ɄNʼsayi ʉNʼgoosi ʉwi‑ilagano ipya
8
Ɨnongwa ɨngoosi mwɨ‑ɨzyo zyonti zya zyɨzi,
atɨ tili nawo ʉNʼsayi ʉNʼgoosi ʉwɨ waaji ʉwo.
Ʉmwene akhɨɨye hu nʼkhono ʉgwa hu lɨɨlo pi‑itengo ɨlyɨ shimwɨnɨ ɨlya Ngʉlʉbhɨ ʉwi‑ikhone,
apantu apɨ nshɨnshɨ tee hu mwanya.
2 Ʉhwo hu mwanya abhomba ɨmbombo ɨya Nʼsayi ʉNʼgoosi aPafinjile,
hwa huje muuhati yi‑isebhele ifinjile liila ɨlyɨ lyoli ɨlyo ʉmuntu saga ahazenjile,
lyoli yʉ Mwɨnɨ ʉNgʉlʉbhɨ yʉʉyo.
3 ɄNgʉlʉbhɨ abha ahunʼsalula ʉnʼsayi ʉnʼgoosi huje abhe afumya ɨnsangu,
shɨnɨɨsho ʉNʼsayi weetu ʉNʼgoosi wope akhondɨɨye abhe naho ahantu aha‑afumye hwa Ngʉlʉbhɨ.
4 Nkashele ʉYeesu ahajendelelaga akhale mu nsi ɨnɨ,
handɨ saga nʼsayi lwonti,
pɨpo mu nsi ɨnɨ bhalɨɨho abhasayi ɨbho bhafumya ɨnsangu alɨngaane nɨ ndajizyo zya Moose.
5 Gaala ɨgo abhasayi bha Ngʉlʉbhɨ bhabhomba aPafinjile,
shifwani lwene hwa gaala agɨ lyoli ɨgo galɨɨho aPafinjile huula hu mwanya.
Sha shɨɨsho ʉMoose lwa‑ahwilɨngaanya azenje isebhele ifinjile,
a ʉNgʉlʉbhɨ ahamʼmʉzɨɨzye huje,
“Lɨngaanya shila hantu alɨngaane na gonti ɨgo nahaʼlanjile hwi‑igamba liila ɨlyɨ Sinaayi.”b
6 Leelo ʉNgʉlʉbhɨ amʼpiiye ʉYeesu ɨmbombo ɨyɨ shisayi ɨyo nyinza tee ashile ɨla ɨya bhasayi abha hu wandilo.
ɄYeesu ya yʉʉyo ahubhakʉndanya abhantu nʉ Ngʉlʉbhɨ mwi‑ilagano ɨlinza ashile liila ɨlyo bhahali bhahulibhombela abhasayi ɨbho.
Nantele ilagano ɨlyo lizengwilwe pa lwalo ʉlwinza,
hwa huje pa mwanya yɨ lufingo ʉlwinza tee ashile ʉlufingo luula ʉlwi‑ilagano ɨlyɨ mandɨ.
7 Nkashele ilagano ɨlya hwande lyahakwɨlanaga,
ɨshi ʉNgʉlʉbhɨ handɨ saga walyanzaga ilagano ɨlya bhɨɨlɨ.
8 Leelo hu habhaazyo ɨho ʉMwɨnɨ ʉNgʉlʉbhɨ awulolile ʉbhiibhi wa bhantu bhaakwe,
ahayanjile ahajile,
“Tejeelezyi,
ahabhaazyo hahwɨnza
ɨho nahayibhɨɨha ilagano ipya
na bhantu abha hu Izilaeeli na bhantu abha hu Yuuda.
9 Ilagano ipya ɨli saga lyahayibha nanshi liila ɨlya hu wandilo
ɨlyo nahabhɨɨshɨle na bhamaama bhaabho,
hu habhaazyo ɨho nahali ɨhubhalongozya afume mu nsi ɨyɨ Miisili.
Abheene saga bhahali bhagolosu alondolezye ilagano lyanɨ ɨlya hu wandilo.
Ɨsho sha shɨɨsho saga nahabhasajiiye nantele.
10 Ɨli lya lilagano lipya
ɨlyo nahayibhɨɨha na Bhaizilaeeli
ɨnsiku ɨzyo zihwɨnza.
Nahayibhɨɨha ɨndajizyo zyanɨ mu nsɨɨbho zyabho,
nahayihuzisimba mu mooyo gaabho.
Anɨ nahayibha nɨ Ngʉlʉbhɨ waabho
bhope bhahayibha bhantu bhaanɨ.
11 Saga ahayibha ʉmuntu wowonti
ʉyo ahayibha ahumʼmanyizya ʉwamwabho,
awe humʼmʉʉzye ʉholo waakwe huje,
‘Ʉmʼmanye ʉMwɨnɨ ʉNgʉlʉbhɨ.’
Shila muntu afume hwa nʼdoodo afishe hwa nʼgoosi bhahayihumanya anɨ,
12 pɨpo nahayihubhakhobhoshela ɨmbiibhi zyabho,
saga nahayiizuha nantele ɨmbiibhi zyabho.”c
13 ɄNgʉlʉbhɨ lwa‑ayanga huje ilagano ɨli lipya,
alolesya huje ilagano ɨlya hwande lilalile.
Ɨshi ahantu hohonti ha halalile na‑ananjishe saga hali nɨ mbombo yoyonti,
hapalamiiye ateeje.