Ʉzingatizu ʉwi‑ilagano ɨlyɨ mandɨ
9
Ilagano ɨlya hwande lyahali nɨ ndajizyo ɨzyo abhantu bhahali bhahuzitiniha hu habhaazyo ɨho bhahumʼpuuta ʉNgʉlʉbhɨ.
Nantele ilagano ɨlyo lyahali na pantu apafinjile apa humʼpuute ʉNgʉlʉbhɨ mu nsi ɨnɨ.
2 Apantu ɨpo pahazengwilwe isebhele hu nongwa ɨya humʼpuute ʉNgʉlʉbhɨ.
Isebhele ɨlyo lyahali nɨ mpanda zibhɨɨlɨ.
Ɨmpanda ɨya hwande yahali nɨ mpandaganya,
ɨpo bhahabhɨɨhaga ɨkolobooyi,
nɨ meeza ɨya‑abhɨɨshɨle ɨntogito pitagaalila lya Ngʉlʉbhɨ.
Ɨmpanda ɨya hwande ɨyo,
bhahali bhahuyikwizya aPafinjile.
3 Mwi‑isebhele ɨlyo mwahalɨɨho ʉwiizigo ʉwi‑igolole igoosi ɨlyo lyahali lipahanya ɨmpanda ɨya hwande nɨ ya bhɨɨlɨ.
Ɨmpanda ɨya bhɨɨlɨ bhahali bhahuyikwizya aPafinjile pa Pafinjile.
4 Mu mpanda ɨyo mwahali nɨ shipuuto ɨshɨ zahaabu ɨsho abhasayi bha Ngʉlʉbhɨ bhahali bhabhombela apembe na‑asushizye ɨvintu ɨvyo vyahali vinunshila tee.
Nantele lyahalɨɨho Ipogooso ɨlya Ngʉlʉbhɨ ɨli‑ilaganoa ɨlyo bhahalizyɨmɨle nɨ zahaabu ɨmbali zyonti.
Mwi‑ipogooso ɨlyo mwahali nɨ nsonta ɨyɨ zahaabu ɨyo yahali nɨ maanab nɨ ndɨɨsa ya Aaloni ɨyo yahamelile amatʉndʉ.
Nantele mwi‑ipogooso ɨlyo mwahalɨɨho amawe gabhɨɨlɨ ɨgo gahasimbwilwe ɨndajizyo ishʉmi ɨzi‑ilagano.c
5 Pa mwanya pi‑ipogooso ɨlyo zyahalɨɨho ɨholanyo ɨzyɨ vipelwa vibhɨɨlɨ ɨvyo vyahali vilolesya ʉmwamu wa Ngʉlʉbhɨ.
Ɨvipelwa ɨvyo vyahali na mapiho ɨgo gahakwinshiiye ipogooso ɨlyo,
ɨpo abhantu bhahali bhakhobhoshelwa ɨmbiibhi zyabho.
Leelo hu habhaazyo ɨha saga tibhajiiye hugayanje shinza gonti ɨgo nanshi sha gahali.d
6 Hu habhaazyo ɨho ɨvintu vyonti vitengɨɨnywe na‑abhɨɨhwe mu zingatizu ʉwinza,
abhasayi bhahatʉʉhaga shila lisiku mu mpanda ɨla ɨya hwande na humʼmombele ʉNgʉlʉbhɨ nanshi ɨsho yahali ɨhwanziwa.
7 Leelo ʉnʼsayi ʉnʼgoosi ʉwa Ngʉlʉbhɨ mwene lwene ya yʉʉyo ahali ahwɨtɨshɨlwa atʉʉshe mu mpanda ɨla ɨya bhɨɨlɨ aPafinjile pa Pafinjile,
wope ahali atʉʉha heeka lwene hu mwaha.
Nantele ahakhondɨɨye atʉʉshe ni‑idanda lyɨ vyʉma ɨlya humʼfumizye ʉNgʉlʉbhɨ ɨnsangu ɨya hwiyefwezye ɨmbiibhi zyakwe nɨ zya bhantu bhonti ɨbho bhabhombile sinta amanye.
8 Alɨngaane na miiho gonti ɨgo,
ʉMʼpepo ʉMʼfinjile ahutilanga huje idala ɨlya‑atʉʉshe aPafinjile pa Pafinjile lisɨɨle abhɨɨhwe pa pazelu hu nongwa ya huje isebhele ifinjile liila ɨlya hwande lisɨɨle libhomba ɨmbombo.
9 Ɨmbombo zyonti ɨzyo zyahali zibhombwa mwi‑isebhele liila shifwani shɨ mbombo ɨzyɨ habhaazyo ɨha.
Ɨnsangu ɨzyo bhabha bhafumya hwa Ngʉlʉbhɨ saga zibhajiiye azelufye amooyo ga bhantu ɨbho bhafumya ɨnsangu ɨzyo.
10 Amiiho ɨgo gahali gɨ vyalye,
ga‑amwele na ga hwisangalusye amabɨlɨ.
Gonti ɨgo gamaliishe hu habhaazyo ɨho ʉNgʉlʉbhɨ ahaleetile ʉzingatizu ʉpya.
11 Leelo ʉYeesu ʉKilisiti ayɨnzɨle huje abhe Nʼsayi Nʼgoosi ʉwɨ nongwa ɨnyinza ɨzyo zilɨɨho.
Ʉmwene ya yʉʉyo abhomba ɨmbombo mwi‑isebhele ifinjile ɨlyɨnjɨ ɨlyo linza nantele lilʉnjɨɨshe ashile liila ɨlya hwande.
Isebhele ɨlyo saga lyahazengwilwe na bhantu,
hwa huje lisebhele ɨlyo saga lya mu nsi ɨnɨ.
12 Ʉmwene ahatʉʉshɨle heeka lwene aPafinjile pa Pafinjile.
Saga ahatʉʉshɨle ni‑idanda ɨlyɨ mbuzi awe ɨlyɨ ngwata,
lyoli ahatʉʉshɨle ni‑idanda lyakwe yʉʉyo huje atigombole wiila.
13 Alɨngaane nɨ ndajizyo zya Moose,
abhasayi bha Ngʉlʉbhɨ bhahali bhasansa idanda ɨlyɨ mbuzi,
ɨlyɨ hambakʉ na malota gɨ ngwata hwa bhantu bha bhali bhaavu huje bhabhasangalusye amabɨlɨ gaabho.
14 Leelo idanda lya Kilisiti lili na maha tee ashile idanda ɨlyɨ vyʉma ɨvyo!
Hwi‑idala ɨlya Mʼpepo ʉwa wiila,
ʉmwene ahahwifumiizye hwa Ngʉlʉbhɨ abhe nsangu ɨyo ɨkwɨlana.
Idanda lyakwe lya lyɨlyo lihutisangalusya amooyo geetu hu nongwa yɨ mbiibhi ɨzyo zileeta ʉfwe,
huje timʼmombelaje ʉNgʉlʉbhɨ ʉyo wa‑ali mwʉmi.
15 Hu nongwa ɨyo,
ʉYeesu ya yʉʉyo ahubhakʉndanya abhantu nʉ Ngʉlʉbhɨ mwi‑ilagano ipya huje abhantu ɨbho ʉNgʉlʉbhɨ abhakwiziizye,
bhawaaje ʉwʉʉmi ʉwa wiila ʉwo ahalapile hubhapeele.
Ɨga gabhajiiye abhombeshe ɨsho hu nongwa ya‑aje,
ʉYeesu ahafwiye huje abhabhɨɨshe bhaawusu abhantu afume mu mbiibhi ɨzyo bhahali bhabhomba mwi‑ilagano ɨlyɨ mandɨ.
16 Nkashele ʉmuntu asimbile ɨndajizyo hu vintu ɨvyo ali navyo,
ɨndajizyo ɨzyo zibhomba ɨmbombo nkashele ʉmuntu ʉyo afwiye.
17 Ɨzyo zya‑ahalajiziizye zibha na maha,
nkashele ʉmuntu ʉyo ahasimbile afwiye,
leelo saga zibha na maha,
nkashele ʉmuntu ʉyo asɨɨle afwe.
18 Sha shɨɨsho hwope ilagano liila ɨlyɨ mandɨ saga lyahali na maha sinta ahwitishe idanda lyɨ vyʉma.
19 Hu habhaazyo ʉMoose lwa waamala abhaazye ɨndajizyo zya Ngʉlʉbhɨ pitagaalila lya bhantu bhonti aheejile idanda lyɨ ngwata nɨ lyɨ mbuzi,
ahasangaanya na mɨnzɨ.
Hu habhaazyo ɨho abhombile ɨsho,
ahasansiiye idanda ɨlyo ɨShitaabu ɨshɨ Ndajizyo na bhantu bhonti,
ashilile ʉwooya wɨ ngoole ʉshamamu ʉwo wahapinyiilwe mu hasamba hi‑ikwi ɨlyo bhahakwizyaga hisoopo.
20 Ɨpo ʉMoose ahabhabhʉʉzya abhantu bhonti ahaga,
“Ɨli lidanda ɨlyo lisimishizya ilagano lya Ngʉlʉbhɨ ɨlyo ahabhalajiziizye huje mubhe muhulilondolezya.”e
21 Shɨnɨɨsho,
ʉMoose ahasansiiye idanda isebhele ifinjile nɨ vintu vyonti ɨvyo bhahali bhabhombela hu habhaazyo ɨho bhahumʼpuuta ʉNgʉlʉbhɨ.
22 Alɨngaane nɨ ndajizyo zya Moose,
idanda lya lyɨlyo lisangalusya shila hantu.
Sinta lidanda ahwitishe,
ʉNgʉlʉbhɨ saga abhajiiye hubhakhobhoshele abhantu ɨmbiibhi zyabho.
Ahwifumye hwa Kilisiti
23 Isebhele nɨ vintu vyonti ɨvyo abhasayi bhahali bhabhombela afumye ɨnsangu,
vyahali shifwani shɨ vintu ɨvyo vili hu mwanya.
Isebhele nɨ vintu ɨvyo vyahali visangalusiwa hwi‑idala ɨli‑idanda lyɨ vyʉma,
leelo ɨvintu ɨvya hu mwanya vihwanziwa asangalusiwe nɨ nsangu ɨyo nyinza ashile idanda ɨlyo ɨlyɨ vyʉma.
24 ɄKilisiti saga ahatʉʉshɨle aPafinjile pa Pafinjile ɨpo pazengwilwe na bhantu,
ɨpo shifwani sha paala ɨpo pali hu mwanya.
Lyoli ahatʉʉshɨle aPafinjile pa Pafinjile hu mwanya ʉhwo hu habhaazyo ɨha ahutipuutila pitagaalila lya Ngʉlʉbhɨ.
25 Ʉnʼsayi ʉnʼgoosi ʉwa Bhayahuudi ahali atʉʉha aPafinjile pa Pafinjile shila mwaha ni‑idanda lyɨ vyʉma.
Leelo ʉKilisiti saga ahatʉʉshɨle hu mwanya,
huje ahwifumye abhe nsangu hahinji,
ahahwifumiizye heeka lwene.
26 Nkashele ʉKilisiti ahanziwaaga ahwifumye hahinji abhe nsangu nanshi ɨsho ʉnʼsayi ʉnʼgoosi ʉwa Ngʉlʉbhɨ ahali afumya ɨnsangu hahinji,
ɨshi handɨ akhondɨɨye ayɨmbe hahinji ahwande ɨpo ʉNgʉlʉbhɨ ahapelile ɨnsi.
Leelo ʉmwene mu nsiku ɨzi ɨzya hu malishilo,
ahɨnzɨle na hwifumye abhe nsangu heeka lwene huje atisangalusye ɨmbiibhi zyetu.
27 Nanshi ɨsho shila muntu afwa heeka lwene,
lwa waafwa,
ʉNgʉlʉbhɨ ahunʼnonga,
28 shɨɨsho ʉNgʉlʉbhɨ ahamʼfumiizye ʉKilisiti huje afwe na‑abhe nsangu heeka lwene,
huje ʉNgʉlʉbhɨ abhakhobhoshele abhantu abhinji ɨmbiibhi zyabho.
Nantele ʉKilisiti ahayɨnza ʉlwa bhɨɨlɨ.
Saga ahayɨnza huje ʉNgʉlʉbhɨ abhakhobhoshele abhantu ɨmbiibhi,
lyoli ahayɨnza hubhapeele ʉfyʉli abhantu ɨbho bhahunʼsʉʉbhɨla hu dandamazu.