ɄPaulo ahunʼsonteelezya ʉTiimoti hu Tesaloniike
3
Pamandɨ tahapootwa ajimbiilile,
pɨpo saga tahamɨɨnye zya zibhombeha ʉhwo.
Ɨshi tahalola aje,
shinza huje tisyale tibheene hwi‑ibooma ɨlyɨ Aseene.
2 Tahanʼsonteelezya ʉTiimoti ʉholo weetu,
nantele mʼmomvi wamwetu mwa Ngʉlʉbhɨ hu nongwa ya‑alʉmbɨɨlɨle ɨNongwa ɨNyinza ɨzya Kilisiti.
Tahanʼsonteleziizye huje ayɨnze hubhajinjizye amooyo na hubhazinzye mu lwɨtɨho lwenyu.
3 Tahabhombile ɨsho huje ʉmuntu wowonti agandi atengushe ʉmwoyo hu nongwa yɨ malabha ɨga.
Amwɨ mumɨɨnye huje atɨ tibhooziwa tihwanziwa ashilile mu malabha.
4 Ɨshi mumanya ɨgo,
pɨpo nantele lwa tili peeka naamwɨ,
tahabhabhʉzyaga huje tahayilaviwa.
Ɨshi,
sha zilɨɨho.
5 Ɨpo lwa napootwa ajimbiilile,
nahanʼsonteelezya ʉTiimoti huliimwɨ huje ɨmanye ɨnongwa ɨzyɨ lwɨtɨho lwenyu.
Nahabhombile ɨsho,
pɨpo nahasɨɨbhaga huje pamo ʉSeetano ʉnʼjeli abhajelile na hubhateezye.
Yope ɨmbombo yeetu ɨyo tahabhombile huliimwɨ,
ɨpo saga ɨbha nɨ zya pa mwanya.
Ɨnongwa afume hwa Bhatesaloniike
6 Ɨshi ʉTiimoti ayɨnzɨle afume huliimwɨ,
atibhʉzɨɨzye ɨnongwa ɨnyinza ɨzyɨ lwɨtɨho nʉ lugano lwenyu.
Atibhʉzɨɨzye,
huje wiila muhutiizuha hu luseshelo,
nantele musyʉkwɨlwe atilole atɨ,
nanshi atɨ sha tisyʉkwɨlwe hubhalole amwɨ.
7 Mwɨ bhooziwa bhamwetu,
ɨnongwa ɨzyɨ lwɨtɨho lwenyu zitijinjiziizye amooyo mu mayɨmba na mu malabha geetu gonti.
8 Ɨshi tihwiyʉmvwa shinza,
pɨpo tihubhalola amwɨ mwɨmɨlɨɨye hu dandamazu mu lwɨtɨho lwa muli nalwo mwa Mwɨnɨ ʉYeesu.
9 Tibhajiiye wɨlɨ hunʼsalifye ʉNgʉlʉbhɨ hu nongwa yeenyu?
Nantele,
tibhajiiye wɨlɨ hunʼsalifye ʉNgʉlʉbhɨ hu luseshelo ʉlwo tili nalwo pitagaalila lyenyu?
10 Nʉsiku na pasanya tihunʼnaabha ʉNgʉlʉbhɨ hu dandamazu tee,
huje ataavwe tɨnze nantele huliimwɨ,
huje tibhaavwe zya mubhuliliilwe mu lwɨtɨho lwenyu.
11 Ɨshi tihunʼnaabha ʉNgʉlʉbhɨ,
ʉDaada weetu yʉʉyo,
nʉ Yeesu ʉMwɨnɨ weetu,
bhatigulile idala ɨlya hwɨnze huliimwɨ.
12 Nantele,
tihunʼnaabha ʉMwɨnɨ ʉYeesu abhonjeelezye ʉlugano,
huje mugananaje mwɨmwɨ hu mwɨmwɨ na hubhagane abhanjɨ bhonti nanshi ɨsho atɨ sha tibhagɨɨne amwɨ.
13 Tilaabha ɨgo,
huje ʉMwɨnɨ ʉYeesu abhajinjizye amooyo geenyu.
Ɨnjanjile ɨsho,
huje mubhe bhasangalusu,
sinta mbuno pitagaalila lya Ngʉlʉbhɨ ʉDaada weetu,
lwa‑ahwɨnza ʉMwɨnɨ weetu ʉYeesu peeka na bhasangalusu bhaakwe bhonti.