Ajimbiilile mwa Yeesu ʉKilisiti
2
Ɨshi aawe wʉmwana waanɨ,
ɨmpyana ɨya Yeesu ʉKilisiti ɨʼpeelaje ikhone.
2 Amazwi ga wahanʉmvwɨzye ɨyanga pa maaso ga bhasimishizi abhinji,
ʉbhamanyizye abhantu abhalʉnjɨsu ɨbho bhakhondɨɨye amanyizye abhanjɨ.
3 Ʉjimbaje mu mayɨmba amagoosi peeka naatɨ,
nanshi ʉnʼnwi ʉnʼgolosu ʉwa Yeesu ʉKilisiti.
4 Saga alɨɨho ʉnʼnwi wa‑ahwitʉʉsya mu ga saga gɨ shilwi,
lwa‑ali mu lʉgʉ,
pɨpo ahwanziwa huje,
anʼkhondezyaje ʉnʼgoosi waakwe.
5 Nantele,
ʉmuntu wa‑ashɨmbɨla ʉlubhilo mu lwɨlano,
nkashele saga ahwʉmvwa ɨndajizyo zya zibhɨhwɨlwe,
saga bhaganʼkwatizya ɨshʉʉbhalo ɨsha‑ashɨmbɨle.
6 Ʉnʼnimi wope lwa‑alima hu dandamazu,
akhondɨɨye huje,
abhanje wa hwande ahweje ɨviyabho.
7 Tiimoti,
ʉzisɨbhɨlɨlaje haani ɨzyo zyɨ‑ɨyanga pɨpo ʉMwɨnɨ anza hupeele ɨnjeele ɨzya huzimanye zyonti.
8 Ʉmʼmwizuhaje ʉYeesu ʉKilisiti ʉwa mu shikholo ɨsha mwɨnɨ ʉDaudi.
a Ʉmwene ʉYeesu ahazyʉshɨle mu bhafwe,
nanshi sha ziyanga ɨNongwa ɨNyinza zyɨ‑ɨlʉmbɨɨlɨla.
9 Ɨzyo zimbɨɨshɨle huje,
ɨnjɨmbaje na‑akʉngwe na manyololo nanshi ʉmʼmomba mbiibhi.
Leelo hwope izwi lya Ngʉlʉbhɨ saga ligakʉngwa!
10 Ɨshi,
ɨjimbiilila mu zyonti huje,
bha bhasaluliilwe nʉ Ngʉlʉbhɨ bhope bhawaaje ʉfyʉli ashilile hwa Yeesu ʉKilisiti,
peeka nʉ mwamu waakwe ʉwa wiila.
11 Huli ni‑izwi lya likhondɨɨye hulyɨtɨshe huje,
“Nkashele taafwa peeka nʉ Kilisiti,
tahayikhala peeka nawo.
12 Nkashele tijimbiilizya,
tahayilongozya peeka nawo.
Leelo,
nkashele tihunʼkhaana,
ʉmwene wope ahayihutikhaana.
13 Hwope nkashele saga tili bhalʉnjɨsu hwa mwene,
ʉmwene abha sha nʼnʉnjɨsu huliitɨ,
pɨpo saga abhajiiye ahwikhaane yʉʉyo.”
Ʉmʼmomvi wa‑ali mwinza pa maaso ga Ngʉlʉbhɨ
14 Ɨnsundo zyɨnɨɨzyo ʉbhizusyaje abhantu na hubhakhajiilizye pa maaso ga Ngʉlʉbhɨ huje,
bhaleshe adaliihane ɨnongwa zya saga zikhondɨɨye.
Idali nanshi ɨlyo saga lili nɨ mbombo nɨɨmo,
lihubhanangaanya bha bhatejeelezya lwene.
15 Aawe ʉhwikankamulaje hwi‑ikhone ahwilolesye huje,
ʉNgʉlʉbhɨ ahwɨtɨshɨɨye,
aawe we mʼmomvi wa saga ʉlola ɨnsoni mu mbombo yaaho,
shʉ‑ʉmanyizya shinza ɨmanyizyo ɨzyɨ lyoli.
16 Ʉseguhaje mu mazwi ga saga gali nɨ mbombo nɨɨmo,
ga saga gafuma hwa Ngʉlʉbhɨ,
pɨpo gahwonjela hubhabhɨɨshe hutali abhantu nʉ Ngʉlʉbhɨ.
17 Ɨmanyizyo zyabho zyahayizyambaana nanshi ilonda lya libegenza.
Mwɨ‑ɨbho alɨɨho ʉHimenaayo nʉ Fileeto.
18 Bhɨɨbho bhayileshile ɨlyoli,
bhamanyizya huje,
azyʉshe hwa bhafwe hufumiiye nzɨɨla,
bhabhateziizye abhantu bhamo huje,
bhaleshe ʉlwɨtɨho.
19 Hwope,
abhantu bha Ngʉlʉbhɨ bhajendeelela akhamantane mu lwɨtɨho lwabho nanshi ʉlwalo ʉlukhamantanu ʉlwɨ nyumba.
Nantele,
ɨsimbwilwe lyoli huje,
“ɄMwɨnɨ abhamɨɨnye bha bhali bhaakwe,”
b
nantele ɨyiga,
“Ʉmuntu wowonti wa‑ayanga huje,
muntu wa Mwɨnɨ,
akhondɨɨye huzileshe ɨmbiibhi zyakwe.”c
20 Mu nyumba ya nʼtabhazi muli nɨ vyɨlɨɨlo vinji vinji.
Vimo bhagombile nɨ zahaabu,
vimo nɨ mpɨɨya.
Ɨvyo vyɨ nshɨnshɨ.
Vimo bhagombile na makwi,
vimo nʉ longo.
Ɨvyo saga vyɨ nshɨnshɨ.
21 Nkashele ʉmuntu ahwiyoozya hu mbiibhi ɨzyo,
ɨpo anza‑abhe nanshi ɨshɨlɨɨlo ɨshɨ nshɨnshɨ ɨsho shisangalusiiwe.
Anza‑abhe ahunʼkhondeezya ʉMwɨnɨ,
nantele anza‑abhe abhɨhwɨlwe nzɨɨla abhombe ɨmbombo zyonti ɨnyinza zya zihwanziwa.
22 Ʉshɨmbɨlaje ɨnsʉngwo ɨmbiibhi ɨzyɨ sahaala.
Aawe peeka na bhantu bhonti bha bhahumʼpuuta ʉMwɨnɨ hu mwoyo ʉnʼzelu,
mulondolezyaje ʉgolosu,
ʉlwɨtɨho,
ʉkʉndwa nʉ tengaanu.
23 Ʉyeepaje mu madali ga saga minza na gɨ lema,
pɨpo ʉmɨɨnye huje,
ɨgo galeeta ibho mwa bhantu.
24 Ʉmʼmomvi wa Mwɨnɨ saga akhondɨɨye abhe muntu wi‑ibho.
Leelo akhondɨɨye huje,
abhanje mwoloolo hwa bhantu bhonti,
abhanje amɨɨnye amanyizye,
nantele abhanje nʼjimbiilizu.
25 Nkashele abhantu bhadaliihana nawo,
akhondɨɨye huje,
abhasundaje hu woloolo.
Lumo ahabhaazyo hamo ʉNgʉlʉbhɨ ahayihubhatʉʉla alaate ɨmbiibhi zyabho zyonti huje,
bhayimanyaje ɨlyoli.
26 Mu habhaazyo ɨho,
ɨnjeele zyabho zyahayihubhaweelela nantele,
ɨpo bhahayipulumuha mu lwonzo ʉlwa Seetano,
d ʉyo abhakhɨɨte huje bhabhe bhabhomba nanshi sha‑ahwanza yʉʉyo.