Ɨmbombo ya Paulo na bhamwabho hu Tesaloniike
2
Amwɨ mubhooziwa mubhamwetu,
amwɨ mwɨmwɨ mumɨɨnye,
huje ahwɨnze hwetu huliimwɨ hwahali nɨ zya pa mwanya.
2 Nantele mumɨɨnye huje hu habhaazyo ɨho tahasɨɨle afishe huliimwɨ,
tahayɨmbɨle na‑aligwe mwi‑ibooma liila ɨlyɨ Filiipi.
Peeka na‑aje tahazijilwaga tee,
hwope ɨsho ʉNgʉlʉbhɨ ahatipiiye ikhone nʉ dandamazu ʉwa‑alʉmbɨɨlɨle ɨNongwa ɨNyinza ɨzya Yeesu.
3 Ɨshi,
amazwi ɨgo tahakhajilizyaga huliimwɨ,
saga gafumilana ni‑ilenga awe ɨnsɨɨbho ɨmbiibhi,
awe saga tihwanza hunʼgobele ʉmuntu wowonti.
4 Leelo tilʉmbɨɨlɨla hu nongwa ya‑aje,
ʉNgʉlʉbhɨ yʉʉyo ya‑ahatilolile huje tikhondɨɨye.
Sha shɨɨsho ahatipiiye ɨmbombo ɨya‑alʉmbɨɨlɨle ɨNongwa ɨNyinza ɨzya Yeesu.
Ɨshi ɨnsɨɨbho zyetu saga zya hubhakhondeezye abhantu,
leelo hunʼkhondeezye ʉNgʉlʉbhɨ wa‑ahuzilola zyonti zya zili muuhati mu mooyo geetu.
5 Mumɨɨnye huje,
saga tahayangaga amazwi huje mutigane,
awe ayanje amazwi ga saga gɨ lyoli,
huje tambɨɨlɨle ɨzya pa mwanya.
ɄNgʉlʉbhɨ ʉmwene yʉ nʼsimishizi wɨ‑ɨzi zya tiyanga.
6 Nantele saga tahanzaga abhantu huje bhatisʉmbe awe hwope afume huliimwɨ awe afume hu bhanjɨ bhonti.
Atɨ tili bhasontwa bha Kilisiti,
tɨnzaga hwanze ɨvintu vimo afume huliimwɨ,
leelo saga tahabhombile ɨsho.
7 Tahali bholoolo paahati yeenyu nanshi shiila ʉmʼpaafi sha‑asʉnga abhaana bhaakwe.
8 Sha shɨɨsho atɨ tahabhagɨɨne tee amwɨ.
Ɨshi tahashanga tee saga hubhalʉmbɨɨlɨle ɨNongwa ɨNyinza ɨzya Ngʉlʉbhɨ hwene,
leelo peeka na hwifumye abhombe gonti ga gakhondɨɨye hubhaavwe,
pɨpo muli bhakʉndwe bheetu.
9 Mwɨ bhooziwa bhamwetu!
Muhwizuha sha tahabajile na‑ayɨmbe.
Tahabhombile ɨmbombo ʉsiku nʉ sanya,
huje tigandi hunʼgonyole ʉmuntu wowonti mwaliimwɨ hu habhaazyo lwa tihubhalʉmbɨɨlɨla ɨNongwa ɨNyinza ɨzya Ngʉlʉbhɨ.
10 Amwɨ muli bhasimishizi bheetu,
wope ʉNgʉlʉbhɨ nʼsimishizi weetu huje,
ɨnjendo zyetu zyahali nyinza nantele zyɨ golosu sinta abhe nɨ mbuno zyozyonti hu habhaazyo lwa tili huliimwɨ mubhooziwa.
11 Nantele,
mumɨɨnye shiila sha tahabhabhombelaga mwenti,
tahabhabhombelaga nanshi ʉyise sha‑ahubhabhombela abhaana bhaakwe.
Tahali tihubhakhamantanya amooyo na hubhazinzye na hubhasunde,
12 huje mulembaje hwi‑idala ɨlya‑abhɨnjɨɨlɨle gaala ʉNgʉlʉbhɨ ga‑asʉngwa.
ɄNgʉlʉbhɨ ya yʉʉyo ya‑ahubhakwizya,
huje mutʉʉshe mu wumwɨnɨ na mu mwamu waakwe.a
13 Nantele tihunʼsalifya ʉNgʉlʉbhɨ sinta alite,
pɨpo lwa mwahambɨlɨɨye izwi lyakwe afume huliitɨ,
saga mwahalyambɨlɨɨye nanshi izwi ɨlya muntu,
leelo mwahalyambɨlɨɨye nanshi izwi afume hwa Ngʉlʉbhɨ.
Lyoli,
ɨsho sha zili.
Izwi ɨlyo libhomba ɨmbombo muuhati mu mooyo geenyu amwɨ mwa mumʼmwɨtɨɨshe ʉYeesu.
14 Mwɨ bhooziwa bhamwetu,
amalabha ga gabhaajile ga gɨɨgo gahabhaajile abhooziwa abhamwenyu afume mu vibhanza ɨvyo vihumʼmwɨtɨha ʉYeesu ʉKilisiti mu nsi ɨya Bhayahuudi.
Namwɨ mulaviwa na bhantu bheenyu,
nanshi ɨbho bhahalaviiwe na Bhayahuudi abhamwabho.
15 ABhayahuudi bha bhɨɨbho bhahanʼgojile ʉMwɨnɨ ʉYeesu na bhakuwi bha Ngʉlʉbhɨ abhɨ mandɨ.
Nantele bha bhɨɨbho bhahatilaviizye naatɨ.
ABhayahuudi ɨbho bhahumʼviisya ʉNgʉlʉbhɨ,
nantele bha bhɨɨbho bha bhali bhalʉgʉ bha bhantu bhonti.
16 Bhabhomba hu dandamazu hutizijile alʉmbɨɨlɨle ɨNongwa ɨNyinza ɨzya Yeesu ʉKilisiti hwɨ‑ɨbho bha saga Bhayahuudi.
Bhahwanza aje,
abhantu ɨbho bhasahafyʉlwe.
Ɨshi hwi‑idala ɨlyo,
bhahwonjela ahwilʉndɨshɨle ɨmbiibhi,
afishe ilyoyo lya Ngʉlʉbhɨ libhafishiiye!
ɄPaulo anyonywa atangaane nantele na Bhatesaloniike
17 Mwɨ bhooziwa bhamwetu,
alehane hwetu naamwɨ hwahali hu habhaazyo hashe lwene,
nantele tahalehɨɨne shimʼbɨlɨ,
leelo amooyo geetu gahali peeka naamwɨ.
Ɨnjanjile ɨsho hu nongwa ya‑aje hu habhaazyo honti ɨho,
tahasʉngwɨlwe tee atangaane naamwɨ.
18 Ɨshi tahanzaga ahwɨnze huliimwɨ,
haani anɨ nɨPaulo,
hahinji lwene nahanzaga ahwɨnze tee huliimwɨ,
leelo ʉSeetanob ahatizijila.
19 Ɨshi bha bheenu bha bhali wandilo wɨ lusʉʉbhɨlo lwetu?
Nantele bha bheenu bha bhali wandilo wɨ luseshelo nɨ shʉʉbhalo sheetu ɨsha‑amene lwa‑ahayɨnza ʉMwɨnɨ weetu ʉYeesu ʉKilisiti?
Saga mwɨmwɨ?
20 Lyoli,
amwɨ mwa muhutibhɨɨha huje tihwibaadaje na‑abhe nʉ luseshelo.