Ɨnjendo zya zihunʼkhondeezya ʉNgʉlʉbhɨ
4
Ɨshi,
amwɨ mubhooziwa mubhamwetu,
mumanyiiye afume huliitɨ sha muhwanziwa alembe huje munʼkhondeezye ʉNgʉlʉbhɨ.
Shinza aje,
mubhomba ɨsho.
Ɨshi,
tihubhalaabha hwi‑ikhone lya Mwɨnɨ ʉYeesu aje,
mubhombaje shɨnɨɨsho na‑ashizanye tee.
2 Tiyanga ɨsho,
pɨpo mumɨɨnye shinza ɨndajizyo zya tahabhapeelile hwi‑ikhone ɨlya Mwɨnɨ ʉYeesu.
3 ɄNgʉlʉbhɨ ahwanza aje,
mubhanje bhasangalusu na‑aleshe lwonti ʉlemvu ʉwɨ bhembusu.
4 Shila muntu amanye ɨsha huzimene ɨnsʉngwo ɨmbiibhi ɨzyɨ mʼbɨlɨ gwakwe hu sangalusu nɨ nshɨnshɨ.
5 Mugandi abhe mulondolezya ɨnsʉngwo ɨmbiibhi ɨzyɨ mʼbɨlɨ nanshi sha bhabhomba ɨbho bha saga bhamʼmɨɨnye ʉNgʉlʉbhɨ.
6 Ɨshi ʉmuntu wowonti agandi abhombe ʉweegu nʉ nʼshɨ wa holo waakwe awe humʼmombele ɨmbiibhi ɨzyɨnjɨ.
Tahabhabhʉzɨɨzye na hubhasunde huje bhonti bha bhabhomba ɨzyo,
ʉMwɨnɨ ʉYeesu ahayihubhafunda.
7 ɄNgʉlʉbhɨ saga ahatikwiziizye aje tibhembuhaje,
leelo atikwiziizye,
huje tilembaje mu sangalusu.
8 Ɨshi ʉmuntu wowonti wa‑akhaana ɨmanyizyo ɨzi,
saga ahunʼkhaana ʉmuntu,
leelo ahunʼkhaana yʉ Ngʉlʉbhɨ,
ʉyo ahubhapeela amwɨ ʉMʼpepo ʉMʼfinjile.
9 Ɨshi,
saga ɨhwanziwa,
huje tibhasimbile amwɨ hu nongwa ɨya hubhagane abhooziwa abhamwenyu,
pɨpo mumanyiziiwe nʉ Ngʉlʉbhɨ yʉʉyo sha muhwanziwa aganane.
10 Lyoli,
sha shɨɨsho sha muhubhabhombela abhooziwa abhamwenyu bhonti bha bhamʼmwɨtɨɨshe ʉNgʉlʉbhɨ abha hu mukowa gwonti ʉgwɨ Makedoniya.
Ɨshi tihubhalaabha mugananaje shɨɨsho ashile ɨpo.
11 Mubhanje bhantu abha‑akhale hu tengaanu.
Ʉmuntu wowonti agandi hwitʉʉsye mu mbombo zya bhanjɨ,
abhombaje ɨmbombo zyakwe yʉʉyo hu nʼkhono gwakwe nanshi ɨsho tahabhalajiziizye.
12 Ɨpo mubha mulolesya ɨnjendo ɨnyinza pitagaalila lyɨ‑ɨbho bha saga bhamʼmwɨtɨɨshe ʉYeesu,
nantele saga mubha bhantu abha asʉʉbhɨle ɨvya bhanjɨ.
Ɨmanyizyo ɨzya hwɨnze hwa Mwɨnɨ ʉYeesu ʉlwa bhɨɨlɨ
13 Mwɨ bhooziwa bhamwetu,
tihwanza mumanye ga gahayifumila hu bhaala bha bhahamʼmwɨtɨɨshe ʉNgʉlʉbhɨ ɨbho bhafwiye,
huje muleshe abhe nʉ zugumizu nanshi abhanjɨ ɨbho bha saga bhali nʉ lusʉʉbhɨlo.
14 Atɨ tihwɨtɨha huje ʉYeesu ahafwiye,
nantele ahazyʉha.
Ɨshi hu nongwa yɨ‑ɨgo tisʉʉbhɨla huje ʉNgʉlʉbhɨ ahayihubhazyʉsya abhooziwa bhonti ɨbho bhahafwiye,
huje abhaleete hwa mwene peeka nʉ Yeesu.
15 Ɨga ga tihubhabhʉʉzya zyɨ manyizyo zya Yeesu huje,
atɨ ta tahayibha bhʉʉmi hu habhaazyo lwa‑aweela ʉMwɨnɨ ʉYeesu,
saga tahayihubhatagaalila abhooziwa ɨbho bhahafwiye alolane nawo.
16 Ɨnjanjile ɨsho,
pɨpo ʉMwɨnɨ ʉYeesu yʉʉyo ahayiiha afume hu mwanya.
Ahayikwizya hwi‑izwi igoosi,
peeka ni‑izwi lya nʼtumia ʉnʼgoosi,
lyope izwi ɨlyɨ ndudwe ɨlya Ngʉlʉbhɨ lyahayʉmvwɨha.
Ɨpo bhaala bha bhahafwiye sha bhamʼmwɨtɨɨshe ʉKilisiti,
bhahayizyʉha nasʉʉti.
17 Ɨshi atɨ,
ta tili bhʉʉmi,
tahayinyeetulwa peeka nɨ‑ɨbho bha bhazyʉshɨle,
huje tikhomaane nʉ Mwɨnɨ ʉYeesu mu mabhɨngo.
Ɨpo tahayikhalaga peeka nawo wiila na wiila.
18 Ɨshi,
muzinzanyaaje hu mazwi ɨgo.