Ɨnsiku ɨzya hu malishilo
3
Aawe ʉmanye shinza huje,
mu nsiku ɨzya hu malishilo,
hwahayibha amayɨmba amagoosi.
2 Abhantu bhahayihwisajilaga bhɨɨbho bheene,
bhahayihuziganaga ɨmpɨɨya,
bhahayihwisʉmbaga,
bhahayibha bhɨ mampʉlɨ.
Bhahayihunʼniga ʉNgʉlʉbhɨ,
saga bhahayihubhatiniha abhapaafi bhaabho,
saga bhahayisʉmba,
nantele saga bhahayisaaga aga Ngʉlʉbhɨ.
3 Saga bhahayibha nʉ kʉndwa,
saga bhahayibha nɨ nkʉmbʉ,
bhahayibha bhi‑ilenga,
saga bhahayihwijela.
Bhahayibha bhakhali,
saga bhahayanza aminza,
4 bhahayibha bhaneneelezi,
saga bhahayisaaga,
bhahayibha na mabaado.
Bhahayihuzigana haani ɨzya mu mʼbɨlɨ ashile hunʼgane ʉNgʉlʉbhɨ.
5 Bhahayiloleha aje bhooziwa,
leelo mu mooyo gaabho bhahayidaliha ikhone lya Ngʉlʉbhɨ.
Abhantu nanshi ɨbho,
ʉhwiyefwaje nabho.
6 Mwɨ‑ɨbho bhahwɨli bha bhahwitʉʉsya mu nyumba zya bhantu na hubhagobele abhashɨ abhalema bha bhakhɨɨtwe nɨ mbiibhi,
bhalongozewa nɨ nsʉngwo ɨmbiibhi.
7 Abhashɨ ɨbho bhamanyila ɨmanyizyo ɨnsiku zyonti,
leelo bhapootwa huzyaganye ɨzya nalyoli.
8 Abhantu ɨbho bha bhahubhagobela abhashɨ,
bhadindizya ɨlyoli nanshi ʉYaane nʉ Yambulea bhope sha bhahanʼdindizyaga ʉMoose.
b Bhananjiishe ɨnjeele,
nantele saga bhakhondɨɨye mu lwɨtɨho.
9 Leelo saga bhahayifiha napamo,
pɨpo ʉkwesu waabho wahayibha pa pazelu hwa bhantu bhonti,
nanshi ʉkwesu wa Yaane nʉ Yambule sha wahali pa pazelu.
ɄPaulo ahunʼnajizya ʉTiimoti
10 Leelo aawe,
ʉzyagɨɨnye shinza ɨmanyizyo zyanɨ,
ɨnjendo zyanɨ,
ɨnsɨɨbho zyanɨ,
ʉlwɨtɨho lwanɨ,
ʉjimbiilizu waanɨ,
ʉkʉndwa waanɨ na‑agʉlɨɨlɨle hwanɨ.
11 Nantele,
ʉmɨɨnye ʉlutaamyo lwanɨ,
amayɨmba gaanɨ na gaala ga gahanaajile hu mabooma agɨ Antiyokiya,
Ikoniya nɨ Lisitila.
Nahajimbile gonti,
wope ʉMwɨnɨ ahantʉʉlɨle huli zyonti.
12 Lyoli,
bhonti bha bhahwanza abhe bhooziwa mwa Yeesu ʉKilisiti,
bhahayiyɨmvwaga.
13 Leelo,
abhantu abhabhiibhi na bhi‑ilenga bhahayijendeelela abhe bhabhiibhi haani.
Bhahayigobelaga,
humo bhahayigobelwa bhope.
14 Leelo aawe,
ʉjendelelaje akhale mu mazwi gaala ɨgo wahamanyiziiwe na hugasimishizye huje gɨ lyoli,
pɨpo aawe ʉbhamɨɨnye bha bhahaʼmanyiziizye aawe.
15 Afume hu waana waaho,
ʉzimɨɨnye ɨNsimbo ɨMfinjile zya zibhajiiye ahupeele ʉtengamazu afishe ahwambɨɨlɨle ʉfyʉli hwi‑idala ɨlyɨ lwɨtɨho mwa Yeesu ʉKilisiti.
16 ƗNsimbo ɨMfinjile zyonti zisimbwilwe ashilile hu mwoyi gwa Ngʉlʉbhɨ.
Zikhondɨɨye hu manyizyo,
asunde abhantu ɨmbiibhi zyabho,
hubhalongozye bhaleshe ɨmbiibhi,
na hubhalanje zyonti ɨngolosu.
17 Ɨpo ʉmuntu wa Ngʉlʉbhɨ abhala‑abhe abhɨhwɨlwe haani abhombe ɨmbombo zyonti ɨnyinza.