Ahwilɨngaanye hu nongwa yi‑isiku ɨlya hwɨnze hwa Mwɨnɨ
5
Mwɨ bhooziwa bhamwetu,
tilola huje tisahabhasimbile hu nongwa yɨ habhaazyo ni‑isiku ɨlya hwɨnze hwa Mwɨnɨ ʉYeesu.
2 Ɨnjanjile ɨsho,
pɨpo amwɨ mwɨmwɨ mumɨɨnye huje isiku ɨlya hwɨnze ʉMwɨnɨ lyahayibha lyɨ ngundushizyo,
nanshi ɨsho ʉmwibha ahwɨnza nʉsiku.
3 Abhantu lwa bhayanga aje,
“Tili nʉ tengaanu nantele tili mu lɨndɨɨlɨli,”
ɨpo pa pɨɨpo ʉyazyo wahayihubhɨnzɨla hu ngundushizyo,
nanshi ʉbhaavi ʉwa‑apaape sha wuhwɨnza hu ngundushizyo hwa nʼshɨ wa‑ali nʉ lwanda.
Hwɨ‑ɨlyo saga bhahayipona lwonti.
4 Leelo amwɨ mubhooziwa mubhamwetu,
isiku ɨlyo saga lyahayihubhagundusya nanshi ʉmwibha hu nongwa ya‑aje,
saga muli mu hiisi nanshi abhantu ɨbho bhahunʼsyonshela ʉNgʉlʉbhɨ.
5 Amwɨ mwenti muli bhaana bhɨ lukhozyo,
nantele bha pasanya.
Atɨ saga tili bhaana bha nʉsiku awe bhɨ hiisi.
6 Ɨshi,
tigandi abhe nanshi abhanjɨ ɨbho bhagona ʉtulo,
lyoli tibhanje maaso na hwizije.
7 Ɨnjanjile ɨsho,
hu nongwa ya‑aje,
ɨbho bha bhagona ʉtulo,
bhagona nʉsiku.
Nantele,
ɨbho bhakholwa,
bhakholwa nʉsiku.
8 Leelo atɨ tihwizijilaje hu nongwa ya‑aje,
tili bhantu bhɨ lukhozyo.
Ʉlwɨtɨho nʉ lugano lubhanje luhutizijila hwa nʼnʉgʉ ʉSeetano nanshi ɨnkwela yɨ‑ɨhunʼziga ʉnʼnwi pa shifubha lwa‑alwa ʉlʉgʉ.
Nantele tibhanje nʉ lusʉʉbhɨlo huje ʉNgʉlʉbhɨ ahayihutifyʉla nanshi ɨsho ʉnʼnwi asʉʉbhɨla ɨmpeewa ɨyɨ jela hwi‑itwe.
9 Ɨshi,
ʉNgʉlʉbhɨ saga ahatisaluuye atɨ huje atiyazye hwi‑ilyoyo lyakwe.
Lyoli ahatisaluuye huje tiwaaje ʉfyʉli hwi‑idala ɨlya Mwɨnɨ weetu ʉYeesu ʉKilisiti.
10 Ʉmwene ahafwiye hu nongwa yeetu,
huje tibhe peeka nawo sha tili tilemba,
awe sha tili tifwiye.
11 Ɨshi muzinzanyaaje na hwipeele ʉmwoyo mwɨmwɨ nanshi sha mubhomba.
Ɨndajizyo ɨzyɨnjɨ hwa bhooziwa hu nongwa ɨya hunʼkhondeezye ʉNgʉlʉbhɨ
12 Mwɨ bhooziwa bhamwetu,
tihubhalaabha huje mubhatinihaje ɨbho bhabhomba ɨmbombo hu dandamazu ɨya hubhaavwe amwɨ,
ɨbho bhahubhalongozya hwi‑ikhone lya Mwɨnɨ ʉYeesu.
13 Bhatinihaji tee na hubhagane alɨngaane nɨ mbombo yaabho.
Nantele khalaji hu tengaanu mwɨmwɨ hu mwɨmwɨ.
14 Mwɨ bhooziwa bhamwetu,
tihubhalaabha aje mubhasundaje abhaholo na hubhakhamantanye bha bhatenguushe amooyo.
Nantele mubhakhamantanye ɨbho bha saga bhali na maha na hubhajimbiilile abhantu bhonti.
15 Mubhanje maaso ʉmuntu wowonti agandi humʼmwezezye ʉwamwabho ibhiibhi hwi‑ibhiibhi.
Leelo shila habhaazyo mubhombelanaje aminza mwɨmwɨ hu mwɨmwɨ na hubhabhombele aminza abhantu bhonti.
16 Mubhanje nʉ luseshelo shila habhaazyo,
17 nantele puutaji hwa Ngʉlʉbhɨ sinta alite.
18 Munʼsalifyaje ʉNgʉlʉbhɨ hu gonti pɨpo ɨgo ga gɨɨgo ʉmwene ahwanza mubhombaje mwa Yeesu ʉKilisiti.
19 Mugandi hunʼzijile ʉMʼpepo ʉMʼfinjile hu habhaazyo ɨho abhomba ɨmbombo paahati yeenyu.
20 Nantele mugandi huwusyonshele ʉkuwi,
21 leelo muwujelaje ʉkuwi wonti,
na huwukhate ʉwɨ lyoli.
22 Muwulehaje ʉbhiibhi wonti.
Amazwi aga hu malishilo
23 Tilaabha hwa Ngʉlʉbhɨ ʉyo ahubhapeela abhantu ʉtengaanu huje abhasangalusye amwɨ lwonti.
Nantele abhanje ahubhalɨndɨɨlɨla amooyo geenyu,
ʉlemvu weenyu na mabɨlɨ geenyu,
huje mugandi abhe nɨ mbuno afishe hu habhaazyo lwa‑ahayɨnza nantele ʉMwɨnɨ weetu ʉYeesu ʉKilisiti.
24 ɄNgʉlʉbhɨ ya‑abhakwiziizye,
ahayihubhabhombela ɨgo,
pɨpo ʉmwene nʼnʉnjɨsu.
25 Mwɨ bhooziwa bhamwetu,
tihubhalaabha mutiputilaje naatɨ hwa Ngʉlʉbhɨ.
26 Mubhalamuhaje abhooziwa abhamwetu bhonti hu kʉndwa wa Yeesu ʉKilisiti.
27 Ɨhubhalajizya hwi‑ikhone lya Mwɨnɨ ʉYeesu ʉKilisiti,
huje ɨkalaata ɨnɨ mubhabhaazizye abhaholo bheetu bhonti.
28 Ɨmpyana ya Mwɨnɨ weetu ʉYeesu ʉKilisiti ɨbhanje peeka naamwɨ.