombela ʉNgʉlʉbhɨ na‑afumye ɨnsangu ziziila hahinji ɨzyo saga zyahabhajiiye dumu ahwefwe ɨmbiibhi. 12 Leelo ʉKilisiti ahahwifumiizye heeka lwene abhe nsangu huje atisangalusye ɨmbiibhi zyetu. Ʉmwene ya yʉʉyo wa‑ali nsangu ɨya wiila. Ɨshi akhɨɨye hu nʼkhono ʉgwa hu lɨɨlo ʉgwa Ngʉlʉbhɨ, apantu apɨ nshɨnshɨ tee. 13 Ʉmwene ali hu mwanya ʉhwo ajendeelela agʉʉlɨle afishe hu habhaazyo ɨho ʉNgʉlʉbhɨ ahayihubhabhɨɨha abhalʉgʉ bhaakwe pa nsi yi‑ikhone lyakwe. 14 Hwi‑idala ɨlya Yeesu ahwifumye heeka lwene, abhasangalusiizye abhooziwa bhaakwe wiila na wiila.

15 Wope ʉMʼpepo ʉMʼfinjile asimishizya ɨnongwa ɨzi huliitɨ huje zyɨ lyoli ahaga,

16 “ɄMwɨnɨ ʉNgʉlʉbhɨ ahayanjile ahajile,

‘Ɨli lya lilagano lipya

ɨlyo nahayibhɨɨha na Bhaizilaeeli ɨnsiku ɨzyo zya zihwɨnza.

Nahayibhɨɨha ɨndajizyo zyanɨ mu nsɨɨbho zyabho,

nahayihuzisimba mu mooyo gaabho.’ ”

17 Nantele ayanga huje,

“Saga nahayiizuha nantele ɨmbiibhi zyabho

awe ɨmbombo zyabho ɨmbiibhi.”

18 Ɨshi hu habhaazyo ɨho ʉNgʉlʉbhɨ abhakhobhoshɨɨye abhantu ɨmbiibhi, saga huhwanziwa afumye ɨnsangu hu nongwa ya hwefwe ɨmbiibhi nantele.

Abhooziwa bhali bhasatulwe abhale pitagaalila lya Ngʉlʉbhɨ

19 Amwɨ mubhooziwa mubhamwetu, hwi‑idala ɨli‑idanda lya Yeesu, atɨ tili bhasatulwe atʉʉshe aPafinjile pa Pafinjile sinta hwogope. 20 Hwi‑idala ɨlya‑afwe hwakwe, ʉmwene ahatiguliiye idala ipya lya lihutilongozya hu wʉʉmi huje tibhanje tisejeela pitagaalila lya Ngʉlʉbhɨ. Hwa huje tishilila mu wiizigo ʉwi‑igolole liila na‑atʉʉshe aPafinjile pa Pafinjile. 21 Atɨ tili nawo ʉNʼsayi ʉNʼgoosi ʉyo yʉ mwenyeelezi wa bhantu abhɨ nyumba ɨya Ngʉlʉbhɨ. 22 Ɨshi tibhanje tibhala pitagaalila lya Ngʉlʉbhɨ na mooyo aminza ɨgo gahumʼmwɨtɨha lyoli, pɨpo ʉNgʉlʉbhɨ atisangalusiizye amooyo geetu amabhiibhi hwi‑idala ɨli‑idanda lya Yeesu, na hugazelufye amabɨlɨ geetu na mɨnzɨ aminza. 23 Tidandamalaje tee hugakhate ɨgo tihugɨɨtɨha na hugasʉʉbhɨle, pɨpo ʉNgʉlʉbhɨ ʉyo ahalapile yʉ nʼnʉnjɨsu. 24 Nantele tavwanaje na‑aganane lwonti na‑abhombelane ɨmbombo ɨnyinza tɨɨtɨ hu tɨɨtɨ. 25 Tigandi hugaleshe amiiho geetu aga‑akhomaane peeka nanshi ɨsho abhantu abhanjɨ bhaleshile akhomaane. Lyoli tijendelelaje ajinjizanye amooyo tɨɨtɨ hu tɨɨtɨ, pɨpo timɨɨnye huje isiku ɨlya‑aweele ʉMwɨnɨ lili pa pɨɨpɨ.

26 Nkashele tijendeelela abhombe ɨmbiibhi sha tilolile hu habhaazyo ɨho timɨɨnye ɨlyoli ya Ngʉlʉbhɨ, ɨshi nɨɨmo ɨnsangu ɨyɨnjɨ ɨyo ɨbhajiiye hutisangalusye ɨmbiibhi. 27 Ɨshi husagala lwene agʉʉlɨle ʉlongwe ʉlwa Ngʉlʉbhɨ ʉlwo luhwogofya nʉ mwoto ʉgwo gwahayihubhayazya abhantu bhonti ɨbho bhahunʼkhaana ʉNgʉlʉbhɨ. 28 Ʉmuntu ʉyo ahali saga alondolezya ɨndajizyo zya Moose, ahali abudwa sinta nkʉmbʉ hu habhaazyo abhasimishizi bhabhɨɨlɨ awe bhataatu bhasimishiziizye huje lyoli abhombile ɨsho. 29 Sɨɨbhaji! Wɨlɨ, ʉlufundo lwahayibha wɨlɨ hwa muntu ʉyo ahunʼsyonshela ʉMwana wa Ngʉlʉbhɨ ni‑idanda ɨli‑ilagano lya lyahasangalusiizye ɨmbiibhi zyakwe? Wɨlɨ, ʉlufundo lwahayibha wɨlɨ hwa muntu ʉyo ahunʼsyonshela ʉMʼpepo ʉMʼfinjile wa‑ali nɨ mpyana? Lyoli, ʉlufundo lwahayibha lugoosi nantele lukhali tee. 30 Timɨɨnye huje ʉNgʉlʉbhɨ ahayanjile huje, “Aweezezye ʉbhiibhi mbombo yaanɨ, anɨ nɨɨnɨ nahayihumʼmwezezya ʉmuntu ʉbhiibhi.” Nantele ahayanjile ahajile, “ɄMwɨnɨ ʉNgʉlʉbhɨ ahayihubhalonga abhantu bhaakwe hu lyoli.” 31 Lyoli abhɨɨhwe mu longwe lwa Ngʉlʉbhɨ wa‑ali mwʉmi huhwogofya tee.

32 Leelo mwizuhaje ɨnsiku ɨzya hwande lwa muhwanda humʼmwɨtɨshe ʉKilisiti. Poshe mwahali muhugaaga amalabha amagoosi, hwope ɨsho mwahali mujimbiilila amalabha ɨgo. 33 Hu habhaazyo hamo abhantu bhahali bhahubhaliga na hubhaleetele amalabha pitagaalila lya bhantu abhinji. Hu habhaazyo ahanjɨ mwahali nʉ lwʉmvwano na bhaala ɨbho bhahali bhahugaaga amalabha nanshi ɨgo. 34 Mwahali muhubhalolela ɨnkʉmbʉ abhamwenyu ɨbho bhahapinyiilwe mu hoobhe. Nantele hu habhaazyo lwa bhahubhafyʉla ɨshʉʉma sheenyu, mwahali museshela mu mooyo geenyu pɨpo mwahamɨɨnye huje, muli navyo ɨvintu ɨvinza tee ɨvyo saga vimaliha dumu.

35 Ɨshi hu nongwa ɨyo, hwipeelaji ʉmwoyo pɨpo mwahayambɨɨlɨla ɨmpeesya ɨngoosi tee afume hwa Ngʉlʉbhɨ. 36 Mukhondɨɨye mubhanje mujimbiilila huje mubhe mubhomba ʉkʉndwe wa Ngʉlʉbhɨ. Hwi‑idala ɨlyo, mwahayambɨɨlɨla gaala ɨgo ʉNgʉlʉbhɨ ahalapile hubhapeele. 37 Ɨsimbwilwe mu Nsimbo ɨMfinjile huje,

“Hasyalile habhaazyo hashe tee,

ʉyo wa‑ahwɨnza, ahayɨnza, nantele saga ahayikhaabha.

38 Ʉmuntu waanɨ ʉyo abhaaziwa abhe nʼgolosu hwi‑idala ɨlyɨ lwɨtɨho,

ʉyo ahayibha nʉ wʉʉmi.

Leelo nkashele ʉmuntu ʉyo aleha humbɨnjɨɨlɨle anɨ, saga nahayikhondezewa nawo dumu.”

39 Atɨ saga tili nanshi abhantu ɨbho bhaleha humʼmɨnjɨɨlɨle ʉNgʉlʉbhɨ, ɨbho bhateejile. Lyoli tili peeka na bhaala ɨbho bhahumʼmwɨtɨha. Hwi‑idala ɨlyo, tifyʉlɨɨlwe.