Ɨkalaata ɨya hwande ɨya nʼsontwa ʉPaulo hwa
Bhatesaloniike
ɄPaulo ahubhalamuha aBhatesaloniike
1
Ɨkalaata ɨnɨ ɨfumile huliinɨ anɨ nɨPaulo peeka nʉ Silwanoa nʉ Tiimoti.
Tihubhasimbila ɨkalaata ɨnɨ amwɨ mwa muli mpʉga ya bhooziwa abha hwi‑ibooma ɨlyɨ Tesaloniike,
amwɨ mwa mumʼmwɨtɨɨshe ʉNgʉlʉbhɨ ʉDaada nʉ Mwɨnɨ ʉYeesu ʉKilisiti.
b Ɨmpyana nʉ tengaanu vibhanje peeka naamwɨ.
ɄPaulo ahunʼsalifya ʉNgʉlʉbhɨ hu lwɨtɨho ʉlwa Bhatesaloniike
2 Tihunʼsalifya ʉNgʉlʉbhɨ shila habhaazyo hu nongwa yeenyu amwɨ mwenti.
Nantele tihubhapuutila hwa mwene sinta alite.
3 Tihubhapuutila hwa Ngʉlʉbhɨ ʉDaada sinta alite,
tihwizuha pitagaalila lyakwe sha mubhomba ɨmbombo hu lwɨtɨho.
Tihwizuha ʉdandamazu weenyu ʉwo wufumilana nʉ lugano lwenyu,
nantele sha mwɨmɨlɨɨye afumilane nʉ lusʉʉbhɨlo lwenyu hwa Mwɨnɨ weetu ʉYeesu ʉKilisiti.
4 Amwɨ mubhooziwa mubhamwetu,
timɨɨnye huje ʉNgʉlʉbhɨ abhagɨɨne na huje abhasaluuye amwɨ huje mubhe bhantu bhaakwe.
5 Timɨɨnye ɨsho,
pɨpo hu habhaazyo lwa tahalʉmbɨlɨlaga huliimwɨ ɨNongwa ɨNyinza ɨzya Yeesu,
saga tahalʉmbɨlɨlaga amazwi geene,
lyoli hu maha nɨ nyaavwo afume hwa Mʼpepo ʉMʼfinjile.
c Nantele tahamɨɨnye huje,
ɨNongwa ɨNyinza ɨzyo zyɨ lyoli.
Amwɨ mumɨɨnye shinza ɨsho sha tahakhalaga peeka naamwɨ hu nongwa ɨya hubhaavwe.
6 Nantele,
hwope nkashele mwahalaviiwe hu nongwa yɨ lwɨtɨho lwenyu,
amwɨ mwahambɨlɨɨye ɨNongwa ɨNyinza ɨzyo hu luseshelo lwa lufuma hwa Mʼpepo ʉMʼfinjile,
mwahabhɨnjɨlɨzɨɨzye ɨshifwani sheetu nɨ sha Mwɨnɨ ʉYeesu ʉKilisiti.
7 Ɨshi,
amwɨ mwabha shifwani shinza hu bhooziwa bhonti abha hu mukowa ʉgwɨ Makedoniya nʉ gwɨ Akaaya.
8 Afume huliimwɨ,
abhantu bhʉmvwɨzye izwi lya Mwɨnɨ.
Saga huje bha bhantu bha hu Makedoniya na bha hu Akaaya lwene,
leelo ʉlwɨtɨho lwenyu hwa Ngʉlʉbhɨ lumanyiishe ɨmbali zyonti.
Hwɨ‑ɨlyo,
atɨ saga tɨnza hwitaamye ayanje hu nongwa yɨ lwɨtɨho lwenyu.
9 Hwonti hwa tibhala,
abhantu bhayanga sha mwahatambɨlɨɨye atɨ lwa tahɨnzɨle huliimwɨ.
Nantele bhahutimamila shiila sha mwahabhaleshile abhangʉlʉbhɨ bheenyu na humʼmwɨtɨshe ʉNgʉlʉbhɨ,
huje mumʼmombele ʉmwene ʉyo ali mwʉmi nantele wɨ lyoli.
10 Nantele bhahutimamila shiila sha muhunʼgʉʉlɨla ʉYeesu ʉKilisiti,
ʉMwana waakwed afume hu mwanya,
ʉyo ahanʼzyʉsyɨzye afume hwa bhafwe.
Ʉyo ya yʉʉyo ahutifyʉla mwi‑ilyoyo lya Ngʉlʉbhɨ lya lihwɨnza.