6
Hu nongwa ɨyo,
tigandi ajendeelele asyale mu manyizyo ziziila ɨzyo tahamanyiiye tee hu nongwa ya Kilisiti hu wandilo,
lyoli tijendelelaje adandamale amanyile ɨmanyizyo ɨzyɨnjɨ huje tibhe bhasundwe ɨbho bhajinile mu lwɨtɨho.
Tileshe abhɨɨshe ʉlwalo nantele mu manyizyo ɨzya‑alaate hu nongwa yɨ mbombo ziila ɨzyo zileeta ʉfwe nɨ‑ɨsho tahamʼmwɨtɨɨshe ʉNgʉlʉbhɨ.
2 Tigandi abhe tiweelela amanyile ɨmanyizyo ɨzyɨ lwozyo,
ɨzya hubhapuutile abhooziwa hwi‑idala ɨlya hubhabhɨɨshɨle ɨnyoobhe,
ɨzya‑azyʉshe hwa bhafwe nɨ zyɨ longwe ʉlwa wiila.
3 Nkashele ʉNgʉlʉbhɨ asʉngwa,
tɨnza‑ajendeelele alembe na‑ajine mu lwɨtɨho hwi‑idala ɨlyo.
4 Ɨshi,
mumanye huje hukhome hubhagalulanye abhantu ɨbho bhahapewiilwe ʉlukhozyo,
hwope bhahambɨɨlɨla ɨvikʉnjɨlwa afume hu mwanya,
bhahali nʉ lwʉmvwano nʉ Mʼpepo ʉMʼfinjile.
5 Nantele bhahalɨnjɨle ʉwinza ʉwi‑izwi lya Ngʉlʉbhɨ ni‑ikhone ɨlyɨ longozi ʉpya ʉwa Ngʉlʉbhɨ hu habhaazyo ha hahwɨnza.
6 Abhantu ɨbho lwa bhaaleha humʼmwɨtɨshe ʉNgʉlʉbhɨ,
tibhajiiye wɨlɨ hubhaweezye huje bhalaate ɨmbiibhi zyabho nantele?
Abhantu ɨbho bhahunʼkhomeela pa shikhobheehanyo ʉlwa bhɨɨlɨ ʉMwana wa Ngʉlʉbhɨ na hunʼsʉfwanye pa pazelu.
7 Ɨnsi ɨyo ɨhwambɨɨlɨla ɨmvula hahinji na hwezye ɨmbeyu ɨzyo zihumʼmwavwa ʉnʼnimi,
ɨnsi ɨyo ɨsayiwa nʉ Ngʉlʉbhɨ.
8 Leelo ɨnsi ɨyo ɨhwezya amimvwa na masankwa,
saga ɨhumʼmwavwa hohonti ʉnʼnimi,
lyoli ʉNgʉlʉbhɨ ahuyiguna.
Hu malishilo ahuyipemba mu mwoto.
9 Amwɨ bhakʉndwe bhaanɨ,
poshe ɨmbasimbiiye hu mazwi amakhali,
hwope ɨsho anɨ ɨndi nʉ simishizi huje mubhomba ɨnyinza ɨzyo zilolesya huje mufyʉlɨɨlwe.
10 Ɨshi ʉNgʉlʉbhɨ nʼgolosu,
saga abhajiiye ahwɨwe ɨmbombo ɨnyinza ɨzyo mumʼmombɨɨye.
Nantele saga abhajiiye ahwɨwe ʉkʉndwa wuula ʉwo munʼnolesiizye hwi‑idala ɨlya hubhaavwe abhooziwa abhamwenyu afume hu wandilo afishe ɨshi.
11 Ɨsʉngwa tee huje,
shila muntu abhe alolesya ʉdandamazu hwi‑idala lyɨlyo,
huje gaala ga musʉʉbhɨla gabhombeshe gonti.
12 Mugandi abhe bhoolo,
lyoli mwejeshelaje hwa bhaala ɨbho hwi‑idala ɨlya hwɨtɨshe na‑ajimbe,
bhambɨlɨɨye gaala ɨgo ʉNgʉlʉbhɨ ahalapile hubhapeele abheene.
Ɨndapo zya Ngʉlʉbhɨ zyɨ lyoli
13 Ɨmandɨ,
ʉNgʉlʉbhɨ lwa‑ahafinjile hwa Abulahaamu,
ahalapile hwi‑itaawa lyakwe yʉʉyo hu nongwa ya huje saga ahalɨɨho wowonti ʉyo ahali nʼgoosi ashile ʉmwene.
14 ɄNgʉlʉbhɨ ahalapile hwa Abulahaamu ahaga,
“Lyoli ɨnza husaye na hubhabhɨɨshe abha mu shikholo shaaho abhe bhinji.”a
15 Ɨshi ʉAbulahaamu ahagʉʉlɨle na‑ajimbe afishe ɨpo ʉNgʉlʉbhɨ ahabhombile gaala gonti ɨgo ahalapile hwa mwene.
16 Nkashele abhantu bhalapa,
bhalapa hwi‑itaawa lyʉ‑ʉla ʉyo nʼgoosi ashile abheene,
nantele alape ʉhwo husimishizya huje gaala gonti ɨgo bhahugayanga gɨ lyoli.
Abhombe ɨsho humalɨɨzya adaliihane.
17 ɄNgʉlʉbhɨ ahali ahwanza alolesye pa pazelu hwa bhantu ɨbho bhahayambɨɨlɨla gaala ɨgo ahafinjile,
huje saga ahayigalulanya.
Ɨshi sha shɨɨsho yɨ nongwa ahasimishiziizye ʉlufingo lwakwe hwi‑idala ɨlya‑alape.
18 ɄNgʉlʉbhɨ lwa wafinga na‑alape,
saga agalulanya dumu hu nongwa ya huje ʉmwene saga wi‑ilenga.
Ʉmwene abhombile ɨvintu ɨvyo vibhɨɨlɨ,
afinje na‑alape huje atijinjizye ʉmwoyo,
tibhe nʉ lusʉʉbhɨlo hu gaala ɨgo gahwɨnza hwitagaalila lyetu.
19 Ʉlusʉʉbhɨlo ʉlwo tili nalwo mu mooyo geetu luhutibhomba hwɨmɨɨlɨle shinza,
nanshi ɨsho ɨshijela ɨshimwamu shihuyibhomba ɨmeeli huje amabhilingwa gasahayibunshe.
Ʉlusʉʉbhɨlo ʉlwo yʉ Yeesu ʉyo ahatʉʉshɨle aPafinjile pa Pafinjile abhale hwa Ngʉlʉbhɨ ashilile pa wiizigo ʉwi‑igolole.b
20 ɄYeesu ahatagaliiye,
ahatʉʉha apantu ɨpo hu nongwa yeetu.
Wope abha Nʼsayi Nʼgoosi wa wiila nanshi ɨsho ʉMelikizedeki sha‑ahali.