Ʉsayi ʉwa Melikizedeki
7
ɄMelikizedeki ʉyo ahali mwɨnɨ wa mwi‑ibooma ɨlyo bhahagaga Saleemu.
Nantele ahali nʼsayi wa Ngʉlʉbhɨ wa‑ali Nʼgoosi hu vintu vyonti.
ɄMelikizedeki ahakhomaana nʉ Abulahaamu ʉyo ahali afumile hu lʉgʉ hu habhaazyo ɨho ahabhamenile abhamwɨnɨ bhanɨ,
ɨpo ʉMelikizedeki ahanʼsaya ʉAbulahaamu.a
2 Wope ʉAbulahaamu ahamʼfumizya ɨshilʉndɨlo sheeka mu vilʉndɨlo ishʉmi afume mu vintu ɨvyo ahafyʉlɨle afume hu lʉgʉ na humʼpeele ʉMelikizedeki.
Itaawa ɨlya Melikizedeki hwa huje ʉmwɨnɨ wa‑ali nʼgolosu,
nantele bhayiga mwɨnɨ wa hu Saleemu hwa huje ʉmwɨnɨ ʉwɨ tengaanu.
3 Ɨloleha huje abhapaafi bha Melikizedeki saga bhamanyiha,
nantele nʉʉmo wa‑amɨɨnye ɨshikholo shaakwe.
Apaapwe na‑afwe hwakwe saga humanyiha.
Ʉmwene nʼsayi wa wiila nanshi ʉMwana wa Ngʉlʉbhɨ.
4 Enya ɨsho ʉMelikizedeki sha‑ahali nʼgoosi!
Sha shɨɨsho wope ʉAbulahaamu ʉmaama weetu ahamʼfumizya ɨshilʉndɨlo sheeka mu vilʉndɨlo ishʉmi afume mu vintu ɨvyo ahafyʉlɨle afume hu lʉgʉ.
5 Alɨngaane nɨ ndajizyo zya Moose,
abhantu bhonti afume mu shikholo ɨsha Bhalaawi ɨbho bhasayi bha Ngʉlʉbhɨ,
bhakhondɨɨye ahwambɨɨlɨle ɨshilʉndɨlo sheeka mu vilʉndɨlo ishʉmi afume hwa Bhaizilaeeli abhamwabho.
Bhakhondɨɨye abhombe ɨsho,
poshe bhonti bhahali bhafuma hwa maama waabho ʉmo ʉAbulahaamu.b
6 Poshe ʉMelikizedeki saga ahafumile mu shikholo ɨsha Bhalaawi,
hwope ɨsho ahambɨlɨɨye ɨshilʉndɨlo sheeka mu vilʉndɨlo ishʉmi afume hwa Abulahaamu.
ɄMelikizedeki ahanʼsaya ʉAbulahaamu ʉyo ʉNgʉlʉbhɨ ahalapile hunʼsaye.
7 Shila muntu amɨɨnye huje,
ʉwi‑ikhone ya yʉʉyo ahunʼsaya ʉnʼdoodo.
8 Nantele abhasayi ɨbho afume mu shikholo ɨsha Bhalaawi ɨbho bhahwambɨɨlɨla ɨshilʉndɨlo sheeka mu vilʉndɨlo ishʉmi,
bhantu ɨbho bhafwa.
Leelo ʉMelikizedeki ʉyo ahambɨlɨɨye ɨshilʉndɨlo sheeka mu vilʉndɨlo ishʉmi afume hwa Abulahaamu,
ayangwa huje ali mwʉmi afishe sanyʉʉnʉ.
9 Ɨshi tibhajiiye ayanje huje hwope ʉLaawi ʉyo abhantu abhɨ shikholo shaakwe bhahwambɨɨlɨla ɨshilʉndɨlo sheeka mu vilʉndɨlo ishʉmi,
wope ahafumiizye ɨshilʉndɨlo sheeka mu vilʉndɨlo ishʉmi hwa Melikizedeki ashilile hwa Abulahaamu.
10 Hu habhaazyo ɨho ʉMelikizedeki lwa‑ahakhomɨɨne nʉ Abulahaamu,
ʉLaawi ahali asɨɨle apaapwe.
Ʉsayi ʉwa Yeesu wuli nanshi ʉwa Melikizedeki
11 Poshe ʉsayi ʉwa Bhalaawi wahali wulondolezya ɨndajizyo zya Moose,
hwope ɨsho ʉsayi ʉwo saga wahatinihwilwe.
Hu nongwa ɨyo,
wahali wuhwanziwa ʉsayi ʉwɨnjɨ nanshi ʉwa Melikizedeki,
ʉwo saga wahali nanshi ʉwa Aaloni.
12 Nantele nkashele ʉsayi wugaluuhana,
hwope ɨndajizyo zyope zigaluuhana.
13 Ʉnʼsayi ʉyo ʉnʼjenu ʉyo ayangwa ɨpa yʉ Mwɨnɨ weetu ʉYeesu ʉyo saga ahali Nʼnaawi.
Saga ahalɨɨho ʉmuntu wowonti afume mu shikholo shaakwe ʉyo ahali abhomba ɨmbombo ɨyɨ sayi.
14 Ɨmanyihɨɨne huje ʉmwene ahafumiiye mu shikholo ɨsha Yuuda,
nantele hu habhaazyo ɨho ʉMoose ahayangaga hu nongwa ya bhasayi bha Ngʉlʉbhɨ,
saga ahayanjile ɨshikholo ɨsho.
15 Ɨnongwa ɨzyo zyɨ‑ɨyanga zili pa pazelu tee,
pɨpo ʉnʼsayi ʉwɨnjɨ ʉyo ali nanshi ʉMelikizedeki afumiiye.
16 Ʉmwene saga ahali nʼsayi wa Ngʉlʉbhɨ hwa‑alʉnjɨshe ɨndajizyo ɨyo ɨyiga,
abhasayi bhafume mu shikholo ɨsha Laawi lwene,
lyoli ahali nʼsayi hu maha agɨ wʉʉmi waakwe ʉwo saga wuli nʉ malishilo.
17 Nanshi ɨsho ɨsimbwilwe mu Nsimbo ɨMfinjile huje,
“Aawe we nʼsayi wiila
nanshi ɨsho ʉMelikizedeki sha‑ahali.”c
18 Ɨsho ʉNgʉlʉbhɨ ahefwizye ɨndajizyo ɨla ɨya hu wandilo hu nongwa ya huje saga yahali ni‑ikhone,
nantele saga yahali nɨ mbombo yoyonti.
19 Hu nongwa ɨyo,
ɨndajizyo ɨyo saga yahavwaga hohonti,
ʉNgʉlʉbhɨ atipiiye ʉlusʉʉbhɨlo ʉlwɨnjɨ ʉlwo lwinza tee,
ʉlwo luhutibhɨɨha abhe mu pɨɨpɨ nʉ mwene.
20-21 Hu habhaazyo ɨho aBhalaawi bhahali bhabhɨɨhwa abhe bhasayi bha Ngʉlʉbhɨ,
ʉNgʉlʉbhɨ saga ahalapile hohonti hu bheene.
Leelo hu habhaazyo ɨho ʉNgʉlʉbhɨ ahumʼmɨɨha ʉYeesu abhe nʼsayi,
ahalapile,
nanshi ɨsho ɨsimbwilwe mu Nsimbo ɨMfinjile huje,
“ɄMwɨnɨ alapile,
nantele saga ahayigalulanya ɨnsɨɨbho zyakwe dumu ahaga,
‘Aawe we nʼsayi wiila.’ ”d
22 Ɨshi hu nongwa ɨya‑alape ʉhwo,
ʉYeesu asimishiziizye ilaganoe huje linza tee ashile liila ɨlyɨ habhaazyo ha Moose.
23 Mu habhaazyo ahi‑ilagano ɨlyɨ mandɨ,
abhasayi bhahali bhinji.
Saga bhahajendelɨɨye abhombe ɨmbombo zyabho hu nongwa ya huje bhahali bhafwa.
Hu nongwa ɨyo,
abhasayi abhapya bhahakhondɨɨye hubhapyanile.
24 Leelo ʉYeesu nʼsayi wa Ngʉlʉbhɨ wiila hu nongwa ya huje ʉmwene mwʉmi wiila.
25 Hu nongwa ɨyo,
ʉmwene ali ni‑ikhone ɨlya hubhafyʉle abhantu bhonti ɨbho bhabhala hwa Ngʉlʉbhɨ ashilile hwa mwene,
pɨpo ʉmwene ali mwʉmi wiila na wiila,
ahubhapuutila hwa Ngʉlʉbhɨ hu habhaazyo honti.
26 Ʉnʼsayi ʉnʼgoosi ʉwɨ waaji ʉwo ahwanziwa tee huliitɨ pɨpo ʉmwene mʼfinjile,
nʼgolosu nantele saga ahabhombile ɨmbiibhi zyozyonti.
ɄNgʉlʉbhɨ ahamʼmɨɨshɨle paayo afume hwa bhabhomba mbiibhi,
f ahanʼzʉvya abhale hu mwanya.
27 Abhalongozi bha bhasayi bha Ngʉlʉbhɨ bhahali bhahwanziwa afumye ɨnsangu hu nongwa yɨ mbiibhi zyabho.
Hu habhaazyo ɨho bhabhombile ɨsho,
bhahali bhafumya ɨnsangu ɨzyɨnjɨ hu nongwa yɨ mbiibhi zya bhantu abhanjɨ.
Nantele bhahali bhabhomba ɨsho hahinji hahinji.
Leelo ʉYeesu saga ahabhombile nanshi abhalongozi bha bhasayi ɨbho.
Ʉmwene ahahwifumiizye pa shikhobheehanyo heeka lwene hu nongwa yɨ mbiibhi zya bhantu bhonti.
28 Alɨngaane nɨ ndajizyo zya Moose,
abhantu bhahali bhabhɨɨhwa abhe bhasayi poshe bhahali bhateega mu madala aminji.
Leelo hu habhaazyo ahatali lwa haashila,
ʉNgʉlʉbhɨ hwi‑idala ɨlya‑alape ahamʼmɨɨshɨle ʉMwana waakwe abhe Nʼsayi Nʼgoosi ʉyo atinihwilwe wiila.