ɄPaulo abhala hu Yelusaleemu
21
Lwa talagana na bhagoosi bhaala abha hwi‑ibooma ɨlyɨ Efeeso,
tahatʉʉha mu meeli.
Ɨpo tahabhala,
tahashizanya lwene,
tahafiha hu Koosi,
ɨnsi ɨyo ɨli paahati yɨ nsʉmbi.
Lwa hwasha,
tahabhala hu Loode,
ɨnsi ɨyɨnjɨ ɨyo ɨli paahati yɨ nsʉmbi.
Afume ʉhwo,
tahabhala nantele,
tahafiha hwi‑ibooma ɨlyɨ Patala.
2 Ɨpo tahayaaga ɨmeeli ɨyɨnjɨ yɨ‑ɨbhala hu mukowa ʉgwɨ Foyiniike,
tahatʉʉha,
tahabhala nayo.
3 Lwa tayilola ɨnsi yɨ‑ɨli paahati yɨ nsʉmbi,
ya bhayiga ɨKiipulo,
tahayileha ambali ɨya hu mongo.
Ɨpo tahajendeelela,
tahafiha hu mukowa ʉgwɨ Siiliya.
Lwa taafiha mwi‑ibooma ɨlyɨ Tiilo mu mukowa ʉgwo,
tahiiha mu meeli ɨyo.
Ɨpo pa pahanziwaaga ahwisye amazigo.
4 Lwa tahagʉʉlaga ɨmeeli lwɨ‑ɨhwisya amazigo,
tahabhaaga abhooziwa abhɨ‑ɨpo,
tahakhala nabho ɨnsiku pʉnga (7).
ɄMʼpepo ʉMʼfinjile ahabhalanga nzɨɨla abhooziwa bhaala amalabha ga gahayihumʼmwaga ʉPaulo hwi‑ibooma ɨlyɨ Yelusaleemu.
Abheene bhahanʼnolela ɨnkʉmbʉ,
bhahanʼsunda bhahaga,
“Ʉsahaabhale hu Yelusaleemu!”
5 Leelo,
ɨnsiku pʉnga (7) ɨzya‑akhale paala lwa zyamaliha,
tahasogola.
Abhooziwa bhonti abha mwi‑ibooma liila ɨlya hu Tiilo,
abhalume,
abhashɨ peeka na bhaana bhaabho bhahatiloleezya hwʉnzɨ hwi‑ibooma ɨlyo,
bhahatifisya panshɨnjɨ pa nsʉmbi.
Ɨpo tenti tahasugamila,
tahanʼnaabha ʉNgʉlʉbhɨ.
6 Lwa talagana nabho,
atɨ tahatʉʉha mu meeli ɨyo,
bhope bhahaweela humwabho.
7 Tahasogola mu Tiilo,
tahajendeelela ashʉʉle,
tahafiha hwi‑ibooma ɨlyɨ Tolemaayi.
Tahabhalamuha abhooziwa abhamwetu,
tahakhala nabho isiku lyeka.
8 Lwa hwasha,
tahasogola,
tahabhala hwi‑ibooma ɨlyɨ Kayisaliiya.
Ɨpo tahakhala pa nyumba ya Filipo ʉyo wa‑ahali nʼnʉmbɨɨlɨli wɨ Nongwa ɨNyinza ɨzya Yeesu.
Ahali weeka mwa bhaavwi bhaala pʉnga (7) bha bhahasaluliilwe hwi‑ibooma ɨlyɨ Yelusaleemu.a
9 ɄFilipo ahali na bhaana abhalɨndu bhanɨ bha saga bhahegwilwe.
Nantele,
ʉNgʉlʉbhɨ ahabhapeelile ɨshikʉnjɨlwa ɨsha‑akuwe.
10 Lwa taakhala ɨnsiku ɨndoodo pa Kayisaliiya,
ahɨnza ʉnʼkuwi ʉmo wa Ngʉlʉbhɨ afume hu mukowa ʉgwɨ Yudeeya,
ʉyo itaawa lyakwe ahali yʉ Agaabo.b
11 ɄAgaabo ʉyo ahɨnza hutiseepe.
Lwa waafiha,
aheega ilamba lya Paulo.
Ahahwipinya mu manama na mu makhono gaakwe,
ahaga,
“ɄMʼpepo ʉMʼfinjile ayanga huje,
‘Ɨshi sha shɨɨsho aBhayahuudi abha hwi‑ibooma ɨlyɨ Yelusaleemu sha bhahayihumʼpinya ʉmuntu ʉwi‑ilamba ɨli.
Nantele,
bhahayihumʼmɨɨha mu nyoobhe zya bhantu bha saga Bhayahuudi.’ ”
12 Lwa tʉmvwa ɨsho,
atɨ peeka na bhooziwa abhamwetu abha hu Kayisaliiya,
tahanʼnambaga haani ʉPaulo huje,
asahaabhale hu Yelusaleemu.
13 Leelo,
ahataamula ahaga,
“Yeenu mubhomba ɨsho,
alile na‑alɨnje hunzugumizye ʉmwoyo gwanɨ hu mansozi?
Anɨ saga ɨhwilɨngɨɨnye apinywe mu hoobhe hwene,
lyoli na‑afwe hu Yelusaleemu hu nongwa ya Mwɨnɨ ʉYeesu.”
14 Lwa taalola huje,
ʉPaulo saga ahatʉmvwa,
tahanʼneha,
tahaga,
“Zya‑ahwanza ʉMwɨnɨ ʉYeesu,
zibhombeshe.”
15 Pamandɨ,
taheega amazigo geetu,
tahanda ashʉʉle abhale hu Yelusaleemu.
16 Abhooziwa bhamo abha pi‑ibooma ɨlyɨ Kayisaliiya bhahatiloleezya,
bhahatitwala pa nyumba ya Naasoni.
Ɨpo tahakhala nawo hu habhaazyo.
ɄNaasoni ʉyo ahali muntu wa hu Kiipulo,
nantele ahali ʉmo mwa bhooziwa bha Yeesu abha hwande.
ɄPaulo afiha hwi‑ibooma ɨlyɨ Yelusaleemu
17 Lwa taafiha mwi‑ibooma ɨlyɨ Yelusaleemu,
abhooziwa abhʉ‑ʉhwo bhahatejeelela hu luseshelo.
18 Lwa hwasha,
atɨ nʉ Paulo tahabhala hunʼseepe ʉYaakobo.
Bhope abhagoosi abhɨ shibhanza bhonti bhahali paala huje,
bhakhomaane naatɨ.
19 ɄPaulo ahabhalamuha bhonti.
Ahabhabhʉʉzya gonti ʉNgʉlʉbhɨ ga‑ahabhombile hwa bhantu bha saga Bhayahuudi hwi‑idala ɨlyɨ mbombo yaakwe.
20 Lwa bhʉmvwa ɨgo,
bhonti bhahamʼmwamiha ʉNgʉlʉbhɨ.
Ɨpo bhahamʼmʉʉzya ʉPaulo bhahaga,
“Holo weetu,
waalola huje aBhayahuudi abhamwetu ɨelufu zinyinji bhamʼmwɨtɨɨshe ʉYeesu!
Nantele,
ɨbho bhonti bhahwifumya hu dandamazu akhate ɨndajizyo zya Moose.
21 Bhʉmvwɨzye huje,
ʉmanyizya aBhayahuudi bhonti bha bhakhala hu nsi zya saga zya Bhayahuudi huje,
bhagandi asaaje ɨndajizyo zya Moose,
bhagandi hubhatende ɨngoola ɨzya hwitagaalila ɨzyɨ lume abhaana bhaabho na‑aje,
bhagandi akhate amiiho geetu agɨ Shiyahuudi.
22 Ɨshi,
tibhombe yeenu?
ABhayahuudi ɨbho bhonti bhabhala hwʉmvwe huje,
ʉyɨnzɨle ɨpa.
23 Ɨshi,
ʉbhombe nanshi sha tihubhʉʉzya.
Pɨɨpa muuhati yeetu bhalɨɨho abhalume bhanɨ bha bhabhɨɨshɨle ɨmfingo pa maaso ga Ngʉlʉbhɨ.
24 Ʉbhe peeka nabho mu mpuuto ɨzya hwisangalusye.
Ʉbhasombele zya zihwanziwa huje,
bhasyengule isisi lyabho.
c Ɨsho abhantu bhonti bhabhala‑amanye hu simishizi huje,
ɨgo gonti ga bhayanjile saga gɨ lyoli.
Bhabhala‑amanye huje,
aawe weewe ʉhuzitiniha ɨndajizyo zya Moose.
25 Ɨshi,
hwa bha saga Bhayahuudi bha bhamʼmwɨtɨɨshe ʉYeesu,
tahabhasimbiiye ɨkalaata hubhabhʉʉzye ʉlugamulo lwetu huje,
bhasahaalye ɨshalye sha bhafumiizye nsangu hwa bhangʉlʉbhɨ,
bhasahaalye idanda awe ɨnyama zya bhanionjile,
nantele bhagandi abhombe ʉweegu.”
26 Lwa hwasha,
ʉPaulo ahabheega abhalume bhaala,
ahapuuta ɨmpuuto ɨzya hwisangalusye peeka nabho.
Pamandɨ ahatʉʉha mu lubhaga lwɨ nyumba ɨmfinjile ɨya Ngʉlʉbhɨ huje,
amʼmʉʉzye ʉnʼsayi wa Ngʉlʉbhɨ isiku lya bhahayimala ahwisangalusye hwabho,
na‑afumye ɨnsangu hwa shila muntu.
Akhatwe hwa Paulo
27 Ɨnsiku pʉnga (7) ɨzya hwisangalusye lwa zyapalamila amalishe,
aBhayahuudi bhamo bha bhahafumile hu mukowa ʉgwɨ Aasiya bhahanʼnola ʉPaulo mu lubhaga lwɨ nyumba ɨmfinjile ɨya Ngʉlʉbhɨ.
Bhahasonsheelezya ɨmpʉga yonti ɨya bhantu bha bhahali paala,
bhahanʼkhata ʉPaulo,
28 bhahanda abwaje ibwago huje,
“Mubhalume amwɨ mubhɨ‑ɨpa pa Izilaeeli,
taavwi!
Ʉmuntu ʉnʉ ya yʉʉla wa‑amanyizya shila muntu na hwohwonti huje,
bhatisyonshelaje tiBhaizilaeeli,
bhazisyonshelaje nɨ ndajizyo zya Moose.
Nantele bhayisyonshelaje nɨ nyumba ɨmfinjile ɨnɨ ɨya Ngʉlʉbhɨ.
Ibhiibhi haani ayilufiizye ɨnyumba ɨmfinjile lwa‑ahabhatʉsyaga bha saga Bhayahuudi mu lubhaga ʉlwu ʉlwɨ nyumba ɨmfinjile ɨya Ngʉlʉbhɨ.”
29 Bhahayanjile ɨsho,
alɨngaane na‑aje,
bhahanʼnolile ʉTuloofimo ʉwa hu Efeeso wa saga ahali Nʼnyahuudi ali peeka nʉ Paulo pa Yelusaleemu.
Bhahasɨɨbhaga huje,
ʉPaulo anʼtʉsɨɨzye ʉTuloofimo mu lubhaga lwɨ nyumba ɨmfinjile ɨya Ngʉlʉbhɨ.
30 Ɨpo ibooma lyonti ɨlyɨ Yelusaleemu lyahabha ni‑ibho.
Abhantu bhahɨnza bhashɨmbɨla afume ʉhwu nʉ‑ʉhwo,
bhahabhʉngaana mu lubhaga lwɨ nyumba ɨmfinjile ɨya Ngʉlʉbhɨ mwa‑ahali ʉPaulo.
Bhahanʼgada,
bhahanʼdendemulila hwʉnzɨ,
bhope abhalɨndɨɨlɨli bhahagalila ɨnyiiji lubhilo.
31 Abhantu ɨbho lwa bhahanʼkhomaga ʉPaulo huje bhanʼgoje,
ɨnongwa zyahamʼfishila ʉnʼgoosi ʉwa bhagoosi bha bhalwi abhɨ Shiluumi huje,
ibooma lyonti ɨlyɨ Yelusaleemu limemile libho.
32 Lubhilo lwene ʉnʼgoosi ʉyo ahabheega abhalwi na bhalongozi bhaabho,
bhahashɨmbɨla abhale hu mpʉga ya bhantu.
Abhantu bhaala lwa bhabhalola abhalwi bhali peeka nʉ nʼgoosi waabho,
bhahaleha hunʼkhome ʉPaulo.
33 Ʉnʼgoosi ʉyo ʉwa bhagoosi bha bhalwi ahamʼpalamila ʉPaulo,
ahanʼkhata,
ahalajizya huje,
apinywe na manyololo gabhɨɨlɨ.
Ɨpo ahabhʉzɨɨlɨzya ahaga,
“Yʉ naanu ʉnʉ?
Abhombile yeenu?”
34 Lubhilo lwene abhantu bhaala bhahanda abwaje ibwago.
Bhamo bhahayangaga ɨli,
bhamo liila.
Ʉnʼgoosi ʉyo ʉwa bhagoosi bha bhalwi ahapootwa amanye ga gafumiiye hu nongwa yi‑ibwago.
Ahalajizya huje,
bhanʼtwale ʉPaulo mwi‑ilinga.
35 Abhalwi lwa bhamʼfisya mu ntandalilo ɨyi‑ilinga liila,
bhahanʼnyeetula alɨngaane na‑aje,
hwahali ni‑ibho haani.
36 Abhantu bhaala bhahanʼnondolezya ʉPaulo ʉhwu bhabwaga ibwago bhahaga,
“Nʼgoje!”
ɄPaulo ahwiyʉʉmɨla pitagaalila lya Bhayahuudi
37 Abhalwi bhaala lwa bhahunʼtʉʉsya ʉPaulo mwi‑ilinga lyabho,
ahamʼmʉzɨɨlɨzya ʉnʼgoosi ʉwa bhagoosi bha bhalwi waabho ʉla ahaga,
“Bhʉlɨ,
ɨhondɨɨye ahubhʉʉzye izwi limo?”
Ahaamula ahaga,
“Oogo!
Fwandi nawe ʉmɨɨnye ayanje ɨShiyunaani!
38 Bhʉlɨ,
aawe saga ʉli Mʼmiisili ʉla wa‑ahaleetaga ibho na hubhatwale abhanyambuda ɨelufu zinɨ pi‑igona?”
39 ɄPaulo ahaamula ahaga,
“Anɨ ɨndi Nʼnyahuudi,
nahapapwilwe mwi‑ibooma igoosi ɨlyɨ Taaso mu mukowa ʉgwɨ Kilikiya.
Ɨhulaabha ʉndeshe ɨnjanje na bhantu ɨbha.”
40 Ʉnʼgoosi ʉla ʉwa bhagoosi bha bhalwi lwa wamʼmwɨtɨshɨla,
ʉPaulo ahɨmɨɨlɨla mu ntandalilo ɨla,
ahavwenzya ʉnʼkhono hwa bhantu bhaala huje bhapʉʉme myɨ!
Bhonti bhahapʉʉma,
ahayanga nabho mu njango yaabho ɨyɨ Shiebulaniya.