ƗMbombo ɨzya Bhasontwa 22

ɄPaulo ahabhabhʉʉzya ahaga, “Mwɨ Bhayahuudi bhaholo bhaanɨ na mubhayise bhaanɨ, ntejeelezyi! Ntejeelezyi lwɨ‑ɨhwiyʉʉmɨla pilongolela lyenyu.” 2 Abhantu bhaala lwa bhamʼmwʉmvwa ʉPaulo ayanga mu njango yaabho ɨyɨ Shiebulaniya, bhahonjela apʉʉme myɨ! Ɨpo ʉPaulo ahajendeelela hubhabhʉʉzye ahaga, 3 “Anɨ ɨndi Nʼnyahuudi, nahapapwilwe mwi‑ibooma ɨlyɨ Taaso mu mukowa ʉgwɨ Kilikiya. Leelo, ɨnkuliiye pɨɨpa pa Yelusaleemu. ɄGamaliyeeli ahali mʼmanyizyi waanɨ mwinza ʉwɨ ndajizyo zyonti ɨzyo zya bhahatileshɨɨye abhamaama bheetu. Nahahwifumiizye hu dandamazu wonti hwa Ngʉlʉbhɨ, nanshi amwɨ sha muhwifumiizye hu dandamazu sanyʉʉnʉ.

4 Nahabhalaviizye tee abhooziwa, bhamo nahabhabudaga. Nahabhakhataga, nantele nahabhakʉngaga mu hoobhe sinta asaaje aje, nʼnume awe nʼshɨ. 5 Ʉnʼsayi ʉnʼgoosi ʉwa Ngʉlʉbhɨ peeka ni‑ikoloti lyonti ɨlya bhagoosi bhagasimishizya aje, ɨzi zyɨ‑ɨyanga zyɨ nalyoli. Abheene bhahampiiye ɨkalaata huje, ɨmbatwalile abhalongozi bheetu tiBhayahuudi abha hwi‑ibooma ɨlyɨ Damesiki. Nkɨ‑ɨmbale ʉhwo, ɨmbakhate na hubhapinye abhooziwa na hubhaleete hwi‑ibooma ɨlyɨ Yelusaleemu huje, bhafundwe.

6 Isiku limo lwɨ‑ɨmpalamiiye afishe hu Damesiki, yahali mu saala nʼtanda ɨya pasanya ɨshi, lubhilo lwene ʉlukhozyo ʉlugoosi lwa luzeluupe tee afume hu mwanya lwahakhozya afume ɨmbali zyonti. 7 Nahagwa pa nsi, nahʉmvwa izwi lihumbʉʉzya liyiga, ‘Sauli! Sauli! Yeenu ʉhundavya?’ 8 Nahabhʉzɨɨlɨzya nahaga, ‘Aawe we naanu, Mwɨnɨ?’ Lyope izwi lyahaga, ‘Anɨ nɨ Yeesu ʉwa hu Nazaleeti, wʉ‑ʉhundavya.’ 9 Abhamwetu bha tahashʉʉlaga peeka, bhahalulolile ʉlukhozyo, lyope izwi bhahalyʉmvwɨzye, leelo saga bhahalyagɨɨnye. 10 Nahabhʉzɨɨlɨzya nahaga, ‘Ɨshi Mwɨnɨ, ʉhwanza aje, ɨmbombe yeenu?’ ɄMwɨnɨ ahanaamula ahaga, ‘Ɨmɨɨlɨla, ʉtʉʉshe mu Damesiki. Ʉmwo ʉnza humʼmwaje ʉmuntu ʉmo wa‑abhala hubhʉʉzye ɨmbombo zyonti zyʉ‑ʉhwanziwa abhombe.’ 11 Ɨpo nahapootwa alole hu nongwa ya‑aje, ʉlukhozyo lwahali luzelu tee. Abhamwetu bhahahata ɨnyoobhe, bhahandongozya afishe mwi‑ibooma ɨlyɨ Damesiki.

12 Ʉhwo hwahali nʉ muntu ʉmo wa‑ahanʼtinihaga ʉNgʉlʉbhɨ, ʉyo itaawa lyakwe ahali yʉ Ananiya. Ʉmuntu ʉyo ahazilondolezyaga tee ɨndajizyo zyetu ɨzyɨ Shiyahuudi, nantele ahayangwaga shinza na Bhayahuudi bha bhahakhalaga hu Damesiki. 13 Ahɨnza, ahɨmɨɨlɨla panshɨnjɨ paliinɨ, ahambʉʉzya ahaga, ‘Sauli holo waanɨ, ʉyande alole nantele.’ Lubhilo lwene amaaso gaanɨ gahiiguha, gahanda alole nantele, nahanʼnola.

14 Ɨpo ʉAnaniya ahambʉʉzya ahaga, ‘ɄNgʉlʉbhɨ ʉwa bhamaama bheetu aʼsaluuye aawe huje, ʉmanye zya‑ahwanza ʉmwene na hunʼnole ʉla wa‑ali nʼgolosu na‑atejeelezye amazwi afume hwa mwene ʉNʼgolosu. 15 Nantele, ʉbhala‑abhe nʼsimishizi waakwe hwa bhantu bhonti, hwɨ‑ɨgo gʉ‑ʉgalolile na hugʉmvwe afume hwa mwene. 16 Ɨshi leelo, ɨmɨɨlɨla, ʉgandi akhaabhe! Ʉyoozewe na‑akhobhoshelwe ɨmbiibhi zyaho hwi‑idala ɨlya hunʼsʉʉbhɨle ʉMwɨnɨ ʉYeesu.’

17 Ɨshi lwa noozewa, nahaweela hu Yelusaleemu. Lwa nahapuutaga mu lubhaga lwɨ nyumba ɨmfinjile ɨya Ngʉlʉbhɨ, nahalola ɨndoleshelo. 18 Mu ndoleshelo ɨyo, nahanʼnola ʉMwɨnɨ ʉYeesu, ahambʉʉzya ahaga, ‘Lubhilo! Ʉsogole ɨpa pa Yelusaleemu, pɨpo abhantu abha pi‑ibooma ɨli saga bhahayihuwɨɨtɨha ʉsimishizi waaho hu nongwa yaanɨ.’ 19 Nahamʼmwamula nahaga, ‘Mwɨnɨ, abheene bhamɨɨnye shinza huje, nahashilaga mu nyumba ɨzya‑apuutile na‑amanyiilile, nahabhakhomaga na hubhakʉnje mu hoobhe bhonti bha bhahali nʉ lwɨtɨho hwaliiwe! 20 Hu habhaazyo ɨho ʉnʼsimishizi waaho ʉSiteefano lwa‑ahagogwaga, nanɨ nahɨtɨɨshe aje agogwe. Nantele nahabhenyelezyaga abhagoji amagolole gaabho.’ 21 Ɨpo ʉMwɨnɨ ahambʉʉzya ahaga, ‘Bhalaga, pɨpo ɨmbala husonteelezye ʉhutali hwa bhantu bha saga Bhayahuudi.’ ”

ɄPaulo ahwimanyisya huje, wope Nʼnuumi

22 Ɨshi, ɨmpʉga ɨya bhantu bhaala yahabha ɨhunʼtejeelezya ʉPaulo. Leelo lwa wayanga amazwi ɨga aje, ʉNgʉlʉbhɨ anʼsonteleziizye hwa bhantu bha saga Bhayahuudi, bhahanda abwaje ibwago bhahaga, “Ʉmuntu ʉnʉ ahwanziwa afwe! Saga akhondɨɨye huje, alembaje mu nsi!” 23 Bhahajendeelela abwaje ibwago, bhahabhʉsyaga amagolole gaabho hu mwanya, nantele bhahatukusyaga amankondi. 24 Ʉnʼgoosi ʉla ʉwa bhagoosi bha bhalwi ahabhalajizya abhalwi bhaakwe huje, bhanʼtwale ʉPaulo mwi‑ilinga ɨlya bhalwi. Ʉhwo bhanʼshete nɨ nsanzʉ aje, ayanje lya libhombile huje, abhantu bhamʼbwajile ibwago ɨsho. 25 Abhalwi lwa bhamʼpinya ʉPaulo nɨ nkusa huje bhanʼshete, ʉPaulo ahamʼmʉzɨɨlɨzya ʉnʼnongozi waabho wa‑ahɨmɨlɨɨye paala, ahaga, “Wɨlɨ, mu ndajizyo zyenyu, ɨhwanziwa hunʼshete ʉNʼnuumi sinta alongwe ɨnongwa yaakwe?”

26 Ʉnʼgoosi ʉla ʉwa bhalwi lwa wʉmvwa ɨzyo, ahabhala, ahamʼmʉʉzya ʉnʼgoosi waakwe ahaga, “Ʉhwanza abhombe yeenu? Ʉmuntu ʉnʉ Nʼnuumi!” 27 Ɨpo ʉnʼgoosi ʉla ʉwa bhagoosi bha bhalwi ahabhala, ahamʼmʉzɨɨlɨzya ʉPaulo ahaga, “Ɨshi mbʉʉzye! Wɨlɨ, aawe ʉli Nʼnuumi?” ɄPaulo ahamʼmwamula ahaga, “Ena, ɨndi Nʼnuumi.” 28 Ɨpo ʉnʼgoosi ahaga, “Anɨ ɨndi Nʼnuumi, pɨpo nahawukalile ʉkhaaya hu mpɨɨya ɨnyinji tee.” ɄPaulo ahaga, “Anɨ ɨndi Nʼnuumi wa‑apaapwe.”

29 Abhalwi bha bhahanzaga humʼmʉzɨɨlɨzye hwi‑idala ɨlya hunʼkhome ʉPaulo, lwa bhʉmvwa, bhahasogola lubhilo. Wope ʉnʼgoosi ʉla ahoogopa tee lwa waamanya aje, ʉPaulo Nʼnuumi, pɨpo ahamʼpinyile na manyololo.

ɄPaulo pilongolela li‑ikoloti

30 Ɨndaabhɨ yaakwe, ʉnʼgoosi ʉwa bhagoosi bha bhalwi ahanzaga huje, amanye shinza zya zyahamʼmombile ʉPaulo aje, ataakiwe na Bhayahuudi. Ɨpo ahabhalajizya huje, bhamʼmwawule amanyololo. Ahabhalajizya abhalongozi bha bhasayi bha Ngʉlʉbhɨ ni‑ikoloti lyonti huje, bhakhomaane. Ahanʼkwizya ʉPaulo, ahamʼmwɨmɨɨlɨsya pilongolela lyabho.