Ɨkalaata ɨya bhɨɨlɨ ɨya nʼsontwa ʉPaulo hwa
Tiimoti
ɄPaulo ahunʼnamuha ʉTiimoti
1
Ɨkalaata ɨnɨ ɨfumile huliinɨ anɨ nɨPaulo,
nɨnʼsontwa wa Yeesu ʉKilisitia nanshi ʉNgʉlʉbhɨ sha‑ahwanza.
ɄYeesu ansonteleziizye huje,
ɨndʉmbɨlɨlaje abhantu ɨnongwa ɨzyɨ wʉʉmi ʉwo afinjile hutipeele,
nkashele tihumʼmwɨtɨha ʉmwene.
2 Anɨ ɨhusimbila aawe Tiimoti,
we mwana waanɨ ʉnʼkʉndwe.
Ɨmpyana,
ɨnkʉmbʉ nʉ tengaanu afume hwa Ngʉlʉbhɨ ʉDaada na hwa Mwɨnɨ weetu ʉYeesu ʉKilisiti,
vibhanje peeka naawe.
Ahunʼnondolezye ʉKilisiti sinta nsoni
3 Ɨhunʼsalifya ʉNgʉlʉbhɨ wɨ‑ɨhumʼmombela hu mwoyo ʉnʼsangalusu,
nanshi abhamaama bhaanɨ sha bhahabhombaga.
Lwɨ‑ɨpuuta,
ɨhuhwizuha pasanya na nʉsiku,
na hunʼsalifye ʉNgʉlʉbhɨ hu nongwa yaaho.
4 Ɨhwizuha amansozi gaaho lwa tahalehanaga,
ɨnsyʉkwɨlwe hulole,
nkɨ‑ɨmbe nɨ nseho.
5 Ɨhwizuha sha wahamʼmwɨtɨɨshe ʉNgʉlʉbhɨ sinta lilongwi,
nanshi ʉmaama waaho ʉLoyisi nʉ nyina waaho ʉEyunike sha bhahamʼmwɨtɨɨshe.
Nanɨ ɨsimishizya huje,
aawe nawe ʉli nalwo ʉlwɨtɨho.
6 Yɨ nongwa ɨnɨ ɨhuhwizusya huje,
ʉzunjizyaje ɨshikʉnjɨlwa ɨsho ʉNgʉlʉbhɨ sha‑ahaʼpiiye hu habhaazyo ɨho nahaʼbhɨshɨɨye ɨnyoobhe,
7 pɨpo ʉNgʉlʉbhɨ saga ahatipiiye ʉmwoyo ʉgwɨ wooga.
Lyoli ahatipiiye ʉmwoyo ʉgwa hutipeele ʉdandamazu,
ʉkʉndwa na hwijele.
8 Ɨshi ʉsahalolaje ɨnsoni afumye ʉsimishizi hu nongwa ya Mwɨnɨ weetu,
nantele ʉsahandolelaje ɨnsoni anɨ nɨnʼkʉngwe hu nongwa ya‑afumye ʉsimishizi waakwe.
Leelo,
nawe,
hwi‑ikhone ʉNgʉlʉbhɨ lya‑aʼpiiye,
ʉjimbaje ayɨmbe hu nongwa yɨ Nongwa ɨNyinza ɨzya Yeesu ʉKilisiti.
9 Ʉmwene ahatifyʉlɨle,
ahatikwizya huje,
tibhe bhantu bhaakwe abhasangalusu.
Ʉfyʉli weetu ʉwo saga wufumilana nɨ mbombo zyetu ɨnyinza,
lyoli hu nsɨɨbho ya Ngʉlʉbhɨ yʉʉyo nɨ mpyana yaakwe.
Ɨmpyana ɨyo ahatipiiye hu nongwa ya Yeesu ʉKilisiti,
sha‑asɨɨle apele ɨnsi.
10 Ɨshi atilanjile pa pazelu ɨmpyana ɨyo ashilile ahwɨnze hwa Yeesu ʉKilisiti,
ʉMʼfyʉli weetu.
Ʉmwene ʉYeesu awutolile ʉfwe,
na hwi‑idala ɨlyɨ Nongwa ɨNyinza,
ahalolesya sha tigawaaga ʉwʉʉmi ʉwa wiila na wiila.
11 Hu Nongwa ɨNyinza ɨzyo,
nanɨ ʉNgʉlʉbhɨ ahansaluuye huje,
ɨmbe nʼnʉmbɨɨlɨli,
nʼsontwa,
nantele mʼmanyizyi.
12 Hu nongwa ɨyo anɨ ɨyɨmba.
Leelo,
anɨ saga ɨlola ɨnsoni,
pɨpo ɨmɨɨnye shinza wɨ‑ɨhumʼmwɨtɨha.
Nantele,
ɨndi nʉ simishizyo huje abhajiiye huzisʉnje ɨNongwa ɨNyinza ɨzyo zyɨ‑ɨmpewiilwe afishe mwi‑isiku ɨlya hu malishilo.
13 Amazwi gonti ga wʉmvwa huliinɨ gɨ lyoli.
Ʉlondolezyaje ɨshifwani ɨshɨ mazwi ɨgo,
lwʉ‑ʉmanyizya mu lwɨtɨho nʉ kʉndwa ɨvyo tahambɨlɨɨye lwa tahapatihɨɨnywe nʉ Yeesu ʉKilisiti.
14 ƗNongwa ɨNyinza ʉNgʉlʉbhɨ zya‑ahaʼpiiye,
ʉzibhutaje hwi‑ikhone lya Mʼpepo ʉMʼfinjileb wa‑akhala muuhati yeetu.
15 Aawe wʉTiimoti ʉmɨɨnye huje,
abhantu bhonti abha mu mukowa ʉgwɨ Aasiya bhahandeshile.
Mwʉmwo alɨɨho ʉFugeelo nʉ Helimogeene.
16 Leelo,
abhantu abha mu nyumba ɨya Onesifoolo,
ʉMwɨnɨ abhalolelaje ɨnkʉmbʉ,
pɨpo ahanavwaga habhɨlɨ habhɨlɨ.
Nantele,
saga ahalolaga ɨnsoni huje ɨnkʉngwɨlwe na manyololo ɨga.
17 Lwa waafiha mwi‑ibooma ɨlyɨ Luumi,
ahabajile hunanze,
ahanaaga.
18 Nawe ʉmɨɨnye shinza sha‑ahanavwizye ʉhwo,
hwi‑ibooma ɨlyɨ Efeeso.
ɄMwɨnɨ ahanʼnolele ɨnkʉmbʉ isiku ɨlya hu malishilo!