ABhaebulaniya 4

Atʉʉye hwa bhantu bha Ngʉlʉbhɨ

Ɨndapo ɨya Ngʉlʉbhɨ ɨli shɨ‑ɨlɨɨho hwa bhantu atʉʉshe apantu apa‑atʉʉye. Ɨshi tibhanje tihwogopa huje asahasheele abhe ʉmuntu wowonti ʉwa‑apootwe atʉʉshe apantu ɨpo. 2 Natɨ tilʉmbɨlɨɨlwe ɨNongwa ɨNyinza hu nongwa ya pantu ɨpo apa‑atʉʉye nanshi ɨsho bhahalʉmbɨlɨɨlwe abhamaama bheetu. Leelo abheene hu habhaazyo ha bhahʉmvwɨzye ɨNongwa ɨzyo, saga zyahabhavwizye hohonti hu nongwa ya huje saga bhahazyɨtɨɨshe. 3 Atɨ ta tihumʼmwɨtɨha ʉNgʉlʉbhɨ, tahayitʉʉha apantu ɨpo apa‑atʉʉye. Leelo hwɨ‑ɨbho bha saga bhahamʼmwɨtɨha, ʉNgʉlʉbhɨ ahayanjile ahajile,

“Ɨshi nahaviitwa na‑alape, nahaga,

‘Saga nahayihubhɨtɨshɨla dumu abhantu ɨbho atʉʉshe apantu apa‑atʉʉye,

ɨpo ɨndɨngɨɨnye hu nongwa yaabho.’ ”

ɄNgʉlʉbhɨ ahayanjile ɨsho, poshe nkashele apantu ɨpo pahali nzɨɨla afume apele ɨnsi. 4 Enya ɨNsimbo ɨMfinjile ɨsimbwilwe hu nongwa yi‑isiku ɨlyɨ pʉnga (7) huje, “Pi‑isiku ɨlyɨ pʉnga, ʉNgʉlʉbhɨ ahatʉʉyɨle abhombe ɨmbombo zyakwe zyonti.” 5 Ɨnongwa ɨzya‑atʉʉye zisimbwilwe nantele apanjɨ nanshi ɨsho ziyangwilwe hwisinda huje,

“Saga nahayihubhɨtɨshɨla dumu abhantu ɨbho atʉʉshe apantu apa‑atʉʉye,

ɨpo ɨndɨngɨɨnye hu nongwa yaabho.”

6 Poshe abhamaama bheetu bhahali bha hwande alʉmbɨɨlɨlwe ɨNongwa ɨNyinza ɨzya‑atʉʉye, hwope ɨsho bhahapotiilwe atʉʉshe apantu ɨpo hu nongwa ya huje bhahali saga bhahugatiniha gaala ɨgo ʉNgʉlʉbhɨ ahali ayanga. Leelo hu nongwa ɨyo, abhantu abhanjɨ bhahayitʉʉha apantu ɨpo apa‑atʉʉye. 7 ɄNgʉlʉbhɨ ahabhɨɨshɨle isiku ɨlyɨnjɨ na hulikwizye “Sanyʉʉnʉ.” Ɨshi, hu habhaazyo ɨnsiku ɨnyinji lwa zyashila, ʉNgʉlʉbhɨ ahayanjile nantele hu nongwa ya pantu ɨpo ashilile hwa mwɨnɨ ʉDaudi nanshi ɨsho ɨsimbwilwe huje,

“Sanyʉʉnʉ, nkashele mwʉmvwa izwi lya Ngʉlʉbhɨ,

mugandi hugabhɨɨshe amooyo geenyu abhe makhome.”

8 Nkashele ʉYoshuwa wabhapeelaga abhantu isiku ɨlya‑atʉʉye, ʉNgʉlʉbhɨ saga wayangaga nantele hu nongwa yi‑isiku ɨlyɨnjɨ ɨlya‑atʉʉye. 9 Ɨshi, lili sha lilɨɨho isiku ɨlya‑atʉʉye ɨlyo ʉNgʉlʉbhɨ alɨngɨɨnye hwa bhantu bhaakwe, nanshi isiku liila ɨlyɨ Sabaato. 10 Ʉmuntu wowonti ʉyo ahayitʉʉha apantu ɨpo apa‑atʉʉye, ahayitʉʉya abhombe ɨmbombo zyakwe zyonti nanshi ɨsho ʉNgʉlʉbhɨ ahatʉʉyɨle lwa waamala apele ɨnsi. 11 Ɨshi, hu nongwa ɨyo, tidandamalaje atʉʉshe apantu ɨpo apa‑atʉʉye. Tibhanje tibhomba ɨsho huje asahabhe ʉmuntu wowonti ʉwa‑apootwe atʉʉshe hu nongwa ɨya‑asinte ahwɨtɨshe, nanshi ɨsho abhamaama bheetu bhahali bhabhomba.

12 Izwi lya Ngʉlʉbhɨ lili nʉ wʉʉmi nantele lili ni‑ikhone. Izwi ɨlyo lili nanshi imaajɨ ɨlyɨ lʉgʉ ɨlyo lili nʉ wooji hwonti na hwonti ashile amamaajɨ gonti. Nanshi ɨsho imaajɨ sha libhajiiye alase na‑atʉʉshe mwa muntu afishe mu mafupa gaakwe, shɨɨsho izwi lya Ngʉlʉbhɨ libhajiiye alase na‑atʉʉshe muuhati tee mu mwoyo gwa muntu na‑amanye ɨgo abhantu bhasɨɨbha nɨ‑ɨgo bhahwanza. 13 Nantele nashimo ɨshipelwa shoshonti ɨsho shihwifisile pitagaalila lya Ngʉlʉbhɨ. Lyoli ɨvintu vyonti vili pa pazelu pitagaalila lyakwe ʉmwene, naatɨ tahayiyanga pitagaalila lyakwe ɨmbombo zyetu zyonti ɨzyo tahali tihuzibhomba.

ɄYeesu Nʼsayi Nʼgoosi wa Ngʉlʉbhɨ

14 Amwɨ mubhooziwa mubhamwetu, tili nʉ Nʼsayi ʉNʼgoosi ʉyo yʉ Yeesu ʉKilisiti ʉMwana wa Ngʉlʉbhɨ, ʉyo ahabhalile na‑atʉʉshe hu mwanya. Ɨshi, hu nongwa ɨyo, tigakhataje ɨgo tihugɨɨtɨha. 15 ɄNʼsayi ʉNʼgoosi ʉwa Ngʉlʉbhɨ ʉyo ya yʉʉyo awumɨɨnye ʉdedebhazu weetu, pɨpo wope ahajeliilwe nʉ Seetano hu madala gaminji nanshi atɨ, leelo ʉmwene saga ahabhombile ɨmbiibhi. 16 Ɨshi, hu nongwa ɨyo, tibhale pitagaalila lya Ngʉlʉbhɨ ʉwɨ mpyana sinta wooga, huje atisaajile na hutilolele ɨnkʉmbʉ mu habhaazyo ahɨ mayɨmba.