4
Ɨhulajizya pa maaso ga Ngʉlʉbhɨ na pa maaso ga Yeesu ʉKilisiti,
ʉyo ahayihubhalonga abhʉʉmi na bhafwe mu habhaazyo aha hwɨnze hwakwe huje,
ayɨmɨɨlɨsye ʉwumwɨnɨ waakwe.
2 Ʉhwilɨnganyaaje alʉmbɨɨlɨle abhantu ɨNongwa ɨNyinza ɨzya Yeesu,
hu habhaazyo ha hakhondɨɨye na haala ha saga hakhondɨɨye.
Ʉkhajilizyaje,
ʉdamilaje hu nongwa ya‑ateeje hwabho,
nantele ʉbhajinjizyaje amooyo gaabho.
Ɨgo gonti ʉgabhombaje hu jimbiilizu wonti na hu manyizyo ɨnyinza.
3 Ɨhulajizya ɨsho,
pɨpo ahabhaazyo hahwɨnza ɨho abhantu saga bhahayɨɨtɨha atejeelezye ɨmanyizyo ɨzyɨ lyoli.
Leelo,
bhahayisʉngwa alondolezye ɨnsʉngwo zyabho,
yɨ nongwa bhahayibhʉngaanya abhamanyizyi abhinji lwene huje,
bhabhabhʉzyaje amazwi ɨgo bhasʉngwa ahwʉmvwe.
4 Bhahayileha atejeelezye amazwi agɨ lyoli,
bhahayigalushila mu vilaale ɨvi‑ilenga.
5 Leelo aawe,
ʉbhanje maaso huli zyonti.
Mu habhaazyo ahɨ mayɨmba,
ʉjimbaje.
Ʉbhalʉmbɨlɨlaje abhantu ɨNongwa ɨNyinza ɨzya Yeesu ʉKilisiti,
ʉbhombaje zyonti ɨzyɨnjɨ zya zikhondɨɨye mu mbombo yaaho.
6 Nabhʉʉzya ɨzyo hu nongwa ya‑aje,
anɨ bhahwanza humfumye nanshi sha bhafumya ɨnsangu ɨyɨ divaayia hwa Ngʉlʉbhɨ,
hwa huje ahabhaazyo haanɨ aha‑afwe hafishile.b
7 Ɨndwiye ʉlʉgʉ ʉwinza mu lwɨtɨho,
ʉlwɨlano waanɨ ʉwa‑ashɨmbɨle mu sontwa ɨmalile,
ʉlwɨtɨho ɨmbutile.
8 Ɨshi,
ʉMwɨnɨ ambɨshɨɨye ɨshʉʉbhalo ɨsha‑amene ɨshɨ golosu.
Ʉmwene,
Nʼnonzi wɨ lyoli,
ahayihumpeela ɨsho pi‑isiku liila lya‑ahayihubhalonga abhantu bhonti.
Saga nɨɨnɨ nɨmwene wa nahayambɨɨlɨla ɨshʉʉbhalo,
leelo abhantu bhonti bha bhasamba hu nsyʉkwo aweele hwakwe,
bhahayambɨɨlɨla bhope.
Amazwi aga hu malishilo
9 Tiimoti,
ʉbagaje ahwɨnze nalinaali huliinɨ,
10 pɨpo ʉDeema ahandeshile hu nongwa ya huzigane ɨzya mu nsi,
ahabhalile hwi‑ibooma ɨlyɨ Tesaloniike.
ɄKileesike ahabhalile hu mukowa ʉgwɨ Galatiya,
nʉ Tiito ahabhalile hu mukowa ʉgwɨ Dalimatiya.
11 ɄLuuka mwene asyalile peeka naanɨ ɨpa.
Ʉmʼmwanze ʉMaalʉko huje,
ʉyɨnzaje nawo,
pɨpo abhajiiye hunaavwe mu mbombo yaanɨ.
12 Nahasonteleziizye ʉTikiiko hwi‑ibooma ɨlyɨ Efeeso.
13 Lwʉ‑ʉhwɨnza,
ʉhandetelaje ni‑igolole liila lya nahalileshile hwa Kaalipo hwi‑ibooma ɨlyɨ Tolowa.
Ʉhandetelaje nɨ vitaabu viila,
haani viila ɨvyɨ nkwembe.
14 ɄAlekizanda ʉyo asyana ɨshaaba ahambombɨɨye shibhiibhi haani.
ɄMwɨnɨ ahayihunʼsomba hu mbombo zyakwe.c
15 Ʉbhe maaso nawo,
pɨpo ahadindiziizye haani amazwi geetu.
16 Hu habhaazyo ɨho nahahwiyʉmɨɨye mwi‑ikoloti ʉlwa hwande,
saga ahalɨɨho ʉmuntu nʉʉmo ʉyo ahanavwizye,
bhonti bhahandeshile.
ɄNgʉlʉbhɨ abhasaajile hwɨ‑ɨzyo.
17 Leelo hwope ʉMwɨnɨ ahali peeka naanɨ.
Ahampeela ikhone huje,
ashilile hwaliinɨ ɨNongwa ɨNyinza zyonti zilʉmbɨlɨlwaje,
abhantu bhonti bha saga Bhayahuudi bhʉmvwaje.
Nanɨ nahafyʉlɨɨlwe mu makhono ga bha bhahantaakile,
nanshi afyʉlwe mwi‑ilomu lyɨ nsama.d
18 ɄMwɨnɨ anza‑ajendeelele humfyʉle mu mbiibhi zyonti zya bhanza humbombele,
na humfisye hu mwanya,
hu wumwɨnɨ waakwe hu tengaanu.
Ʉmwene amwamihwaje wiila na wiila.
Aameni!
Ɨndamuho hwa bhooziwa abha hu Efeeso
19 Ʉndamushile ʉPulisiila nʉ Akila,
na bhantu abha mu nyumba ɨya Onesifoolo.
20 ɄElaasito asyalile mwi‑ibooma ɨlyɨ Kolinto.
ɄTuloofimo nahanʼneshile,
abhinile mwi‑ibooma ɨlyɨ Mileeto.
21 Ʉbagaje ahwɨnze nalinaali,
sha hasɨɨle ahwande ahabhaazyo ahi‑isasa.
ɄEbulo,
ʉPuude,
ʉLiino,
ʉKilawudiya peeka na bhooziwa abhamwetu bhonti,
bhahubhalamuha.
22 ɄMwɨnɨ abhanje peeka naawe.
Ɨmpyana yaakwe ɨbhanje peeka naamwɨ mwenti.