23
ɄPaulo ahabhazyamila abhitongwa bhaala,
ahabhabhʉʉzya ahaga,
“Mwɨ Bhayahuudi bhaholo bhaanɨ,
mu wʉʉmi waanɨ afishe ɨleelo ɨli,
nahamʼmombelaga ʉNgʉlʉbhɨ hu mwoyo ʉnʼzelu.”
2 Ɨpo ʉnʼsayi ʉnʼgoosi ʉAnaniya lwa wʉmvwa amazwi ɨgo,
ahabhalajizya bha bhahɨmɨlɨɨye pa pɨɨpɨ nʉ Paulo aje,
bhamʼbavule hwi‑ilomu.
3 Ɨpo ʉPaulo ahamʼmʉʉzya ahaga,
“ɄNgʉlʉbhɨ ahayihubavulanya naawe,
aawe wʉ‑ʉli nʼgulugulu!
a Ʉkhɨɨye ɨpo hundonje anɨ alɨngaane nɨ ndajizyo,
leelo nawe saga ʉhuzitiniha lwonti ɨndajizyo hu nongwa ya‑aje,
ʉhubhalajizya abhantu aje,
bhambavulanye anɨ sinta hundonje.”
4 Abhantu bha bhahɨmɨlɨɨye pa pɨɨpɨ nʉ Paulo bhahamʼmʉzɨɨlɨzya ʉPaulo bhahaga,
“Aawe saga ʉhwogopa hunʼnije ʉnʼsayi ʉnʼgoosi ʉwa Ngʉlʉbhɨ?”
5 ɄPaulo ahabhaamula ahaga,
“Mwɨ bhaholo bhaanɨ Bhayahuudi,
saga nahamɨɨnye huje yʉ nʼsayi ʉnʼgoosi ʉwa Ngʉlʉbhɨ,
pɨpo ɨsimbwilwe mu Nsimbo ɨMfinjile huje,
‘Ʉsahayanje shibhiibhi hwa nʼnongozi ʉwa bhantu bhaaho.’ ”b
6 ɄPaulo lwa waamanya aje,
bhamo mu bhantu bhaala bhahali Bhafalisaayo na Bhasadukaayo,
ahayanga hwi‑izwi igoosi ahaga,
“Mwɨ bhaholo bhaanɨ Bhayahuudi,
anɨ ɨndi Mʼfalisaayo,
nantele ɨndi mwana wa Mʼfalisaayo.
Anɨ bhandeetile ɨpa alongwe,
pɨpo ɨndi nʉ lusʉʉbhɨlo huje,
abhafwe bhahayizyʉha.”
7 ɄPaulo lwa waamala ayanje ɨsho,
aBhafalisaayo na Bhasadukaayo bhahanda adaliihane tee.
Abhantu abhi‑ikoloti bhahalehana,
bhahabha mu mpʉga zibhɨɨlɨ,
8 pɨpo aBhasadukaayo saga bhahwɨtɨha aje,
hulɨɨho azyʉshe hwa bhafwe,
bhope abhantumi bha Ngʉlʉbhɨ saga bhalɨɨho,
zyope ɨmpepo saga zilɨɨho.
Leelo aBhafalisaayo bhahwɨtɨha huje,
ɨvyo vyonti vilɨɨho.
9 Ɨpo hwahabha ni‑ibwago igoosi.
Abhamanyizyi bhamo abhɨ ndajizyo zya Moose bha bhahali Bhafalisaayo bhahɨmɨɨlɨla,
bhahadaliihana hwi‑ikhone.
Abheene bhahaga,
“Atɨ saga tiwulolile ʉbhiibhi wowonti hwa muntu ʉnʉ,
pamo agabha ayanjile nʉ mʼpepo,
awe nʉ nʼtumi wa Ngʉlʉbhɨ.”
10 Idali lyahonjela abhe ligoosi tee.
Ɨpo ʉnʼgoosi ʉwa bhagoosi bha bhalwi ahabha nʉ wooga haani hu nongwa ya‑aje,
abhantu bhaganʼzembulanya shibhiibhi ʉPaulo.
Ahabhalajizya abhalwi bhaakwe aje,
bhamʼmwefwe ʉPaulo hwi‑ikhone paahati yaabho,
bhamʼmwezye mwi‑ilinga.
11 Isiku ɨlyo nʉsiku,
ʉMwɨnɨ ʉYeesu ahɨmɨɨlɨla panshɨnjɨ pa Paulo,
ahamʼmʉʉzya ahaga,
“Ʉhwipeelaje ʉmwoyo!
Nanshi shʉ‑ʉfumiizye ʉsimishizi ɨpa pa Yelusaleemu hu nongwa yaanɨ,
shɨɨsho shɨ‑ɨhwanziwa ʉhamfumizyaje ʉsimishizi nʉ‑ʉhwo hwi‑ibooma ɨlyɨ Luumi.”
Ɨnsɨɨbho ɨzya hunʼgoje ʉPaulo
12 Lwa hwasha,
aBhayahuudi bhamo bhahabhʉngaana peeka hu mfiso.
Ʉhwo bhahalapa huje,
“Saga tahayilya na‑amwele hohonti afishe lwa tahayihunʼgoga ʉPaulo.”
13 Ɨbho bha bhahɨtɨhɨɨne ɨzyo,
bhahali abhantu ashile amashʉmi ganɨ.
14 Ɨpo bhahabhabhalila abhalongozi bha bhasayi bha Ngʉlʉbhɨ na bhagoosi bha Bhayahuudi,
bhahabhabhʉʉzya bhahaga,
“Atɨ tɨtɨhɨɨne peeka na‑alape aje,
saga tahayilya na‑amwele hohonti afishe lwa tahayihunʼgoga ʉPaulo.
15 Ɨshi amwɨ peeka ni‑ikoloti lyonti ɨlya bhitongwa musonteelezye ɨntumi hwa nʼgoosi ʉwa bhagoosi bha bhalwi aje,
ʉPaulo ayɨnze huliimwɨ.
Amwɨ mubhe nkati muhwanza humʼmʉzɨɨlɨzye shinza ɨnongwa yaakwe ya‑alongwa.
Atɨ tɨnza humʼmwʉbhɨle mwi‑idala na hunʼgoje sha‑asɨɨle afishe ɨpa.”
16 Leelo ʉmwipwa wa Paulo lwa wʉmvwa sha bhɨtɨhɨɨne,
ahasogola,
ahabhala lubhilo mwi‑ilinga muula mwa‑ahali ʉPaulo,
ahamʼmʉʉzya ɨnsɨɨbho zyabho zyonti.
17 Ɨpo ʉPaulo ahanʼkwizya ʉnʼnongozi ʉmo ʉwa bhalwi,
ahamʼmʉʉzya ahaga,
“Ʉnʼtwale ʉnʼsahaala ʉnʉ hwa nʼgoosi waaho,
pɨpo ali nɨ nongwa zimo zya‑ahwanza humʼmʉʉzye.”
18 Ɨshi ʉnʼnongozi ʉla ʉwa bhalwi ahanʼtwala ʉnʼsahaala ʉyo hwa nʼgoosi waakwe,
ahamʼmʉʉzya ahaga,
“ɄPaulo ʉla wa‑ali mu hoobhe,
ankwiziizye na hundaabhe aje,
ɨnʼneete ʉnʼsahaala ʉnʉ hwaliiwe,
pɨpo ali nɨ nongwa zya‑ahwanza aje,
aʼbhʉʉzye.”
19 Ɨpo ʉnʼgoosi ʉyo ʉwa bhagoosi bha bhalwi ahanʼkhata ʉnʼsahaala ʉnʼkhono,
ahabhala nawo hu mfiso.
Ʉhwo ahamʼmʉzɨɨlɨzya ahaga,
“Wɨlɨ,
nongwa nshi zyʉ‑ʉhwanza aje,
ʉmbʉʉzye?”
20 Ʉnʼsahaala ʉla ahamʼmwamula huje,
“ABhayahuudi bhɨtɨhɨɨne aje,
bhaʼlaabhe huje,
ɨndaabhɨ ʉnʼtwale ʉPaulo pilongolela li‑ikoloti.
Abheene bhahayisinjiilizya nkati ikoloti lihwanza humʼmʉzɨɨlɨzye shinza ɨnongwa yaakwe.
21 Leelo aawe ʉsahabhɨtɨshɨle,
pɨpo huli abhalume ashile amashʉmi ganɨ bha bhahwibhɨɨshɨle nzɨɨla humʼmwʉbhɨle ʉPaulo mwi‑idala,
nka bhanʼgoje.
Bhalapile aje,
‘Saga tahayilya na‑amwele hohonti afishe lwa tahayihunʼgoga ʉPaulo.’
Ɨshi bhagʉʉla ʉlugamulo lwaho lwene.”
22 Ɨpo ʉnʼgoosi ʉyo ahamʼmʉʉzya ʉnʼsahaala ʉla huje,
“Ʉgandi humʼmʉʉzye ʉmuntu wowonti aje,
ʉmbʉzɨɨzye ɨnongwa ɨzi.”
Ɨpo ahamʼmwɨtɨshɨla ʉnʼsahaala ʉla huje,
asogolaje.
Bhahunʼtwala ʉPaulo hwa Feeliki ʉnʼnongozi ʉwɨ mukowa
23 Ɨpo ʉnʼgoosi ʉwa bhagoosi bha bhalwi ahabhakwizya abhalongozi bhabhɨɨlɨ abha bhalwi,
ahabhalajizya huje,
“Muhwilɨngaanye,
mubhe abhalwi ɨmya zibhɨɨlɨ peeka na bhalwi abhanjɨ amashʉmi pʉnga (70) bha bhahayibhala nɨ falaasi,
na bhamwabho ɨmya zibhɨɨlɨ bha bhahayikhata ɨmpalala mu nyoobhe.
Bhonti bhahwilɨngaanye nzɨɨla asogole pa saala ɨya taatu ɨya nʉsiku abhale hwi‑ibooma ɨlyɨ Kayisaliiya.
24 Nantele muzibhɨɨshe nzɨɨla ɨfalaasi zya‑ahayijendela ʉPaulo,
munʼnoleezye aje,
afishe shinza hwa nʼnongozi ʉwɨ mukowa ʉFeeliki.”
25 Ɨpo ʉnʼtwale ʉyo ahanʼsimbila ʉFeeliki ɨkalaata yɨ‑ɨyiga,
26 “Anɨ nɨKilawudiyo Liisiya,
ɨhulamuha aawe wʉFeeliki,
we nʼnongozi wɨ nshɨnshɨ.
Mwagona!
27 Ɨnʼsonteleziizye ʉmuntu ʉyo huliiwe,
pɨpo ahakhɨɨtwe na Bhayahuudi bha bhahanzaga hunʼgoje.
Leelo lwa naamanya aje Nʼnuumi,
nahabhala peeka na bhalwi bhaanɨ humʼfyʉle.
28 Nahanzaga aje,
ɨmanye ɨnongwa ɨzyo aBhayahuudi zya bhahunʼtaaka.
Ɨpo nahanʼtwala pilongolela li‑ikoloti lyabho.
29 Nahamanya aje,
bhahunʼtaaka hu nongwa zyɨ mabhʉzɨɨlɨzyo agɨ ndajizyo zyabho lwene.
Leelo,
saga lilɨɨho izwi nka limo ɨlya‑aje,
agakʉngwa mu hoobhe awe agogwe.
30 Pamandɨ nahamanya ɨnongwa huje,
huli aBhayahuudi bha bhali nɨ nsɨɨbho ɨmbiibhi ɨzya hunʼgoje.
Ɨpo lubhilo nahabhasonteelezya abhalwi huje,
bhanʼneete hwaliiwe.
Nahabhabhʉʉzya bha bhahanʼtaakile aje,
bhɨnze hunʼtaake hwaliiwe.”
31 Ɨpo abhalwi bhaala bhahamʼmwega ʉPaulo nanshi sha bhahalajiziiwe.
Bhahanʼtwala ʉsiku wʉʉwo afishe hwi‑ibooma ɨlyɨ Antipatiili.
32 Lwa hwasha,
abhalwi bhaala bha bhahabhalile lwɨ manama,
bhahabhaleha bha bhahabhalile nɨ falaasi aje,
bhabhale peeka nʉ Paulo.
Abheene bhahaweela mwi‑ilinga.
33 Bhaala bha bhahabhalile nɨ falaasi lwa bhaafiha hwi‑ibooma ɨlyɨ Kayisaliiya,
bhahamʼpeela ʉFeeliki ʉnʼnongozi ʉnʼgoosi ʉwɨ mukowa ɨkalaata ɨla.
Nantele bhahamʼmɨɨha ʉPaulo pa nsi yi‑ikhone lyakwe.
34 Ʉnʼnongozi ʉyo lwa waamala abhaazye ɨkalaata ɨla,
ahabhabhʉzɨɨlɨzya ahaga,
“Ʉmuntu ʉnʉ wa hu mukowa bhʉlɨ?”
Lwa bhamʼmwamula aje,
ʉPaulo wa hu mukowa ʉgwɨ Kilikiya,
35 ʉnʼnongozi ʉla ahamʼmʉʉzya ʉPaulo ahaga,
“Nahayitejeelezya ɨnongwa yaaho,
lwa bhahayɨnza bha bhaʼtaakile.”
Ɨpo ahabhalajizya abhalwi bhaakwe huje,
bhanʼnɨndɨɨlɨle ʉPaulo mu shinamwɨnɨ ɨsha Heloode ʉNʼgoosi.