ɄYeesu nʼgoosi ashile ʉMoose
3
Amwɨ mubhooziwa mubhamwetu,
amwɨ ɨbho ʉNgʉlʉbhɨ abhasaluuye peeka naatɨ abhe bhantu bhaakwe,
jendelelaji hunʼsɨbhɨɨlɨle ʉYeesu,
ʉyo Nʼsontwa nʉ Nʼsayi Nʼgoosi wa Ngʉlʉbhɨ.
2 ɄYeesu ʉyo ahali nʼnʉnjɨsu hwa Ngʉlʉbhɨ ʉyo ahanʼsaluuye,
nanshi ɨsho ʉMoosea wope ahali nʼnongozi nʼnʉnjɨsu wa bhantu abhɨ nyumba ya Ngʉlʉbhɨ,
aBhaizilaeeli.b
3 Ʉnʼzenji apeewa ɨnshɨnshɨ ashile ɨnyumba ɨyo azenjile,
sha shɨɨsho ʉYeesu wope akhondɨɨye amwamihwe tee ashile ʉMoose.
4 Shila nyumba ɨzengwa nʉ nʼzenji ʉmo,
leelo ʉNgʉlʉbhɨ ya yʉʉyo Mʼpeli wɨ vintu vyonti.
5 ɄMoose ahali mʼmomvi nʼnʉnjɨsu paahati ya bhantu abhɨ nyumba ɨya Ngʉlʉbhɨ.
Ɨmbombo yaakwe yahali ya hubhasimishizye abhantu ɨbho,
gaala gonti ɨgo ʉNgʉlʉbhɨ ahali asɨbhɨlɨɨye ayanje hwitagaalila.
6 Leelo ʉKilisitic ʉmwene Mwana nʼnʉnjɨsu ʉyo Mwɨmɨɨlɨli wa bhantu abhɨ nyumba ya Ngʉlʉbhɨ.
Natɨ tili bhantu bhaakwe nkashele tijendeelela adandamale na hwibaade mu gaala ɨgo tisʉʉbhɨla.
Ɨnsundo hu nongwa ya‑asinte ahwɨtɨshe
7 Ɨnɨ yɨ nongwa tihwanziwa atejeelezye ɨgo ʉMʼpepo ʉMʼfinjile ayanga mu Nsimbo ɨMfinjile huje,
“Sanyʉʉnʉ,
nkashele mwʉmvwa izwi lya Ngʉlʉbhɨ,
8 mugandi hugabhɨɨshe amooyo geenyu abhe makhome,
nanshi ɨsho abhamaama bheenyu bhahali bhakhaana alongozewe naanɨ
mu habhaazyo haala ɨho bhahali bhahunjela mu lʉʉgwa.
9 Ɨshi ʉhwo hu lʉʉgwa hwa hwʉhwo abhamaama bheenyu bhahali bhahunjela,
poshe nahabhabhombɨɨye amayele aminji hu maaha amashʉmi ganɨ.
10 Ɨyo yɨ nongwa ɨyo nahabhavitiliilwe abhantu ɨbho,
nahaga,
‘Abhantu ɨbha bhabhiibhi ɨnsiku zyonti,
bhantu ɨbho saga bhahwanza alondolezye idala lyanɨ.’
11 Ɨshi nahaviitwa na‑alape,
nahaga,
‘Saga nahayihubhɨtɨshɨla dumu abhantu ɨbho atʉʉshe apantu apa‑atʉʉye,
ɨpo ɨndɨngɨɨnye hu nongwa yaabho.’ ”d
12 Amwɨ mubhooziwa mubhamwetu,
mubhanje maaso huje asahabhe ʉmuntu wowonti paahati yeenyu ʉyo ali nʉ mwoyo ʉmʼmiibhi,
ʉyo saga ahwɨtɨha,
nantele ʉyo akhaana hunʼnondolezye ʉNgʉlʉbhɨ wa‑ali mwʉmi.
13 Leelo muhwijinjizyaje mwɨmwɨ hu mwɨmwɨ shila lisiku ɨlyo tihulikwizya huje,
“Sanyʉʉnʉ,”
huje musahasheele agobelwe nɨ mbiibhi na‑akhaane humʼmwɨtɨshe ʉNgʉlʉbhɨ.
14 Nkashele tidandamala hunʼsʉʉbhɨle ʉNgʉlʉbhɨ nanshi ɨsho tɨtɨɨshe afume hu wandilo afishe hu malishilo wɨ wʉʉmi weetu,
tili peeka nʉ Kilisiti.
15 Mwizuhaje ɨgo gasimbwilwe mu Nsimbo ɨMfinjile huje,
“Sanyʉʉnʉ,
nkashele mwʉmvwa izwi lya Ngʉlʉbhɨ,
mugandi hugabhɨɨshe amooyo geenyu abhe makhome
nanshi ɨsho abhamaama bheenyu bhahali bhakhaana alongozewe naanɨ.”e
16 Wɨlɨ,
bhantu wɨlɨ ɨbho hu habhaazyo lwa bhʉmvwa izwi lya Ngʉlʉbhɨ,
bhahakhaanile alongozewe nawo?
Wɨlɨ,
saga bha bhaala bhonti ɨbho bhahali bhalongozewa nʉ Moose afume mu nsi ɨyɨ Miisili?
17 Nantele,
bhantu wɨlɨ ɨbho ʉNgʉlʉbhɨ ahabhavitiliilwe hu maaha amashʉmi ganɨ?
Wɨlɨ,
saga bha bhaala bhonti ɨbho bhahabhombile ɨmbiibhi na‑afwe mu lʉʉgwa?
18 Nantele,
bhantu wɨlɨ ɨbho ʉNgʉlʉbhɨ ahalapile huje saga ahayihubhɨtɨshɨla dumu atʉʉshe apantu apa‑atʉʉye ɨpo alɨngɨɨnye hu nongwa yaabho?
Wɨlɨ,
saga bha bhaala bhonti ɨbho bhahakhaanile hunʼtinishe?
19 Ɨsho timɨɨnye huje abhantu ɨbho bhahapotiilwe atʉʉshe apantu ɨpo,
hu nongwa ya huje bhahakhaanile humʼmwɨtɨshe ʉNgʉlʉbhɨ.